ბორჯომის მუნიციპალიტეტის მოსახლეობის სათბობი შეშით უზრუნველყოფის შესახებ

საქართველოს მთავრობის

განკარგულება №549

2015 წლის 19 მარტი

ქ. თბილისი

ბორჯომის მუნიციპალიტეტის მოსახლეობის სათბობი შეშით უზრუნველყოფის შესახებ

 „ტყის ფონდის მართვის შესახებ“ საქართველოს კანონის მე-6 მუხლის „ნ“ ქვეპუნქტის შესაბამისად:

1. სსიპ - ეროვნული სატყეო სააგენტოს (შემდგომში - სააგენტო) სამცხე-ჯავახეთის სატყეო სამსახურის მართვას დაქვემდებარებულ, ბორჯომ-ბაკურიანის სატყეო უბნის ჩარხისწყლის სატყეოში ტყის მდგომარეობის გაუმჯობესებისა და ეკოლოგიური წონასწორობის შენარჩუნების მიზნით, ბორჯომის მუნიციპალიტეტის გამგეობას მიეცეს უფლება, სახელმწიფო ტყის ფონდში, სამცხე-ჯავახეთის სატყეო სამსახურის მართვას დაქვემდებარებულ, ბორჯომ-ბაკურიანის სატყეო უბნის ჩარხისწყლის სატყეოს №15, №16, №20 და №21 კვარტლებში, „ტყის მოვლისა და აღდგენის წესის შესახებ“ საქართველოს მთავრობის 2010 წლის 13 აგვისტოს №241 დადგენილებითა და „ტყითსარგებლობის წესის დამტკიცების შესახებ“ საქართველოს მთავრობის 2010 წლის 10 აგვისტოს №242 დადგენილებით განსაზღვრული მოთხოვნების დაცვით, სანიტარიული ჭრის წესით დაამზადოს 1320,70 კბ.მ მერქნული რესურსი (ზეხმელი, ხმობადი, ძლიერ ფაუტი და მავნებლებით ძლიერ დაზიანებული ხეები), სააგენტოს მომსახურების საფასურის გადახდის გარეშე.

2. ამ განკარგულების პირველი პუნქტის შესაბამისად დამზადებული მერქნული რესურსი, ადგილობრივი მოსახლეობის სათბობი შეშით უზრუნველყოფის მიზნით, გადაეცეს ბორჯომის მუნიციპალიტეტის გამგეობას.

3. ბორჯომის მუნიციპალიტეტის გამგეობამ უზრუნველყოს „ბუნებრივი რესურსებით სარგებლობისათვის მოსაკ­რებ­ლების შესახებ“ საქართველოს კანო­ნის მე-7 მუხლის მე-3 პუნქტით სანიტარიული ჭრისათვის დადგენილი ბუნებრივი რესურსებით სარგებლობის მოსაკრებლის გადახდა.

4. სააგენტომ უზრუნველყოს:

ა) სანიტარიული ჭრების განხორციელებასთან დაკავშირებით, შესაბამისი ხელშეკრულების გაფორმება ბორჯომის მუნიციპალიტეტის გამგეობასთან;

ბ) დამზადების შედეგად მიღებულ მერქნულ რესურსზე ხე-ტყის წარმოშობის დოკუმენტის გაცემა.

პრემიერ-მინისტრი ი. ღარიბაშვილი