,,ლაგოდეხის მუნიციპალიტეტის ადგილობრივი თვითმმართველობის ორგანოების, ადგილობრივი თვითმმართველი ორგანოს მიერ შექმნილი არასამეწარმეო (არაკომერციული) იურიდიული პირისა და მუნიციპალიტეტის 100% - იანი წილით დაფუძნებული სამეწარმეო იურიდიული პირის საკუთრებაში არსებული (ბალანსზე რიცხული) ქონების ინვენტარიზაციისა და ამორტიზებული ან გამოუყენებელი ქონების ჩამოწერის წესის დამტკიცების შესახებ“ ლაგოდეხის მუნიციპალიტეტის საკრებულოს 2013 წლის 27 მაისის №17 დადგენილებაში ცვლილების შეტანის თაობაზე

1.  წესის  მე-2 მუხლს დაემატოს შემდეგი შინაარსის მე-5 პუნქტი

„მუხლი 2.  ტერმინთა განმარტება

5. დაწესებულების ხელმძღვანელი  – ლაგოდეხის მუნიციპალიტეტის გამგებელი“.

2. წესის  მე-5 მუხლის  პირველი და მესამე  პუნქტები  ჩამოყალიბდეს შემდეგი რედაქციით:

,, მუხლი 5. ამორტიზებული ან გამოუყენებელი ქონების ჩამოწერის წესი

 1.  კომისია სწავლობს ამორტიზებული ან ექსპლუატაციისათვის გამოუყენებელი (ვადაზე ადრე ჩამოწერა) ძირითადი საშუალების ფაქტობრივ ფიზიკურ მდგომარეობას, ასაბუთებს ძირითადი საშუალების დაწესებულების ბალანსიდან ჩამოწერის აუცილებლობას და ადგენს ლიკვიდაციის (ჩამოწერის) აქტს ყველა ძირითად საშუალებაზე ცალ-ცალკე. კომისია ასევე ამზადებს ჩამოსაწერი ძირითადი საშუალებების ნარჩენი ღირებულების დადგენის აქტს, ამ წესზე თანდართული ტიპური აქტების ფორმის შესაბამისად (დანართი №2, დანართი №3) და, საჭიროების შემთხვევაში, ძირითადი აქტივის ლიკვიდაციის აქტს (დანართი №4), რომელსაც წარუდგენს დაწესებულების ხელმძღვანელს.

3. დაწესებულების ხელმძღვანელი უზრუნველყოფს ჩამოსაწერი ძირითადი საშუალებების ნარჩენი ღირებულებისა და მათი ლიკვიდაციის შედეგად მიღებული სასაქონლო-მატერიალური მარაგების ღირებულებების დადგენის აქტების შემოწმებასა და დადასტურებას შესაბამისი აუდიტორის მიერ, რის შემდეგაც იგი ამტკიცებს კომისიის მიერ ძირითადი საშუალებების ჩამოწერასთან დაკავშირებულ ყველა აქტს.“.

3. წესის  მე-6 მუხლის  პირველი და მეორე პუნქტები  ჩამოყალიბდეს შემდეგი რედაქციით:

 ,,მუხლი 6. ჩამოწერილი და გამოუსადეგარი ძირითადი საშუალებების განადგურება და განკარგვა

1. ჩამოწერილი და გამოუსადეგარი ძირითადი საშუალებების შედეგად მიღებული ქონება, რომლის რაიმე დანიშნულებით გამოყენებაც შეუძლებელია, დაწესებულების ხელმძღვანელის  ბრძანების საფუძველზე ექვემდებარება განადგურებას.

2. ქონების განადგურების პროცესს ესწრებიან დაწესებულების ხელმძღვანელის მიერ კომისიის შემადგენლობიდან განსაზღვრული პირები.“.

4. წესის  მე-7 მუხლი  ჩამოყალიბდეს შემდეგი რედაქციით:

,,მუხლი 7. ჩამოწერილი ძირითადი საშუალებების რეალიზება

ჩამოწერილი ძირითადი საშუალებების რეალიზება ხორციელდება საჯარო აუქციონის ფორმით (აუქციონი პირობებით), კანონმდებლობით დადგენილი წესის შესაბამისად“.

5.  წესის  მე-8 მუხლის პირველი,  მეორე და მეშვიდე პუნქტები  ჩამოყალიბდეს შემდეგი რედაქციით:

 ,,მუხლი 8. ლაგოდეხის  მუნიციპალიტეტის თვითმმართველი ერთეულის მიერ შექმნილი არასამეწარმეო (არაკომერციული) და მუნიციპალიტეტის 100%-იანი წილით დაფუძნებული სამეწარმეო იურიდიული პირების საკუთრებაში არსებული (ბალანსზე რიცხული) ქონების ჩამოწერის წესი

1. თვითმმართველი ერთეულის – ლაგოდეხის მუნიციპალიტეტის მიერ დაფუძნებული იურიდიული პირების საკუთრებაში არსებული (ბალანსზე რიცხული) ქონების ჩამოწერის საკითხს წყვეტს შესაბამისი იურიდიული პირის ხელმძღვანელი, დაწესებულების   ხელმძღვანელთან  (მუნიციპალიტეტის)   შეთანხმებით.

 2.  დაწესებულების ხელმძღვანელი (მუნიციპალიტეტის) თანხმობას გასცემს ამ მუხლის პირველი პუნქტით გათვალისწინებული დაწესებულების მომართვის საფუძველზე. მომართვას თან უნდა ერთოდეს აუდიტის დასკვნა და კომისიის მიერ შემუშავებული დოკუმენტები.

 7. ჩამოწერილი ქონების რეალიზება ხორციელდება კანონმდებლობით დადგენილი წესის შესაბამისად“.