„ბრალდებულთა/მსჯავრდებულთა სუიციდის პრევენციის პროგრამის დამტკიცების შესახებ“ საქართველოს სასჯელაღსრულებისა და პრობაციის მინისტრის 2016 წლის 11 თებერვლის N13 ბრძანებაში ცვლილების შეტანის თაობაზე

1. მე-8 მუხლის პირველ პუნქტს დაემატოს შემდეგი შინაარსის „ი“ - „ლ“ ქვეპუნქტები:

„ი) პროგრამაში ჩართული ბრალდებულის/მსჯავრდებულის სხვა დაწესებულებაში გადაყვანის შესახებ ინფორმაციის მიღებისთანავე, მაგრამ არაუგვიანეს მომდევნო სამუშაო დღისა, ვალდებულია მიმღები დაწესებულების ადგილობრივ კოორდინატორს მიაწოდოს ინფორმაცია სუიციდის პრევენციის პროგრამაში ჩართული ბრალდებულის/მსჯავრდებულის გადაყვანის შესახებ;

კ) მსჯავრდებულის თანხმობის შემთხვევაში, საბჭოს მეშვეობით უზრუნველყოფს მსჯავრდებულის სუიციდის პრევენციის პროგრამაში ჩართულობის შესახებ ინფორმაციის მიწოდებას სსიპ – არასაპატიმრო სასჯელთა აღსრულებისა და პრობაციის ეროვნული სააგენტოსათვის (შემდგომში – პრობაციის ეროვნული სააგენტო), თუკი დაწესებულებიდან გათავისუფლებული მსჯავრდებული სასჯელის შემდგომი მოხდის მიზნით უნდა გამოცხადდეს პრობაციის ეროვნული სააგენტოს შესაბამის ტერიტორიულ ორგანოში, ხოლო სსიპ – დანაშაულის პრევენციის ცენტრისათვის - თუკი მსჯავრდებული მთლიანად თავისუფლდება სასჯელის შემდგომი მოხდისგან;

ლ) ამ პროგრამის მე-9 მუხლის 5¹ პუნქტით გათვალისწინებულ შემთხვევაში, გუნდის გადაწყვეტილებას სათვალთვალო ფანჯრის მეშვეობით შემოწმების პერიოდულობის განსაზღვრის შესახებ დაუყოვნებლივ აცნობებს შესაბამისი დაწესებულების დირექტორს და სამინისტროს პენიტენციური დეპარტამენტის დირექტორს.“.

2. მე-9 მუხლს დაემატოს შემდეგი შინაარსის 5¹ პუნქტი:

„5¹. ამ მუხლის მე-5 პუნქტით გათვალისწინებული ღონისძიებების ფარგლებში, გუნდი უფლებამოსილია განსაზღვროს პროგრამაში ჩართული იმ ბრალდებულის/მსჯავრდებულის სათვალთვალო ფანჯრის მეშვეობით შემოწმების პერიოდულობა, რომლის მიმართაც არ ხორციელდება ელექტრონული საშუალებით მეთვალყურეობა და კონტროლი. ბრალდებულის/მსჯავრდებულის სათვალთვალო ფანჯრის მეშვეობით შემოწმებას უზრუნველყოფს დაწესებულების სამართლებრივი რეჟიმის განყოფილების მოსამსახურე/სექტორში სამართლებრივი რეჟიმის დაცვაზე პასუხისმგებელი პირი.“.

3. მე-9 მუხლის შემდეგ დაემატოს შემდეგი შინაარსის 9¹ მუხლი:

„მუხლი 9¹. დაწესებულების დირექტორის მოვალეობები

1. პროგრამაში ჩართული ბრალდებულის/მსჯავრდებულის სხვა დაწესებულებაში გადაყვანისას, დაწესებულების დირექტორი ვალდებულია, მიმღებ დაწესებულებას მიაწოდოს ინფორმაცია ბრალდებულის/მსჯავრდებულის სუიციდის პრევენციის პროგრამაში ჩართულობის შესახებ.

2. პროგრამაში ჩართული ბრალდებულის/მსჯავრდებულის საექსპერტო დაწესებულებაში ან სამოქალაქო სექტორის საავადმყოფოში გაყვანა/გადაყვანისას, დაწესებულების დირექტორი უზრუნველყოფს სამინისტროს პენიტენციური დეპარტამენტის გარე დაცვისა და ბადრაგირების მთავარი სამმართველოსათვის ბრალდებულის/მსჯავრდებულის სუიციდის პრევენციის პროგრამაში ჩართულობის შესახებ ინფორმაციის მიწოდებას.“.

4. მე-10 მუხლს დაემატოს შემდეგი შინაარსის 1¹ პუნქტი:

„1¹. ფსიქოლოგი ბრლადებულის/მსჯავრდებულის მულტიდისციპლინური დახმარების საჭიროების განსაზღვრასა და მისი პროგრამაში ჩართვის თაობაზე გადაწყვეტილების მიღებისას ავსებს დანართი №5-ით გათვალისწინებულ ფორმას.“.

5. დანართი №4 ჩამოყალიბდეს თანდართული რედაქციით. 

6. დანართი №4-ის შემდეგ დაემატოს შემდეგი შინაარსის დანართი №5.