საქართველოს ენერგეტიკის სამინისტროს მიერ განსახორციელებელი ღონისძიებების თაობაზე

საქართველოს მთავრობის

განკარგულება №647

2017 წლის 31 მარტი

ქ. თბილისი

საქართველოს ენერგეტიკის სამინისტროს მიერ განსახორციელებელი ღონისძიებების თაობაზე

1. საქართველოს მთავრობის 2016 წლის 21 ოქტომბრის №2241 განკარგულების მე-4 პუნქტის გათვალისწინებითა და „სახელმწიფო შესყიდვების შესახებ“ საქართველოს კანონის 10¹ მუხლის მე-3 პუნქტის „დ“ ქვეპუნქტის შესაბამისად, საქართველოს მთავრობას, „Optimum Enerji Üretim A.Ş.“-ს, შპს „ენერგოტრანსსა“ და სს „ელექტროენერგეტიკული სისტემის კომერციულ ოპერატორს“ შორის 2011 წლის 19 თებერვალს დადებული ურთიერთგაგების მემორანდუმის ფარგლებში „Optimum Enerji Üretim A.Ş.“-ის მიერ საქართველოს მთავრობის სასარგებლოდ წარდგენილი საბანკო გარანტიის (№HGZ09411M000048, გარანტი - „ASYA KATILIM BANKASI A.Ş.“, გაცემის თარიღი - 29/03/2011, ოდენობა - 3,108,000.00 აშშ დოლარი) გამოთხოვასთან დაკავშირებით, თურქეთის რესპუბლიკის სახელმწიფო დაწესებულებებთან და სასამართლოებში საქართველოს მთავრობის წარმომადგენლობის განხორციელების მიზნით, შესაბამისი იურიდიული კომპანიისგან იურიდიული მომსახურების შესყიდვა საქართველოს ენერგეტიკის სამინისტრომ განახორციელოს გამარტივებული შესყიდვის საშუალებით.

2. საქართველოს ენერგეტიკის სამინისტრომ უზრუნველყოს შესაბამის იურიდიულ კომპანიასთან შესაბამისი ხელშეკრულებ(ებ)ის დადება ამ განკარგულების პირველი პუნქტით გათვალისწინებული შესყიდვის თაობაზე.

3. „სახელმწიფო შესყიდვების შესახებ“ საქართველოს კანონის 21-ე მუხლის მე-4 პუნქტისა და „გამარტივებული შესყიდვის კრიტერიუმების განსაზღვრისა და გამარტივებული შესყიდვის ჩატარების წესის დამტკიცების თაობაზე“ სსიპ − სახელმწიფო შესყიდვების სააგენტოს თავმჯდომარის 2015 წლის 17 აგვისტოს №13 ბრძანებით დამტკიცებული წესის მე-10 მუხლის მე-8 პუნქტის შესაბამისად, ამ განკარგულების პირველი პუნქტით გათვალისწინებულ შესყიდვასთან დაკავშირებით დასადები ხელშეკრულებ(ებ)ის მიმართ არ გავრცელდეს ზემოაღნიშნული ბრძანებით დამტკიცებული წესის მე-10 მუხლის 1-ლი, მე-2, მე-4 და მე-10 პუნქტებითა და მე-11 − მე-13 მუხლებით დადგენილი მოთხოვნები.

4. ამ განკარგულების პირველ პუნქტში გათვალისწინებული შესყიდვა და თანმდევი ხარჯების ანაზღაურება საქართველოს ენერგეტიკის სამინისტრომ უზრუნველყოს 2017-2018 წლებში საქართველოს სახელმწიფო ბიუჯეტით მისთვის გამოყოფილი ასიგნებების ფარგლებში, ჯამში − არაუმეტეს გადახდის დღისთვის არსებული საქართველოს ეროვნული ბანკის კურსით 70,000.00 აშშ დოლარის ლარში ეკვივალენტის ოდენობით.

5. ამ განკარგულების პირველ პუნქტში მითითებული საბანკო გარანტიის საქართველოს მთავრობის სასარგებლოდ გამოთხოვისა და თურქეთის რესპუბლიკის სახელმწიფო დაწესებულებებსა და სასამართლოებში საქართველოს სახელმწიფო ინტერესების დაცვის მიზნით, საქართველოს მთავრობის წარმომადგენლობისა და საქართველოს მთავრობის სახელით ყველა საჭირო ღონისძიების განხორციელების უფლებამოსილება (ამ უფლებამოსილებების მესამე პირ(ებ)ზე დელეგირების უფლებამოსილების ჩათვლით) მიენიჭოს საქართველოს ენერგეტიკის მინისტრს.

პრემიერ-მინისტრი                                                       გიორგი კვირიკაშვილი