„საქართველოს შეიარაღებული ძალების გენერალური შტაბის სამხედრო პოლიციის დეპარტამენტის დებულების დამტკიცების შესახებ’’ საქართველოს თავდაცვის მინისტრის 2015 წლის 23 თებერვლის №7 ბრძანებაში ცვლილების შეტანის თაობაზე

1. მე-4 მუხლის პირველი პუნქტის „ს“ქვეპუნქტი ჩამოყალიბდეს შემდეგი რედაქციით:

„ს) საგანგებო დავალებების შემთხვევაში, სამხედრო ობიექტების და კანონმდებლობით დადგენილი წესით – სტრატეგიული დანიშნულების სამოქალაქო ობიექტების უსაფრთხოების ღონისძიებების განხორციელებაში მონაწილეობა;“.

2. მე-5 მუხლის პირველ პუნქტს დაემატოს „ნ“ ქვეპუნქტი შემდეგი რედაქციით:

„ნ) საპატრულო ღონისძიებათა კოორდინაციის სამმართველო.“.

3. მე-6 მუხლის მე-2 პუნქტის „მ“-„რ“ ქვეპუნქტები ამოღებულ იქნეს.

4. მე-6 მუხლს დაემატოს მე-12 პუნქტი შემდეგი რედაქციით:

„12. საპატრულო ღონისძიებათა კოორდინაციის სამმართველოს ფუნქციებია:    

ა) სამხედრო პოლიციის საპატრულო ქვედანაყოფების მიერ საქართველოს საკანონმდებლო და კანონქვემდებარე ნორმატიული აქტებით გათვალისწინებული მოთხოვნების შესრულებაზე მონიტორინგის განხორციელება;

ბ) საპატრულო ქვედანაყოფების მიერ პატრულირების განხორციელების და სამხედრო ობიექტებზე საკონტროლო-გამშვები პუნქტების ფუნქციონირების ხარისხის შემოწმება, შედეგების დასკვნის სახით ჩამოყალიბება  და ხელმძღვანელობისათვის წარდგენა;

გ) საპატრულო ქვედანაყოფების მოსამსახურეთა მიერ ჩადენილი დისციპლინური გადაცდომების ფაქტების შეჯამება, სათანადო ინფორმაციის მომზადება, ასევე საპატრულო ქვედანაყოფების მიერ გამოვლენილ ადმინისტრაციულ სამართლადარღვევათა შესახებ მონაცემების მიღება და მათზე შესაბამისი სამართლებრივი რეაგირების მონიტორინგი;

დ) საპატრულო ქვედანაყოფების მიერ განსახორციელებელი საპატრულო ღონისძიებების კოორდინაცია, აგრეთვე მათთვის მეთოდური და პრაქტიკული დახმარებების გაწევა;

ე) საპატრულო ღონისძიებების  სრულყოფილად  განხორციელების ხელისშემშლელი გარემოებების  გამოვლენა  და მათ აღმოსაფხვრელად შესაბამისი რეკომენდაციების მომზადება.“.