ხარაგაულის მუნიციპალიტეტის საკრებულოს 2014 წლის 14 ივლისის №17 დადგენილებაში „ხარაგაულის მუნიციპალიტეტის გამგეობის დებულების დამტკიცების შესახებ“ ცვლილების შეტანის თაობაზე

 ხარაგაულის მუნიციპალიტეტის საკრებულო ადგენს:

1. დადგენილებით  დამტკიცებულ №1 დანართის  მე-7 მუხლი  ჩამოყალიბდეს  ახალი რედაქციით:

,,მუხლი 7.  გამგებლის პირველი მოადგილე  და  გამგებლის მოადგილე

1.გამგებელს ჰყავს პირველი მოადგილე და ერთი მოადგილე,  რომელთაც თანამდებობაზე ნიშნავს და თანამდებობიდან ათავისუფლებს  გამგებელი ამ დებულებით დადგენილი წესითა და მოქმედი კანონმდებლობის შესაბამისად.

2.გამგებლის პირველი მოადგილე ასრულებს გამგებლის მოვალეობებს გამგებლის არყოფნისას, მის მიერ უფლებამოსილების განხორციელების  შეუძლებლობის შემთხვევაში ან თანამდებობიდან მისი გადადგომისას  ან/და გადაყენებისას.

3.გამგებლის პირველი მოადგილე და მოადგილე  ფუნქციათა გადანაწილების შესაბამისად ხელმძღვანელობენ გამგეობის  უფლებამოსილებისთვის   მიკუთვნებულ   დარგს, ორგანიზებას უწევენ და აკონტროლებენ  მუნიციპალიტეტის   ადმინისტრაციულ-სამართლებრივი აქტებისა და გამგებლის დავალებების შესრულებას, გამგეობის დებულების შესაბამისად, ასრულებენ გამგებლის ცალკეულ  დავალებებს, თავისი უფლებამოსილების  ფარგლებში გამოსცემენ ინდივიდუალურ ადმინისტრაციულ-სამართლებრივ აქტებს.

4.გამგებლის  პირველი მოადგილე და მოადგილე ანგარიშვალდებული არიან გამგებლის წინაშე.“.

2.დადგენილებით  დამტკიცებული  №1 დანართის  მე-11 მუხლის  მე-5 პუნქტი ჩამოყალიბდეს ახალი  რედაქციით:

,,5. ჯანმრთელობის, სოციალური დაცვისა და დასაქმების  მუნიციპალური პროგრამების  შემუშავება და განხორციელება. უსახლკაროთა  რეგისტრაცია და მათი თავშესაფრით უზრუნველყოფის  ხელშეწყობა. მუნიციპალიტეტში  მცხოვრებ ბავშვებზე ძალადობის ეჭვის გაჩენის შემთხვევაში, ადგილზე ამოწმებს ბავშვებზე ძალადობასთან დაკავშირებულ გადაუდებელ შემთხვევებს, შეისწავლის ბავშვების მდგომარეობას და ახდენს ბავშვზე ძალადობის ნიშნების იდენტიფიკაციას, შეფასების  შედეგების ზუსტ დოკუმენტირებას და სამედიცინო  დახმარების  უზრუნველყოფას,  ხოლო საფუძვლიანი ეჭვის არსებობისას, სავალდებულო  წესით  აგზავნის  შეტყობინებას  სააგენტოსა და პოლიციაში.“.

3.დადგენილებით დამტკიცებულ №1 დანართის მე-13 მუხლის მე-4  პუნქტს დაემატოს  ,,ნ“ ქვეპუნქტი და ჩამოყალიბდეს  შემდეგი  რედაქციით:

,,ნ) ,,სახელმწიფო პროექტის ფარგლებში მიწის ნაკვეთებზე უფლებათა სისტემური და სპორადული რეგისტრაციის სპეციალური წესისა და საკადასტრო მონაცემების სრულყოფის შესახებ“ საქართველოს კანონის შესაბამისად სახელმწიფო პროექტის  განხორციელების პროცესში  საჭიროების შემთხვევაში, ინდივიდუალური ადმინისტრაციულ-სამართლებრივი აქტით ადგენს უფლების დამადასტურებელი დოკუმენტით გათვალისწინებული მიწის ნაკვეთის ან/და საჯარო რეესტრში დაუზუსტებელი საკადასტრო მონაცემებით რეგისტრირებული მიწის ნაკვეთის და მიწის ნაკვეთის საკადასტრო აგეგმვით/აზომვით ნახაზზე ასახული მიწის ნაკვეთის იდენტურობას, გარდა იმ შემთხვევისა, როცა სარეგისტრაციო დოკუმენტაციის საფუძველზე უტყუარად დგინდება მიწის ნაკვეთის ფაქტობრივი მდებარეობა.“.

4. დადგენილებით დამტკიცებულ N1 დანართის მე-16  მუხლის მე-4  და   მე-5 პუნქტები  ჩამოყალიბდეს  ახალი  რედაქციით:

,,4. გამგებლის პირველ მოადგილეს, გამგებლის მოადგილეს და სტრუქტურული ერთეულების ხელმძღვანელთა სამუშაოთა აღწერილობებს განსაზღვრავს და ამტკიცებს გამგებელი, ხოლო გამგეობის სხვა საჯარო მოსამსახურეთა სამუშაოთა აღწერილობებს ადგენს შესაბამისი  სტრუქტურული ერთეულის ხელმძღვანელი და მისი წარდგინებით ამტკიცებს გამგებელი.“.

5.მინიმალურ და დამატებით  საკვალიფიკაციო მოთხოვნებს  ამტკიცებს გამგებელი.“.