შპს „ენერგოტრანსისთვის“ სახელმწიფო ტყის ფონდით სპეციალური დანიშნულებით სარგებლობის ვადის განსაზღვრისა და საქართველოს „წითელი ნუსხით“ დაცული მცენარეთა სახეობების ბუნებრივი გარემოდან ამოღებაზე თანხმობის მიცემის შესახებ

საქართველოს მთავრობის

განკარგულება №1560

2015 წლის 17 ივლისი

ქ. თბილისი

შპს „ენერგოტრანსისთვის“ სახელმწიფო ტყის ფონდით სპეციალური დანიშნულებით სარგებლობის ვადის განსაზღვრისა და საქართველოს „წითელი ნუსხით“ დაცული მცენარეთა სახეობების ბუნებრივი გარემოდან ამოღებაზე თანხმობის მიცემის შესახებ

საქართველოს ტყის კოდექსის 52-ე მუხლის, „საქართველოს „წითელი ნუსხისა“ და „წითელი წიგნის“ შესახებ“ საქართველოს კანონის 24-ე მუხლის პირველი პუნქტის „ვ“ ქვეპუნქტის, 2³ პუნქტის, „ტყითსარგებლობის წესის დამტკიცების შესახებ“ საქართველოს მთავრობის 2010 წლის 20 აგვისტოს №242 დადგენილებით დამტკიცებული „ტყითსარგებლობის წესის“ 27¹ მუხლის პირველი პუნქტის „ა“ ქვეპუნქტისა და 27⁴ მუხლის მე-5 პუნქტის შესაბამისად:

1. ჯვარი-ხორგას შემაერთებელი ელექტროგადამცემი ქსელის 500/220 კვ. ქვესადგურისა და ელექტროგადამცემი ხაზების მშენებლობის პროექტის ფარგლებში, ელექტროგადამცემი ხაზების გასხვისების (გაუცხოების) დერეფანში ანძების დამონტაჟების ადგილებში მისასვლელი გზების მოწყობის მიზნით, შპს „ენერგოტრანსს“ (ს/კ: 204991786) საქართველოს გარემოსა და ბუნებრივი რესურსების დაცვის სამინისტროს სსიპ − ეროვნული სატყეო სააგენტოს (შემდგომში − სააგენტო) მართვას დაქვემდებარებულ, წალენჯიხის სატყეო უბნის ჭალეს სატყეოს ყოფილ საკოლმეურნეო ტყეში არსებული 979 კვ.მ ფართობით სპეციალური დანიშნულებით სარგებლობის (ხე-მცენარეების ჭრის უფლებით) ვადა განესაზღვროს 49 წლამდე.

2. შპს „ენერგოტრანსს“ მიეცეს უფლება, ამ განკარგულების პირველი პუნქტით განსაზღვრული ტერიტორიიდან, კანონმდებლობით დადგენილი წესით, ბუნებრივი გარემოდან ამოიღოს საქართველოს „წითელ ნუსხაში“ შეტანილ მცენარეთა შემდეგი სახეობები:

ა) ჩვეულებრივი წაბლი (Castanea sativa Mill.) -− 11 (თერთმეტი) ინდივიდი;

ბ) კოლხური მუხა (Quercus hartwissiana Stev.) − 1 (ერთი) ინდივიდი.

3. შპს „ენერგოტრანსი“ ვალდებულია:

ა) სახელმწიფო ტყის ფონდით სპეციალური დანიშნულებით სარგებლობისთვის, საკომპენსაციო ღონისძიების სახით, სამეგრელო-ზემო სვანეთის სატყეო სამსახურის წალენჯიხის სატყეო უბნის მაგანის სატყეოს ყოფილი საკოლმეურნეო ტყის ტერიტორიაზე (GPS: X-0258287 Y-4742464), სპეციალური დანიშნულებით სარგებლობას დაქვემდებარებულ ტოლფას ფართობზე, 2015 წლის 15 ოქტომბრიდან 15 ნოემბრამდე უზრუნველყოს ტყის აღდგენის ღონისძიება − ბუნებრივი განახლების ხელშეწყობა (შეღობვით);

ბ) ამ განკარგულების ძალაში შესვლიდან 2 (ორი) თვის ვადაში საქართველოს გარემოსა და ბუნებრივი რესურსების დაცვის სამინისტროს შესათანხმებლად წარუდგინოს საქართველოს „წითელ ნუსხაში“ შეტანილი მცენარეების ბუნებრივი გარემოდან ამოღებით ბიომრავალფეროვნებისათვის მიყენებული ზიანის საკომპენსაციო ქმედებების პაკეტი.

4. ამ განკარგულების მე-2 პუნქტით გათვალისწინებული, საქართველოს „წითელ ნუსხაში“ შეტანილი მცენარეების ბუნებრივი გარემოდან ამოღებაზე კონტროლი განახორციელოს საქართველოს გარემოსა და ბუნებრივი რესურსების დაცვის სამინისტროს სახელმწიფო საქვეუწყებო დაწესებულებამ – გარემოსდაცვითი ზედამხედველობის დეპარტამენტმა.

პრემიერ-მინისტრი                                                                         ირაკლი ღარიბაშვილი