„სახელმწიფო საიდუმლოების შესახებ“ საქართველოს კანონის მე-4 მუხლის მე-2 პუნქტით განსაზღვრული ზოგიერთი ნორმატიული აქტის დამტკიცების თაობაზე“ საქართველოს მთავრობის 2014 წლის 22 აპრილის №305 დადგენილებაში ცვლილების შეტანის შესახებ

1.  №1 დანართის (სახელმწიფო საიდუმლოებისათვის მიკუთვნებულ ცნობათა ნუსხა) 5.1 პუნქტი ჩამოყალიბდეს შემდეგი რედაქციით:

„5.1. ინფორმაცია სადაზვერვო, სახელმწიფო უსაფრთხოების, მართლწესრიგის, კონტრსადაზვერვო, ოპერატიულ-სამძებრო საქმიანობის და ფარული საგამოძიებო მოქმედებების გეგმების, ორგანიზების, მატერიალურ-ტექნიკური უზრუნველყოფის საშუალებების, ფორმების, მეთოდებისა და შედეგების, კონკრეტული ღონისძიებების განხორციელების, აგრეთვე,  კონკრეტული პროგრამების დაფინანსების შესახებ; აგრეთვე,  იმ პირთა თაობაზე, რომლებიც ზემოაღნიშნულ სფეროებში, კონფიდენციალურ საფუძველზე, თანამშრომლობენ ან ადრე თანამშრომლობდნენ ასეთი საქმიანობის განმახორციელებელ საქართველოს შესაბამის უწყებებთან:

5.1.1. სადაზვერვო  და კონტრსადაზვერვო უწყებების მიერ ოპერატიული და ოპერატიულ-ტექნიკური საშუალებებით მოპოვებული ინფორმაცია, რომელთა გამჟღავნებამაც შეიძლება ზიანი მიაყენოს საქართველოს სახელმწიფო ინტერესებს, შესაძლებელი გახადოს ინფორმაციის წყაროს, მისი მოპოვების მეთოდებისა და საშუალებების გამოაშკარავება;

5.1.2. ოპერატიული საქმიანობისა და ფარული საგამოძიებო მოქმედებების ჩატარებაზე უფლებამოსილი სახელმწიფო უწყებების ინფორმაცია იმ პირთა შესახებ, რომლებიც კონფიდენციალურ საფუძველზე,  თანამშრომლობენ მათთან,  ან ადრე თანამშრომლობდნენ;

5.1.3. სადაზვერვო, კონტრსადაზვერვო და სხვა სპეცსამსახურების სტრუქტურა და ფუნქციური მოვალეობანი, რომელთა გამჟღავნება გამოააშკარავებს მათი მუშაობის მიმართულებას და დაინტერესების ობიექტებს;

5.1.4. სადაზვერვო, კონტრსადაზვერვო, ოპერატიული და ოპერატიულ-ტექნიკური საქმიანობისა და ფარული საგამოძიებო მოქმედებების კონკრეტული ამოცანები, გეგმები და ანგარიშები;

5.1.5. სადაზვერვო, კონტრსადაზვერვო და სხვა ოპერატიული საქმიანობისათვის, აგრეთვე,  ფარული საგამოძიებო მოქმედებების ჩატარებისათვის გამოყენებული ოპერატიული და ოპერატიულ-ტექნიკური მოწყობილობები, მათი სრულყოფის, ახალი ნიმუშების დამზადების სამუშაოები, მათი ტექნიკური მახასიათებლები;

5.1.6. ცნობები, რომლებიც გამოააშკარავებენ სახელმწიფო და არასახელმწიფო უწყებებში, ორგანიზაციებსა და დაწესებულებებში საქართველოს სპეციალური სამსახურების მოქმედი რეზერვის ოფიცერთა მუშაობის ფაქტს, მათი საქმიანობის ფორმებს, მეთოდებსა და საშუალებებს;

5.1.7. სადაზვერვო, კონტრსადაზვერვო და სხვა სპეციალური სამსახურების სტრუქტურული ქვედანაყოფების პირობითი დასახელებები, მათი დისლოკაციის ადგილები, საქმიანობის მიმართულებები, ფორმები და მეთოდები;

5.1.8. ინფორმაცია, ოპერატიული საქმიანობისა და ფარული საგამოძიებო მოქმედებების ჩატარებაზე უფლებამოსილი უწყებების მიერ,  კონკრეტული ოპერატიული ღონისძიებისათვის ან/და ფარული საგამოძიებო მოქმედებების ჩატარებისათვის გაწეული ხარჯების, სადაზვერვო და კონტრსადაზვერვო საქმიანობის მოკლევადიანი და გრძელვადიანი სპეციალური პროგრამებისა და გამოკვლევების დაფინანსების წყაროებისა და ხარჯების მოცულობის შესახებ;

5.1.9. საქართველოს თავდაცვისა და საქართველოს შინაგან საქმეთა სამინისტროების, საქართველოს შინაგან საქმეთა სამინისტროს სახელმწიფო საქვეუწყებო დაწესებულების - საქართველოს სასაზღვრო პოლიციის, საქართველოს დაზვერვის სამსახურისა და სახელმწიფო დაცვის სპეციალური სამსახურების შიდასაუწყებო ნორმატიული აქტები, რომლებიც აწესრიგებენ მათ შიდა საქმიანობას,  უშუალოდ სახელმწიფო თავდაცვისა და  სახელმწიფო უსაფრთხოების უზრუნველყოფის თვალსაზრისით;“.

2. №3 დანართის (იმ თანამდებობის პირთა ნუსხა, რომელთაც აქვთ კონკრეტული ინფორმაციის სახელმწიფო საიდუმლოებისათვის მიკუთვნების უფლებამოსილება):

ა) მე-7 პუნქტი ჩამოყალიბდეს შემდეგი რედაქციით:

„7. საქართველოს უზენაესი სასამართლოს თავმჯდომარე, ხოლო საქართველოს სისხლის სამართლის საპროცესო კოდექსის XVI¹ თავით განსაზღვრული უფლებამოსილების ფარგლებში - აგრეთვე,  მოსამართლე.“;

ბ) მე-20 პუნქტი ჩამოყალიბდეს შემდეგი რედაქციით:

„20. საქართველოს  მთავარი პროკურორი და მისი მოადგილეები, ხოლო საქართველოს სისხლის სამართლის საპროცესო კოდექსის XVI¹ თავით განსაზღვრული უფლებამოსილების ფარგლებში - აგრეთვე,  პროკურორი.“;

გ) 30-ე პუნქტი ჩამოყალიბდეს შემდეგი რედაქციით:

„30.  საქართველოში სადაზვერვო, კონტრსადაზვერვო, ოპერატიული და ოპერატიულ-ტექნიკური საქმიანობის, აგრეთვე,  ფარული საგამოძიებო მოქმედებების ჩატარების უფლების მქონე უწყებათა პასუხისმგებელი თანამშრომლები;“.