ქალაქ ფოთის მუნიციპალიტეტისათვის დროებითი ფინანსური დახმარების გამოყოფის შესახებ

საქართველოს მთავრობის

განკარგულება №200

2017 წლის 9 თებერვალი

ქ. თბილისი

ქალაქ ფოთის მუნიციპალიტეტისათვის დროებითი ფინანსური დახმარების გამოყოფის შესახებ

1. ცნობად იქნეს მიღებული, რომ:

ა) საქართველოს კანონმდებლობით დადგენილი წესის შესაბამისად, ქ. ფოთის მუნიციპალიტეტისათვის „საქართველოს 2017 წლის სახელმწიფო ბიუჯეტის შესახებ“ საქართველოს კანონით გათანაბრებითი ტრანსფერი გათვალისწინებული არ არის;

ბ) საქართველოს საგადასახადო კოდექსის მიხედვით გადასახადის გადახდისათვის განსაზღვრული ვადების გათვალისწინებით, ქალაქ ფოთის მუნიციპალიტეტის მიერ 2017 წლის პირველი კვარტალის რესურსი საკმარისი არ არის მუნიციპალიტეტის მიმდინარე ვალდებულებების დასაფინანსებლად;

გ) „ქალაქ ფოთის მუნიციპალიტეტის მერისათვის სესხის აღების თაობაზე თანხმობის მიცემის და გასატარებელი ღონისძიებების შესახებ“ ქ. ფოთის მუნიციპალიტეტის საკრებულოს 2017 წლის 26 იანვრის №3/4 განკარგულებით ქ. ფოთის მუნიციპალიტეტის მერს მიეცა თანხმობა, დააყენოს საკითხი საქართველოს მთავრობის წინაშე 2 300 000 (ორი მილიონ სამასი ათასი) ლარის უპროცენტო სესხის აღების თაობაზე.

2. საქართველოს ორგანული კანონის „ადგილობრივი თვითმმართველობის კოდექსი“ მე-100 მუხლის მე-3 პუნქტისა და საქართველოს საბიუჯეტო კოდექსის 21-ე მუხლის მე-2 ნაწილის შესაბამისად, უფლება მიეცეს ქალაქ ფოთის მუნიციპალიტეტს მოკლევადიანი სესხის აღების თაობაზე.

3. ქალაქ ფოთის მუნიციპალიტეტის მიერ 2017 წლის ბიუჯეტით გათვალისწინებული ღონისძიებების შეუფერხებელი დაფინანსების მიზნით, საქართველოს ფინანსთა სამინისტრომ „საქართველოს 2017 წლის სახელმწიფო ბიუჯეტის შესახებ“ საქართველოს კანონის მე-16 მუხლის მე-5 პუნქტის შესაბამისად, ქალაქ ფოთის მუნიციპალიტეტს სესხის სახით გამოუყოს 2 300 000 (ორი მილიონ სამასი ათასი) ლარი შემდეგი პირობებით:

ა) სესხი გაიცეს სესხის მოთხოვნის უზრუნველყოფის საშუალების გარეშე;

ბ) სესხით სარგებლობის წლიური განაკვეთი განისაზღვროს ნული პროცენტით;

გ) სესხით სარგებლობის ვადა განისაზღვროს არაუგვიანეს 2017 წლის 1 აგვისტოთი.

4. ამ განკარგულების შესრულების კონტროლი განახორციელოს საქართველოს ფინანსთა სამინისტრომ.

პრემიერ - მინისტრი                                           გიორგი კვირიკაშვილი