სსიპ – სახელმწიფო ქონების ეროვნული სააგენტოსა და სს „საპარტნიორო ფონდის“ მიერ გასატარებელ რიგ ღონისძიებათა შესახებ

საქართველოს მთავრობის

განკარგულება №443

2017 წლის 9 მარტი

ქ. თბილისი

სსიპ – სახელმწიფო ქონების ეროვნული სააგენტოსა და სს „საპარტნიორო ფონდის“ მიერ გასატარებელ რიგ ღონისძიებათა შესახებ

1. „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-5 მუხლის „ლ“ ქვეპუნქტის შესაბამისად, ანაკლიის ღრმაწყლოვანი ნავსადგურის მშენებლობისათვის ანაკლიის ტერიტორიაზე (სამოქმედო გეგმის ფარგლებში) პროექტის ზემოქმედების ქვეშ მყოფ პირებზე შესაბამისი კომპენსაციის გაცემის მიზნით, საქართველოს ეკონომიკისა და მდგრადი განვითარების სამინისტროს სისტემაში შემავალი სსიპ – სახელმწიფო ქონების ეროვნული სააგენტოსათვის „საქართველოს 2017 წლის სახელმწიფო ბიუჯეტის შესახებ“ საქართველოს კანონით (პროგრამული კოდი: 24 11) გამოყოფილი ასიგნებებიდან სს „საპარტნიორო ფონდის“ კაპიტალი გაიზარდოს 96 000 000 (ოთხმოცდათექვსმეტი მილიონი) ლარით, ამ განკარგულების მე-2 პუნქტით განსაზღვრული ტრანშების შესაბამისად. 

 2. საქართველოს ეკონომიკისა და მდგრადი განვითარების სამინისტროს სისტემაში შემავალმა სსიპ – სახელმწიფო ქონების ეროვნულმა სააგენტომ უზრუნველყოს ამ განკარგულების პირველი პუნქტით გათვალისწინებული თანხით სს „საპარტნიორო ფონდის“ კაპიტალში ფულადი შენატანის განხორციელება ეტაპობრივად, 5 (ხუთი) მილიონი ლარის ოდენობის ტრანშებად, ხოლო ყოველი მომდევნო შენატანი ამავე ოდენობით განახორციელოს წინა ტრანშით განსაზღვრული თანხის არანაკლებ 90%-ის ათვისების შემდგომ.

3. „სს „საპარტნიორო ფონდის“ წესდების დამტკიცებისა და კაპიტალის ფორმირების შესახებ“ საქართველოს მთავრობის 2011 წლის 2 ივნისის №230 დადგენილებით დამტკიცებული წესდების პირველი მუხლის მე-7 პუნქტის „ბ“ ქვეპუნქტისა და მე-3 მუხლის პირველი პუნქტის შესაბამისად, სს „საპარტნიორო ფონდმა“, საქართველოს ეკონომიკისა და მდგრადი განვითარების სამინისტროს სისტემაში შემავალი სსიპ – სახელმწიფო ქონების ეროვნული სააგენტოს მიმართვის საფუძველზე, უზრუნველყოს ანაკლიაში ღრმაწყლოვანი ნავსადგურის მშენებლობის, განვითარებისა და ოპერირების პროექტის მიზნებისათვის ანაკლიაში პროექტის ზემოქმედების ქვეშ მყოფ პირებზე შესაბამისი საკომპენსაციო თანხების გადახდა ამავე სააგენტოს მიერ მითითებულ ანგარიშებზე, სს „საპარტნიორო ფონდის“ კაპიტალში ამ განკარგულების პირველი და მე-2 პუნქტების საფუძველზე განხორციელებული ფულადი შენატანების ფარგლებში.

4. საქართველოს ზოგადი ადმინისტრაციული კოდექსის 61-ე მუხლის შესაბამისად, ძალადაკარგულად გამოცხადდეს „სსიპ – სახელმწიფო ქონების ეროვნული სააგენტოსა და სს „საპარტნიორო ფონდის“ მიერ გასატარებელ რიგ ღონისძიებათა შესახებ“ საქართველოს მთავრობის 2016 წლის 22 აპრილის №679 განკარგულება.

პრემიერ-მინისტრი გიორგი კვირიკაშვილი