,,ნავთობისა და გაზის სფეროში არსებული სახელმწიფოთაშორისი ხელშეკრულებებით გათვალისწინებული ვალდებულებების შესრულების უზრუნველსაყოფად განსახორციელებელ ღონისძიებათა შესახებ“ საქართველოს მთავრობის 2008 წლის 13 მარტის №60 დადგენილებაში ცვლილების შეტანის თაობაზე“

საქართველოს მთავრობის

დადგენილება №23

2009 წლის 18 თებერვალი

ქ. თბილისი

ნავთობისა და გაზის სფეროში არსებული სახელმწიფოთაშორისი ხელშეკრულებებით გათვალისწინებული ვალდებულებების შესრულების უზრუნველსაყოფად განსახორციელებელ ღონისძიებათა შესახებ“ საქართველოს მთავრობის 2008 წლის 13 მარტის №60 დადგენილებაში ცვლილების შეტანის თაობაზე

1. საქართველოს ზოგადი ადმინისტრაციული კოდექსის 63-ე მუხლისა და „ნორმატიული აქტების შესახებ“ საქართველოს კანონის 36-ე მუხლის საფუძველზე ,,ნავთობისა და გაზის სფეროში არსებული სახელმწიფოთაშორისი ხელშეკრულებებით გათვალისწინებული ვალდებულებების შესრულების უზრუნველსაყოფად განსახორციელებელ ღონისძიებათა შესახებ“ (სსმ III, 2008 წელი, №40, მუხლი 447) საქართველოს მთავრობის 2008 წლის 13 მარტის №60 დადგენილებაში შეტანილ იქნეს ცვლილება და მე-2 პუნქტი ჩამოყალიბდეს შემდეგი რედაქციით:

„2. დაინიშნონ საქართველოს ენერგეტიკის მინისტრის პირველი მოადგილე მარიამ ვალიშვილი და შპს ,,საქართველოს ნავთობისა და გაზის კორპორაციის“ გენერალური დირექტორი ზურაბ ჯანჯღავა საქართველოს წარმომადგენლებად:

ა) „აზერბაიჯანის რესპუბლიკის, საქართველოსა და თურქეთის რესპუბლიკის ტერიტორიების გავლით ბაქო-თბილისი-ჯეიჰანის ძირითადი საექსპორტო მილსადენით ნავთობის ტრანსპორტირების შესახებ“ ხელშეკრულების VI მუხლის პირველი პუნქტით გათვალისწინებულ მოთხოვნათა შესაბამისად ხელშეკრულებით გათვალისწინებულ „სამეთვალყურეო კომისიაში“;

ბ) „სამხრეთ-კავკასიის მილსადენის სისტემის (ბაქო-თბილისი-ერზრუმის გაზსადენი)“ სამთავრობათაშორისი ხელშეკრულების VI მუხლის პირველი პუნქტით გათვალისწინებულ მოთხოვნათა შესაბამისად „სამხრეთ-კავკასიის მილსადენის სისტემის (ბაქო-თბილისი-ერზრუმის გაზსადენი)“ პროექტის განხორციელების ხელშემწყობ კომისიაში.“.

2. დადგენილება ამოქმედდეს გამოქვეყნებისთანავე.

პრემიერ-მინისტრი ნ. გილაური