ქ. თბილისის მუნიციპალიტეტის ცალკეულ ტერიტორიებზე სამშენებლო სამუშაოების მშენებლობის ნებართვით დადგენილ ვადაში დაუსრულებლობისათვის ჯარიმის ოდენობის განსაზღვრის თაობაზე

საქართველოს ორგანული კანონის „ადგილობრივი თვითმმართველობის კოდექსი”  61-ე მუხლის მე-2 პუნქტის, 68-ე მუხლის პირველი პუნქტის  ,,ლ“ ქვეპუნქტის და საქართველოს კანონის „პროდუქტის უსაფრთხოებისა და თავისუფალი მიმოქცევის” კოდექსის 46-ე  მუხლის, საქართველოს კანონის ,,ნორმატიული აქტების შესახებ“ 25-ე მუხლის შესაბამისად, ქ. თბილისის მუნიციპალიტეტის საკრებულო ადგენს:

1. წინამდებარე დადგენილების  დანართი 1-ით  განსაზღვრულ ზონაში, სამშენებლო  სამუშაოების ან მშენებლობის ეტაპის მშენებლობის ნებართვით დადგენილ ვადაში დაუსრულებლობისთვის, პასუხისმგებლობის ზომად განისაზღვროს ჯარიმა, ყოველ ვადაგადაცილებულ დღეზე  შემოწმების აქტის შედგენის დღისთვის, არსებული  სამშენებლო პროექტით გათვალისწინებული ასაშენებელი (სადემონტაჟო) შენობა-ნაგებობის  საერთო ფართობის  თითოეულ კვადრატულ მეტრზე – 0,5 ლარის ოდენობით. 

2. ძალადაკარგულად გამოცხადდეს ,,ქ. თბილისის ცალკეულ ტერიტორიებზე სამშენებლო სამუშაოების მშენებლობის ნებართვით დადგენილ ვადაში დაუსრულებლობისათვის ჯარიმის ოდენობის განსაზღვრის თაობაზე“ ქალაქ თბილისის მთავრობის 2011 წლის 24 აგვისტოს №23.06.942 დადგენილება.

3. ქალაქ თბილისის მთავრობის 2011 წლის 24 აგვისტოს  №23.06.942  დადგენილების საფუძველზე დაწყებულ სამშენებლო სამართალდარღვევის საქმის წარმოებებზე გავრცელდეს ამ დადგენილების მოქმედება და დაწყებული სამშენებლო სამართალდარღვევის საქმის წარმოებები დასრულდეს    ამ დადგენილებით განსაზღვრული წესით.  

4. დადგენილება ძალაშია გამოქვეყნებისთანავე.