„სახელმწიფო ქონების შპს „ალიანს მედი +“-ისათვის პირდაპირი მიყიდვის ფორმით პრივატიზების შესახებ“ საქართველოს პრეზიდენტის 2012 წლის 30 ივლისის №30/07/03 განკარგულებისაგან განსხვავებული პირობების დადგენისა და შპს „ახალი კლინიკის“ საქმიანობის ხელშესაწყობად რიგ ღონისძიებათა განხორციელების შესახებ

საქართველოს მთავრობის

განკარგულება №2658

2016 წლის 26 დეკემბერი

ქ. თბილისი

„სახელმწიფო ქონების შპს „ალიანს მედი +“-ისათვის პირდაპირი მიყიდვის ფორმით პრივატიზების შესახებ“ საქართველოს პრეზიდენტის 2012 წლის 30 ივლისის №30/07/03 განკარგულებისაგან განსხვავებული პირობების დადგენისა  და შპს „ახალი კლინიკის“ საქმიანობის ხელშესაწყობად რიგ ღონისძიებათა განხორციელების  შესახებ

1. „სახელმწიფო ქონების შესახებ“ საქართველოს კანონის 49¹ მუხლის პირველი პუნქტისა და „სახელმწიფო ქონების შესახებ“ საქართველოს კანონში ცვლილების შეტანის თაობაზე“ 2013 წლის 6 სექტემბრის №1037-Iს საქართველოს კანონის მე-2 მუხლის პირველი პუნქტის  შესაბამისად, დადგინდეს „სახელმწიფო ქონების შპს „ალიანს მედი +“-ისათვის პირდაპირი მიყიდვის ფორმით პრივატიზების შესახებ“ საქართველოს პრეზიდენტის 2012 წლის 30 ივლისის №30/07/03 განკარგულების მე-2 პუნქტის „ბ“ და „გ“ ქვეპუნქტებით დადგენილისაგან განსხვავებული შემდეგი საპრივატიზებო პირობები:

ა)  „სახელმწიფო ქონების შპს „ალიანს მედი +“-ისათვის პირდაპირი მიყიდვის ფორმით პრივატიზების შესახებ“ საქართველოს პრეზიდენტის 2012 წლის 30 ივლისის №30/07/03 განკარგულებით გათვალისწინებულ ან/და ს/კ: 68.10.45.028 კოდით რეგისტრირებულ უძრავ ქონებაზე,  პირადად ან/და მესამე პირ(ებ)ის მეშვეობით, „ჯანმრთელობის დაზღვევის სახელმწიფო პროგრამების ფარგლებში 0-5 წლის (ჩათვლით) ასაკის ბავშვების, 60 წლის და ზემოთ ასაკის ქალების და 65 წლის და ზემოთ ასაკის მამაკაცების (საპენსიო ასაკის მოსახლეობა), სტუდენტების, შეზღუდული შესაძლებლობის მქონე ბავშვთა და მკვეთრად გამოხატული შეზღუდული შესაძლებლობის მქონე პირთა ჯანმრთელობის დაზღვევის მიზნით გასატარებელი ღონისძიებებისა და სადაზღვევო ვაუჩერის პირობების განსაზღვრის შესახებ“ საქართველოს მთავრობის 2012 წლის 7 მაისის №165 დადგენილების დანართი №5-ით დადგენილი სამედიცინო ცენტრის შექმნა ქარელის მუნიციპალიტეტში, ამავე დადგენილებით განსაზღვრულ ვადაში;

ბ) ამ პუნქტის „ა“ ქვეპუნქტით განსაზღვრული ვალდებულების შესრულებიდან 7 (შვიდი) წლის განმავლობაში ქარელის მუნიციპალიტეტში შესაბამისი ჯანმრთელობის დაცვის სახელმწიფო პროგრამის ფარგლებში ამ განკარგულების დანართით გათვალისწინებული ბაზისური სამედიცინო სერვისების უწყვეტობის უზრუნველყოფა.

2. „სახელმწიფო ქონების შესახებ“ საქართველოს კანონის 49¹ მუხლის პირველი პუნქტის შესაბამისად, შპს „ახალი კლინიკა“ (ს/კ: 404980231, შპს „ალიანს მედი +“-ის (ს/კ: 404875284) უფლებამონაცვლე) გათავისუფლდეს საქართველოს ეკონომიკისა და მდგრადი განვითარების სამინისტროს (უფლებამონაცვლე − საქართველოს ეკონომიკისა და მდგრადი განვითარების სამინისტროს სისტემაში შემავალი სსიპ − სახელმწიფო ქონების ეროვნული სააგენტო, შემდგომში − სააგენტო) , საქართველოს შრომის, ჯანმრთელობისა და სოციალური დაცვის სამინისტროსა და შპს „ალიანს მედი +“-ს (ს/კ: 404875284) შორის 2012 წლის 31 ივლისს გაფორმებული ნასყიდობის ხელშეკრულების საფუძველზე, ამ განკარგულების პირველი პუნქტის შესაბამისად, ცვლილების ხელშეკრულების გაფორმებამდე დაკისრებული/დასაკისრებელი პირგასამტეხლოსგან, იმ პირობით, რომ შპს „ახალი კლინიკა“  შეასრულებს ამ განკარგულების პირველი პუნქტით დადგენილ საპრივატიზებო პირობებს.

3. საქართველოს ეკონომიკისა და მდგრადი განვითარების სამინისტროს სისტემაში შემავალმა საჯარო სამართლის იურიდიულმა პირმა − სახელმწიფო ქონების ეროვნულმა სააგენტომ და საქართველოს შრომის, ჯანმრთელობისა და სოციალური დაცვის სამინისტრომ, ამ განკარგულების შესრულების მიზნით, განახორციელონ კანონმდებლობით გათვალისწინებული შესაბამისი ღონისძიებები.

პრემიერ-მინისტრი                                                            გიორგი კვირიკაშვილი

დანართი

ბაზისური სამედიცინო სერვისების ნუსხა

1. სოფლების გარდა, სხვა ადმინისტრაციულ-ტერიტორიულ ერთეულებში პირველადი ჯანმრთელობის დაცვის მომსახურების, მ.შ.  დაავადებათა ადრეული გამოვლენის, სკრინინგის და ფსიქიატრიული დაავადებების ამბულატორიული მართვისა და, საჭიროების შემთხვევაში, შესაბამის დაწესებულებაში რეფერალის უზრუნველყოფა.

2. ანტენატალური მეთვალყურეობის უზრუნველყოფა, სულ მცირე, მუნიციპალურ დონეზე და, საჭიროების შემთხვევაში, მაღალი რისკის მქონე ორსულების რეფერალი.

3. იმუნოპროფილაქტიკის წარმოება იმუნიზაციის ეროვნული კალენდრის მიხედვით.

4. ტუბერკულოზის ამბულატორიული ან სტაციონარული მართვა.

5. ანტირაბიული ვაქცინაცია და სპეციფიკური შრატებით უზრუნველყოფა.

6. ინფექციური დაავადებების მართვის უზრუნველყოფა ამბულატორიულ ან სტაციონარულ დონეზე.

7. ონკოლოგიური დაავადებების დიაგნოსტიკისა და მართვის ხელმისაწვდომობის უზრუნველყოფა.

8. სამედიცინო ტრანსპორტირება.