სახელმწიფო საკუთრებაში არსებული ქონების შპს „ინტერპლასტისათვის“ პირდაპირი მიყიდვის ფორმით პრივატიზების შესახებ

საქართველოს მთავრობის

განკარგულება №2218

2016 წლის 19 ოქტომბერი

ქ. თბილისი

სახელმწიფო საკუთრებაში არსებული ქონების შპს „ინტერპლასტისათვის“ პირდაპირი მიყიდვის ფორმით პრივატიზების შესახებ

1. „სახელმწიფო ქონების შესახებ“ საქართველოს კანონის მე-18 მუხლის მე-3 პუნქტის, 29-ე მუხლის მე-3 პუნქტისა და „მხარეთა მორიგების საფუძველზე საქმის წარმოების შეწყვეტის შესახებ“ თბილისის საქალაქო სასამართლოს 2016 წლის 7 ოქტომბრის განჩინების (საქმე: №2/24985-16) შესაბამისად, სახელმწიფო საკუთრებაში არსებული, ქალაქ თბილისში, სოფელ დიდ ლილოში მდებარე 55800.00 კვ.მ არასასოფლო-სამეურნეო დანიშნულების მიწის ნაკვეთი და მასზე განთავსებული №1-№48 შენობა-ნაგებობები (მიწის (უძრავი ქონების) საკადასტრო კოდი: №81.08.18.286) და ამ განკარგულების დანართით გათვალისწინებული მოძრავი ქონება პირდაპირი მიყიდვის ფორმით, 1 (ერთი) ლარად, საკუთრებაში გადაეცეს შპს „ინტერპლასტს“ (ს/კ: 205187536).

2. ამ განკარგულების პირველი პუნქტით გათვალისწინებული ქონების საპრივატიზებო პირობებად განისაზღვროს:

ა) საპრივატიზებო თანხის გადახდა შესაბამისი ხელშეკრულების გაფორმებიდან 1 (ერთი) თვის ვადაში;

ბ) ამავე პუნქტით განსაზღვრულ უძრავ ქონებაზე, შპს „ინტერპლასტის“ საკუთრების უფლების რეგისტრაციისთანავე, თბილისის საქალაქო სასამართლოს 2013 წლის 21 თებერვლის გადაწყვეტილებით (საქმე: №2/24985-16) ნაკისრი ვალდებულების უზრუნველსაყოფად, ამავე უძრავი ქონების სს „ბანკი ქართუს“ სასარგებლოდ იპოთეკით დატვირთვა და ამავე პუნქტით გათვალისწინებულ მოძრავ ქონებაზე სს „ბანკი ქართუს“ გირავნობის უფლების რეგისტრაცია შესაბამისი ხელშეკრულების გაფორმებიდან არა უმეტეს 10 (ათი) დღის ვადაში.

3. საქართველოს ეკონომიკისა და მდგრადი განვითარების სამინისტროს სისტემაში შემავალმა საჯარო სამართლის იურიდიულმა პირმა - სახელმწიფო ქონების ეროვნულმა სააგენტომ, ამ განკარგულების შესრულების მიზნით, უზრუნველყოს კანონმდებლობით გათვალისწინებული ღონისძიების განხორციელება.

პრემიერ-მინისტრი გიორგი კვირიკაშვილი