„მზღვეველის მიმართ ფულადი ჯარიმის განსაზღვრის, დაკისრებისა და აღსრულების წესის დამტკიცების შესახებ“ საქართველოს დაზღვევის სახელმწიფო ზედამხედველობის სამსახურის უფროსის 2015 წლის 17 მარტის №02 ბრძანებაში ცვლილების შეტანის თაობაზე

„ნორმატიული აქტების შესახებ“ საქართველოს კანონის მე-20 მუხლის მე-4 პუნქტის, „დაზღვევის შესახებ“ საქართველოს კანონის 21¹ მუხლის მე-2 პუნქტის „გ“ ქვეპუნქტის და 2013 წლის 02 მაისის საქართველოს მთავრობის №102 დადგენილებით დამტკიცებული სსიპ - საქართველოს დაზღვევის სახელმწიფო ზედამხედველობის სამსახურის დებულების მე-3 მუხლის „ო“ ქვეპუნქტის და ამავე დებულების მე-4 მუხლის მე-3 პუნქტის საფუძველზე,  ვბრძანებ:

„მზღვეველის მიმართ ფულადი ჯარიმის განსაზღვრის, დაკისრებისა და აღსრულების წესის დამტკიცების შესახებ“ საქართველოს დაზღვევის სახელმწიფო ზედამხედველობის სამსახურის უფროსის 2015 წლის 17 მარტის №02 ბრძანებაში შეტანილ იქნეს შემდეგი სახის ცვლილება:
1. წესის მე-2 მუხლის მე-3 პუნქტი ჩამოყალიბდეს შემდეგი რედაქციით:
„3. საფინანსო ანგარიშგების, სხვა ფინანსური და სტატისტიკური ინფორმაციის, უკანონო შემოსავლის ლეგალიზაციის და ტერორიზმის დაფინანსების რისკის ზედამხედველობის ანგარიშგების დადგენილი ფორმითა და დადგენილ ვადებში სამსახურში წარუდგენლობის შემთხვევაში,  მზღვეველი ჯარიმდება დარღვევის თითოეულ  ფაქტზე – 3 000 (სამი ათასი) ლარის ოდენობით. ამ პუნქტის მიზნებისათვის დარღვევის თითოეულ ფაქტად მიიჩნევა მოქმედი წესით გათვალისწინებული ანგარიშგების ფორმების ერთობლიობის დადგენილი ფორმით და/ან დადგენილ ვადაში წარუდგენლობა.“.
2. წესის მე-2 მუხლის მე-4 პუნქტი ჩამოყალიბდეს შემდეგი რედაქციით:
„4. სამსახურში ფინანსური და სტატისტიკური  ანგარიშგების ფორმებში არაზუსტი ინფორმაციის წარდგენის შემთხვევაში მზღვეველი ჯარიმდება დარღვევის თითოეულ ფაქტზე 250 (ორას ორმოცდაათი) ლარის ოდენობით.“.
3. წესის მე-2 მუხლს დაემატოს შემდეგი შინაარსის მე-12 პუნქტი და  ჩამოყალიბდეს შემდეგი რედაქციით:
„12. სამსახურში, გარდა ამ წესის მე-2 მუხლის მე-4  პუნქტით გათვალისწინებული შემთხვევისა, სხვა არაზუსტი ინფორმაციის წარდგენის შემთხვევაში მზღვეველი ჯარიმდება 500 (ხუთასი) ლარის ოდენობით.".

ეს ბრძანება ამოქმედდეს გამოქვეყნებისთანავე.