ა(ა)იპ - საქართველოს ფეხბურთის ფედერაციისათვის სახელმწიფო საკუთრებაში არსებული უძრავი ქონების უსასყიდლო უზუფრუქტის უფლებით გადაცემის თაობაზე თანხმობის მიცემის შესახებ

საქართველოს მთავრობის

განკარგულება №792

2016 წლის 11 მაისი

ქ. თბილისი

ა(ა)იპ - საქართველოს ფეხბურთის ფედერაციისათვის სახელმწიფო საკუთრებაში არსებული უძრავი ქონების უსასყიდლო უზუფრუქტის უფლებით გადაცემის თაობაზე თანხმობის მიცემის შესახებ

1. „სახელმწიფო ქონების შესახებ“ საქართველოს კანონის 36-ე მუხლის მე-2 პუნქტის შესაბამისად, მიეცეს თანხმობა საქართველოს ეკონომიკისა და მდგრადი განვითარების სამინისტროს სისტემაში შემავალ სსიპ – სახელმწიფო ქონების ეროვნულ სააგენტოს, რომ ა(ა)იპ - საქართველოს ფეხბურთის ფედერაციას (ს/კ: 201990079), უსასყიდლო უზუფრუქტის უფლებით, შესაბამისი ხელშეკრულების გაფორმებიდან 49 (ორმოცდაცხრა) წლის ვადით, გადასცეს ქალაქ თბილისში, დიღმის სასწ. საცდელ მეურნეობაში მდებარე 60869.00 კვ.მ არასასოფლო-სამეურნეო დანიშნულების მიწის ნაკვეთი და მასზე განთავსებული შენობა-ნაგებობები: №1 - საერთო ფართით - 4492.4 კვ.მ (მ.შ. სასარგებლო ფართი - 2795 კვ.მ, დამხმარე ფართი - 1697.4 კვ.მ) და საზაფხულო ფართით - 1227.5 კვ.მ, №2, №3 (მიწის (უძრავი ქონების) საკადასტრო კოდი: №01.72.14.009.319).

2. ამ განკარგულების პირველი პუნქტით განსაზღვრული უძრავი ქონების უსასყიდლო უზუფრუქტის უფლებით გადაცემის პირობებად განისაზღვროს:

ა) უძრავი ქონების სპორტული პროფილით ფუნქციონირების/გამოყენების უზრუნველყოფა შესაბამისი ხელშეკრულების მოქმედების განმავლობაში;

ბ) პირადად და/ან მესამე პირის მეშვეობით, უძრავ ქონებაზე არსებული ინფრასტრუქტურის უეფას მე-2 კატეგორიის დონეზე მოწყობისა და 19-წლამდელთა შორის ევროპის 2017 წლის ჩემპიონატის ფინალური ეტაპის ჩატარების მიზნით, უძრავ ქონებაზე შესაბამისი სამუშაოების ჩატარების უზრუნველყოფა (მათ შორის, განათების სისტემის დამონტაჟება);

გ) უძრავი ქონების გამოყენების უზრუნველყოფა საქართველოს ეროვნული შეჯიბრებებისა და საერთაშორისო მატჩების ჩასატარებლად;

დ) ა(ა)იპ - საქართველოს მძლეოსნობის ეროვნული ფედერაციის (ს/კ: 204896924) მიერ უძრავი ქონებით სარგებლობის უზრუნველყოფა, მასთან წინასწარ შეთანხმებული გრაფიკის შესაბამისად, უძრავ ქონებაზე განთავსებულ სპორტულ მოედანზე ეროვნული და საერთაშორისო ჩემპიონატების ჩატარების მიზნით.

3. ამ განკარგულების შესრულების მიზნით, საქართველოს ეკონომიკისა და მდგრადი განვითარების სამინისტროს სისტემაში შემავალმა სსიპ - სახელმწიფო ქონების ეროვნულმა სააგენტომ და საქართველოს სპორტისა და ახალგაზრდობის საქმეთა სამინისტრომ განახორციელონ კანონმდებლობით გათვალისწინებული შესაბამისი ღონისძიებები.

პრემიერ-მინისტრი                               გ. კვირიკაშვილი