სახელმწიფო საკუთრებაში არსებული უძრავი და მოძრავი ქონების სააქციო საზოგადოება „თელასისათვის“ პირდაპირი მიყიდვის ფორმით პრივატიზების შესახებ

საქართველოს მთავრობის

განკარგულება №17

2017 წლის 11 იანვარი

ქ. თბილისი

სახელმწიფო საკუთრებაში არსებული უძრავი და მოძრავი ქონების სააქციო საზოგადოება „თელასისათვის“ პირდაპირი მიყიდვის ფორმით პრივატიზების შესახებ

1. „სახელმწიფო ქონების შესახებ“ საქართველოს კანონის მე-18 მუხლის მე-3 პუნქტისა და 29-ე მუხლის მე-3 პუნქტის შესაბამისად, სახელმწიფო საკუთრებაში არსებული, ქ. თბილისში, ალექსიძის ქუჩა №1-ში (ნაკვ. 40/014) მდებარე 58 კვ. მ არასასოფლო-სამეურნეო დანიშნულების მიწის ნაკვეთი და მასზე განთავსებული შენობა-ნაგებობა №1 (მიწის (უძრავი ქონების) საკადასტრო კოდი: №01.10.13.040.103) და ამ განკარგულების დანართში მითითებული მოძრავი ქონება პირდაპირი მიყიდვის ფორმით, 1 (ერთი) ლარად, საკუთრებაში გადაეცეს სს „თელასს“ (ს/კ: 202052580).

2. საპრივატიზებო პირობებად განისაზღვროს:

ა) საპრივატიზებო თანხის გადახდა შესაბამისი ხელშეკრულების გაფორმებიდან 1 (ერთი) თვის ვადაში;

ბ) შპს „საქსპეცტრანსის“ (ს/კ: 205064446) მიმართ არსებული ელექტროენერგიის დავალიანებისა (125 798.91 (ას ოცდახუთი ათას შვიდას ოთხმოცდათვრამეტი ლარი და ოთხმოცდათერთმეტი თეთრი) ლარის ოდენობით) და სსიპ − ივანე ჯავახიშვილის სახელობის თბილისის სახელმწიფო უნივერსიტეტის დამოუკიდებელი სამეცნიერო-კვლევითი ერთეულის − მიხეილ ნოდიას სახელობის გეოფიზიკის ინსტიტუტის (ს/კ: 204864548) მიმართ არსებული ელექტროენერგიის დავალიანების (33 474.31 (ოცდაცამეტი ათას ოთხას სამოცდათოთხმეტი ლარი და ოცდათერთმეტი თეთრი) ლარის ოდენობით) მოთხოვნაზე წერილობით უარის თქმა.

3. საქართველოს ეკონომიკისა და მდგრადი განვითარების სამინისტროს სისტემაში შემავალმა საჯარო სამართლის იურიდიულმა პირმა − სახელმწიფო ქონების ეროვნულმა სააგენტომ, ამ განკარგულების შესრულების მიზნით, განახორციელოს კანონმდებლობით გათვალისწინებული შესაბამისი ღონისძიებები.

პრემიერ-მინისტრი გიორგი კვირიკაშვილი