ვანის მუნიციპალიტეტის საკრებულოს 2014 წლის 15 ივლისის №21 დადგენილებით დამტკიცებულ ვანის მუნიციპალიტეტის გამგეობის დებულებაში ცვლილებების და დამატებების შეტანის შესახებ

ა) 35-ე მუხლს დაემატოს მე-4 პუნქტი და იგი ჩამოყალიბდეს შემდეგი რედაქციით:

„4. მუნიციპალიტეტის გამგეობა თვითმმართველობის განხორციელებაში მოქალაქეთა მონაწილეობის უზრუნველსაყოფად ვალდებულია შექმნას ორგანიზაციული და მატერიალურ-ტექნიკური პირობები მოქალაქეთა მიღების, მოქალაქეთა შეხვედრების, გამგეობის საქმიანობის და გადაწყვეტილებათა მიღების პროცესის გამჭვირვალობისათვის.“;

ბ)  დებულებას დაემატოს 35¹ მუხლი და იგი ჩამოყალიბდეს შემდეგი რედაქციით:

„მუხლი 35¹. დასახლების საერთო კრება

1. დასახლების საერთო კრება არის სოფლის/დაბის/ქალაქის მოსახლეობის თვითორგანიზაციისა და ადგილობრივი თვითმმართველობის განხორციელებაში მოქალაქეთა მონაწილეობის ფორმა, რომელიც უზრუნველყოფს შესაბამის დასახლებაში რეგისტრირებული ამომრჩევლის ამ დასახლებისა და მუნიციპალიტეტისათვის მნიშვნელოვანი საკითხების განხილვის, გადაწყვეტისა და აღნიშნული მუნიციპალიტეტის ორგანოების წინაშე ინიციირების პროცესებში ქმედით ჩართულობას.

2. დასახლების საერთო კრების უფლებამოსილება, მოწვევისა და საქმიანობის წესი განისაზღვრება საქართველოს ორგანული კანონით „ადგილობრივი თვითმმართველობის კოდექსი“ და საერთო კრების ტიპური დებულებით, რომელსაც ამტკიცებს მუნიციპალიტეტის საკრებულო.“;

გ) დებულებას დაემატოს 35² მუხლი და იგი ჩამოყალიბდეს შემდეგი რედაქციით:

„მუხლი 35². სამოქალაქო მრჩეველთა საბჭო

1. მუნიციპალიტეტის გამგებლის სათათბირო ორგანო არის სამოქალაქო მრჩეველთა საბჭო, რომლის შემადგენლობაში შედიან მეწარმე იურიდიული პირების, არასამთავრობო ორგანიზაციებისა და მუნიციპალიტეტის მოსახლეობის წარმომადგენლები.

2. სამოქალაქო მრჩეველთა საბჭოს დებულებასა და შემადგენლობას ამტკიცებს გამგებელი. შემადგენლობა განისაზღვრება 11 წევრით.

3. სამოქალაქო მრჩეველთა საბჭოს უფლებამოსილებები და საქმიანობის წესი განისაზღვრება საქართველოს ორგანული კანონით „ადგილობრივი თვითმმართველობის კოდექსი“ და გამგებლის მიერ დამტკიცებული სამოქალაქო მრჩეველთა საბჭოს დებულებით.".