„სახელმწიფო დაცვის სპეციალური სამსახურის დებულების დამტკიცების თაობაზე“ საქართველოს მთავრობის 2013 წლის 28 მარტის №71 დადგენილებაში ცვლილების შეტანის შესახებ

1. მე-8 მუხლის:  

ა) „ე¹“  ქვეპუნქტი ჩამოყალიბდეს შემდეგი რედაქციით:

„ე¹) საქართველოს პრეზიდენტთან შეთანხმებით, თანამდებობაზე ნიშნავს და თანამდებობიდან ათავისუფლებს  მისი და მისი ოჯახის წევრთა მიმართ  ამ დებულების მე-16 მუხლის მე-2 პუნქტის „ა“ და „ბ“ ქვეპუნქტებით განსაზღვრული ფუნქციების უშუალოდ განმახორციელებელ მოსამსახურეებს;“;

 ბ) „ლ“ ქვეპუნქტი ჩამოყალიბდეს შემდეგი რედაქციით:

„ლ) წაახალისებს და დისციპლინურ პასუხისმგებლობას აკისრებს სამსახურის თანამშრომლებს, განსაზღვრავს დისციპლინური გადაცდომით სამსახურისთვის მიყენებული ზიანის (ზარალის) ანაზღაურების წესს.“.

2. მე-15  მუხლის „გ“  ქვეპუნქტი ამოღებულ იქნეს.

3. მე-16 მუხლის:

ა) მე-2 პუნქტი ჩამოყალიბდეს შემდეგი რედაქციით:

„2. პირადი დაცვის დეპარტამენტის ძირითადი ამოცანებია:

ა) საქართველოს პრემიერ-მინისტრის, საქართველოს პრეზიდენტის, საქართველოს პარლამენტის თავმჯდომარის და მათი ოჯახების წევრების დაცვისა და უსაფრთხოების ღონისძიებების განხორციელება;

ბ) საქართველოს პრემიერ-მინისტრის და მისი ოჯახის წევრების, საქართველოს პრეზიდენტის და მისი ოჯახის წევრების, აგრეთვე საქართველოს პარლამენტის თავმჯდომარის და მისი ოჯახის წევრების  უსაფრთხო ევაკუაცია მათი სიცოცხლისა და ჯანმრთელობის მიმართ საფრთხის არსებობის შემთხვევაში;

გ) საქართველოს მთავრობის სამართლებრივი აქტით განსაზღვრული სამსახურის სხვა დასაცავი პირების დაცვისა და უსაფრთხოების ღონისძიებების უზრუნველყოფა;

დ) 2013 წლის 17 ნოემბრის შემდგომი პერიოდიდან უფლებამოსილების ვადის გასვლის შემდეგ, საქართველოს პრემიერ-მინისტრისა და მისი ოჯახის  წევრების დაცვით უზრუნველყოფა პრემიერ-მინისტრის სიცოცხლის ბოლომდე, ქვეყნის ტერიტორიაზე, ხოლო საზღვარგარეთ ერთ თვეზე მეტი ვადით გამგზავრებისას – საქართველოს მთავრობის გადაწყვეტილებით (ეს წესი არ მოქმედებს საზღვარგარეთ სამკურნალოდ გამგზავრების შემთხვევაში);

ე) უფლებამოსილების ვადის გასვლის შემდეგ  საქართველოს პრეზიდენტის და მისი ოჯახის წევრების დაცვით უზრუნველყოფა პრეზიდენტის სიცოცხლის ბოლომდე,  ქვეყნის ტერიტორიაზე, ხოლო საზღვარგარეთ ერთ თვეზე მეტი ვადით გამგზავრებისას – საქართველოს მთავრობის გადაწყვეტილებით (ეს წესი არ მოქმედებს საზღვარგარეთ სამკურნალოდ გამგზავრების შემთხვევაში);

ვ) უფლებამოსილების ვადის გასვლის შემდეგ საქართველოს პარლამენტის თავმჯდომარის (ახალი მოწვევის პარლამენტის უფლებამოსილების ვადით) დაცვით უზრუნველყოფა ქვეყნის ტერიტორიაზე, ხოლო საზღვარგარეთ ერთ თვეზე მეტი ვადით გამგზავრებისას – საქართველოს მთავრობის გადაწყვეტილებით (ეს წესი არ მოქმედებს საზღვარგარეთ სამკურნალოდ გამგზავრების შემთხვევაში);

 ზ)  თავისი კომპეტენციის ფარგლებში, საქართველოს მთავრობის მიერ დამტკიცებული ნუსხის შესაბამისად, საქართველოს საკანონმდებლო, აღმასრულებელი და სასამართლო ხელისუფლების უმაღლესი თანამდებობის პირებისა და სხვა პირების დაცვითი ღონისძიებების განხორციელება;

თ) იმ პირთა დაცვითი ღონისძიებებით უზრუნველყოფა, რომლებსაც საქართველოს მთავრობის გადაწყვეტილებით დაენიშნებათ პერსონალური დაცვა;

ი) საქართველოში ვიზიტად მყოფი უცხო ქვეყნების სახელმწიფო მეთაურებისა და განსაკუთრებით მნიშვნელოვანი პირების დაცვითი ღონისძიებებით უზრუნველყოფა;

კ) დასაცავი პირების სიცოცხლისა და ჯანმრთელობისათვის საფრთხის შემცველ ვითარებაში მათი უსაფრთხო ევაკუაციის უზრუნველყოფა.“;

ბ) „2¹“  პუნქტი ამოღებულ იქნეს;

გ) მე-3 პუნქტს დაემატოს შემდეგი შინაარსის „დ“ ქვეპუნქტი:

 „დ) ოპერატიული ინფორმაციის ან/და სხვა ობიექტური წინაპირობების საფუძველზე, დასაცავი პირების დროებითი სამყოფელის დაცვითი ღონისძიებების განხორციელება.“.