ა(ა)იპ − კულტურულ ურთიერთობათა ცენტრის − კავკასიური სახლისათვის უძრავი ქონების უსასყიდლო უზუფრუქტის უფლებით გადაცემაზე თანხმობის მიცემის შესახებ

საქართველოს მთავრობის

განკარგულება № 3

2016 წლის 8 იანვარი

ქ. თბილისი

ა(ა)იპ − კულტურულ ურთიერთობათა ცენტრის  − კავკასიური სახლისათვის  უძრავი ქონების  უსასყიდლო  უზუფრუქტის   უფლებით  გადაცემაზე თანხმობის მიცემის შესახებ

1. „სახელმწიფო ქონების შესახებ“ საქართველოს კანონის 36-ე მუხლის მე-2 პუნქტის შესაბამისად, მიეცეს თანხმობა საქართველოს ეკონომიკისა და მდგრადი განვითარების სამინისტროს სისტემაში შემავალ სსიპ − სახელმწიფო ქონების ეროვნულ სააგენტოს, ა(ა)იპ − კულტურულ ურთიერთობათა ცენტრს − კავკასიურ სახლს (ს/კ: №203834912) უსასყიდლო უზუფრუქტის უფლებით, შესაბამისი ხელშეკრულების გაფორმებიდან 15 (თხუთმეტი) წლის ვადით გადასცეს სახელმწიფო საკუთრებაში არსებული ამ განკარგულების დანართ №1-ში  მითითებული უძრავი ქონება.

2.    ამ განკარგულების პირველი პუნქტით გათვალისწინებული უძრავი ქონების უსასყიდლო უზუფრუქტის  უფლებით გადაცემის პირობებად განისაზღვროს:

ა) ამ განკარგულების პირველი პუნქტით გათვალისწინებული უძრავი ქონების  საგამომცემლო, სამეცნიერო, კულტურული, საგანმანათლებლო საქმიანობისათვის გამოყენება, მათ შორის, მხატვართა, შემოქმედთა, ფოტოჟურნალისტთა და ა.შ. ნამუშევრების გამოფენა-გაყიდვის, სემინარების, კონფერენციებისა და სხვა ღონისძიებების მოწყობის მიზნით;

ბ) საჭიროებიდან გამომდინარე,  ამ განკარგულების  დანართ №2-ში მითითებული საერთო სარგებლობის ფართით უსასყიდლოდ ასარგებლოს მესაკუთრე;

გ)   საჭიროებიდან გამომდინარე,  ამ განკარგულების  დანართ №2-ში მითითებული საერთო სარგებლობის ფართით სასყიდლით ან უსასყიდლოდ ასარგებლოს მესაკუთრის მიერ განსაზღვრული პირ(ებ)ი, მესაკუთრის მიერ განსაზღვრული პირობებით.

3.    ამ განკარგულების შესრულების მიზნით, საქართველოს ეკონომიკისა და მდგრადი განვითარების სამინისტროს სისტემაში შემავალმა სსიპ − სახელმწიფო ქონების ეროვნულმა სააგენტომ  განახორციელოს შესაბამისი ღონისძიებები.

პრემიერ-მინისტრი                                                                                    გიორგი კვირიკაშვილი