დუშეთის მუნიციპალიტეტის გამგებლის და საკრებულოს წევრების მუნიციპალიტეტის ამომრჩევლებთან ანგარიშის ჩაბარების წესის დამტკიცების შესახებ

   საქართველოს ორგანული კანონის „ადგილობრივი თვითმმართველობის კოდექსი“ 61-ე მუხლის პირველი და მე-2 პუნქტების, ამავე კოდექსის 88-ე მუხლის  საფუძველზე, დუშეთის მუნიციპალიტეტის საკრებულო ადგენს:

დამტკიცდეს დუშეთის მუნიციპალიტეტის გამგებლის და საკრებულოს წევრების ამომრჩევლებთან  შეხვედრების მოწყობასთან, გაწეული სამუშაოს შესახებ ანგარიშის წარდგენასთან და განხილვასთან დაკავშირებით წესი, დანართი №1-ის  შესაბამისად.

დადგენილება ამოქმედდეს გამოქვეყნებისთანავე.

დუშეთის მუნიციპალიტეტის გამგებლის, საკრებულოს წევრის ამომრჩევლებთან  შეხვედრების მოწყობასთან, გაწეული სამუშაოს შესახებ ანგარიშის წარდგენასთან და განხილვასთან დაკავშირებით შემუშავებული წესი არეგულირებს მუნიციპალიტეტის გამგებლისა და საკრებულოს წევრების მიერ ამომრჩევლებთან საჯარო შეხვედრების მოწყობის, გაწეული სამუშაოს შესახებ ანგარიშის წარდგენასთან და განხილვასთან დაკავშირებულ  საკითხებს.

მუნიციპალიტეტის გამგებელი და საკრებულოს წევრები ვალდებულნი არიან, წელიწადში ერთხელ მაინც, არაუგვიანეს 1 ნოემბრისა, მოაწყონ საჯარო შეხვდრები მუნიციპალიტეტის ამომრჩევლებთან და წარუდგინონ მათ ანგარიში გაწეული მუშაობის შესახებ.

საჯარო შეხვედრების მოწყობის შესახებ ინფორმაცია უნდა განთავსდეს მუნიციპალიტეტის ვებგვერდზე ან გამოცხადდეს საჯაროდ.

მუნიციპალიტეტის გამგებლისა და საკრებულოს წევრების მიერ საჯარო შეხვედრაზე ანგარიშის წარდგენისას სხდომას წარმართავს საკრებულოს თავმჯდომარე, ხოლო მისი არყოფნის შემთხვევაში – საკრებულოს თავმჯდომარის მოადგილე. სხდომის მიმდინარეობისას ფორმდება სხდომის ოქმი.

საჯარო შეხვედრაზე ანგარიში წარდგენილი უნდა იქნეს წერილობითი სახით,  დასაშვებია აუდიო, ვიდეო და კომპიუტერული ტექნიკის გამოყენება, ასევე მედიის წარმომადგენლების მოწვევაც.

საჯარო შეხვედრები შეიძლება ჩატარდეს სხდომათა დარბაზში ან სხვა საჯარო ადგილას. სხდომის ჩატარების ორგანიზებას უზრუნველყოფს საკრებულოს აპარატი ან გამგეობა.

მუნიციპალიტეტის გამგებელი და საკრებულოს წევრები ვალდებულნი არიან ანგარიშის განხილვისას უპასუხონ მუნიციპალიტეტის ამომრჩეველთა მიერ დასმულ შეკითხვებს.

მუნიციპალიტეტის ტერიტორიაზე რეგისტრირებულ ამომრჩეველს უფლება აქვს, შეუზღუდავად დაესწროს მუნიციპალიტეტის გამგებლის და საკრებულოს წევრების საჯარო ანგარიშების განხილვას.

საჯარო სხდომებზე დამსწრე პირებს უფლება აქვთ, წინასწარი ნებართვის გარეშე, საკრებულოს რეგლამენტით დადგენილი წესით დაუსვან შეკითხვები მომხსენებელს და თანამომხსენებელს, გააკეთონ განმარტება და განცხადება, წარადგინონ ინფორმაცია.

მუნიციპალიტეტის გამგებლისა და საკრებულოს წევრების მიერ  წარდგენილი ანგარიში ქვეყნდება საჯაროდ, მუნიციპალიტეტის ოფიციალურ  ვებგვერდზე.