საქართველოს პარლამენტის 2016 წლის 8 ოქტომბრის არჩევნებისა და ადგილობრივი თვითმმართველობის აღმასრულებელი და წარმომადგენლობითი ორგანოების რიგგარეშე/შუალედური არჩევნების ერთდროულად გამართვის გამო, კანონით განუსაზღვრელი ზოგიერთი საარჩევნო პროცედურისა და ვადის განსაზღვრის შესახებ

საქართველოს ორგანული კანონით „საქართველოს საარჩევნო კოდექსი“ არ არის გათვალისწინებული და განსაზღვრული, თუ, როგორ განისაზღვრება საარჩევნო სუბიექტების რიგითი ნომრები თუ ერთდროულად ტარდება საქართველოს პარლამენტის და ადგილობრივი თვითმმართველობის აღმასრულებელი და წარმომადგენლობითი ორგანოების რიგგარეშე/შუალედური არჩევნები. შესაბამისად, აუცილებელია საქართველოს ორგანული კანონით „საქართველოს საარჩევნო კოდექსი“ განუსაზღვრელი 2016 წლის 8 ოქტომბრის საქართველოს პარლამენტის არჩევნებისა და ადგილობრივი თვითმმართველობის აღმასრულებელი და წარმომადგენლობითი ორგანოების რიგგარეშე/შუალედური არჩევნების ჩატარებისათვის კანონით განუსაზღვრელი ზოგიერთი საარჩევნო პროცედურისა და ვადის განსაზღვრა.

წინასაარჩევნო კამპანიის ჩატარებისას არჩევისთვის ხელის შეწყობის და ამომრჩეველთა მხარდაჭერის მოპოვების მიზნით საარჩევნო სუბიექტები იყენებენ მათთვის საქართველოს ორგანული კანონით „საქართველოს საარჩევნო კოდექსი“ დადგენილი წესით განსაზღვრულ რიგით ნომერს, კერძოდ, რიგით ნომერს გამოსახავენ მათ მიერ დამზადებულ სააგიტაციო მასალაზე და აჩვენებენ პოლიტიკურ/წინასაარჩევნო რეკლამაში. რაც მნიშვნელოვანია, საარჩევნო სუბიექტების რიგითი ნომრები აღინიშნება საარჩევნო ბიულეტენის წინა გვერდზე.

საქართველოს ცენტრალური საარჩევნო კომისიის მიერ ამომრჩევლის მიერ საარჩევნო ბიულეტენის შევსების წესი განსაზღვრულია შემდეგნაირად: ამომრჩეველი საარჩევნო ბიულეტენის შევსებისას შემოხაზავს მისთვის სასურველი საარჩევნო სუბიექტის ნომერს.

ამრიგად, ამომრჩევლის მიერ ნების გამოვლენის, საარჩევნო სუბიექტებისთვის წინასაარჩევნო კამპანიის ჩატარების და კენჭისყრის და არჩევნების შედეგების შეჯამების ხელშეწყობის მიზნით, აუცილებელია ცესკოს დადგენილებით განისაზღვროს  2016 წლის 8 ოქტომბერს ერთდროულად გასამართი არჩევნებისას რიგითი ნომრის განსაზღვრის წესი და საარჩევნო სუბიექტებს მიეცეთ უფლება ისარგებლონ ერთი და იმავე რიგითი ნომრით მათი სურვილის შემთხვევაში.

საქართველოს ორგანული კანონის „საქართველოს საარჩევნო კოდექსი“ მე-14 მუხლის მე-3 პუნქტის, 30-ე მუხლის მე-2 პუნქტის პირველი წინადადებისა და 77-ე მუხლის მე-5 პუნქტის საფუძველზე, საქართველოს ცენტრალური საარჩევნო კომისია ადგენს:

საოლქო საარჩევნო კომისიაში რიგითი ნომრის მისანიჭებლად გასამართ წილისყრაში მონაწილეობს, საქართველოს პარლამენტის არჩევნებში პარტიების/ბლოკებისათვის მინიჭებული ბოლო რიგითი ნომრის მომდევნო იმდენი რიგითი ნომერი, რამდენი საინიციატივო ჯგუფის მიერ წარდგენილი კანდიდატიც მონაწილეობს სამივე სახის არჩევნებში. კანონით დადგენილი წესით ჯერ რიგითი ნომრები მიენიჭებათ საინიციატივო ჯგუფების მიერ: საპარლამენტო არჩევნებისათვის წარდგენილ ყველა კანდიდატს, შემდეგ გამგებლის/მერის რიგგარეშე არჩევნებისათვის წარდგენილ კანდიდატებს და შემდეგ საკრებულოს შუალედურ არჩევნებში მონაწილე კანდიდატებს.