„საქართველოს ცენტრალური საარჩევნო კომისიის აპარატის მოხელეთა შესარჩევი კონკურსის დებულების დამტკიცების შესახებ” საქართველოს ცენტრალური საარჩევნო კომისიის 2012 წლის 2 მარტის №9/2012 დადგენილებით დამტკიცებულ დებულებაში ცვლილებების შეტანის შესახებ

1. დებულების მე-14 მუხლის პირველი პუნქტი ჩამოყალიბდეს შემდეგი რედაქციით:

„1. ცესკოს აპარატის მოხელის ვაკანტურ თანამდებობაზე შესაბამისი საკონკურსო კომისიის მიერ შერჩეულ პირს ცესკოს თავმჯდომარე თანამდებობაზე ნიშნავს ბრძანებით უვადოდ ან გამოსაცდელი ვადით.’’.

2. დებულებას დაემატოს 14¹ მუხლი შემდეგი რედაქციით:

,,მუხლი 14¹. მოხელის გამოსაცდელი ვადით დანიშვნა და გათავისუფლება

1. მოხელის სამსახურში მიღებისას ცესკოს თავმჯდომარეს შეუძლია მის მიმართ გამოიყენოს გამოსაცდელი ვადა.

2. გამოსაცდელი ვადის ხანგრძლივობა არ შეიძლება აღემატებოდეს 6 თვეს.

3. გამოსაცდელი ვადის გამოყენების შემთხვევაში, გამოსაცდელი ვადის ხანგრძლივობა აღინიშნება მოხელის დანიშვნის შესახებ გამოცემულ ცესკოს თავმჯდომარის ბრძანებაში.

4. გამოსაცდელ ვადაში არ ითვლება მოხელის მიერ დროებითი შრომისუუნარობისა და სხვა საპატიო მიზეზის გამო გაცდენილი დრო. გამოსაცდელი ვადა მოხელეს ეთვლება შრომით სტაჟში.

5. გამოსაცდელი ვადის განმავლობაში მოწმდება მოხელის პროფესიული ჩვევების, შესაძლებლობების და პირადი თვისებების შესაბამისობა დაკავებულ თანამდებობასთან.

6. ამ მუხლის მე-5 პუნქტით განსაზღვრული შემოწმება მოხელეს უტარდება გამოსაცდელი ვადის განმავლობაში. შემოწმებას წარმართავს ცესკოს  ადმინისტრაციული დეპარტამენტი. შემოწმების წესი და პირობები დგინდება ცესკოს თავმჯდომარის ბრძანებით.

7. შემოწმების შედეგების შესაბამისად, ცესკოს თავმჯდომარე მოხელეს ნიშნავს დაკავებულ თანამდებობაზე ან გამოსაცდელი ვადის პერიოდში ათავისუფლებს მას დაკავებული თანამდებობიდან, კანონმდებლობის მოთხოვნების გათვალისწინებით.’’.