შპს „საქართველოს გაერთიანებული წყალმომარაგების კომპანიის“ მიერ განსახორციელებელი ღონისძიებების შესახებ

საქართველოს მთავრობის

განკარგულება №1551

2014 წლის 8 სექტემბერი

 ქ. თბილისი

შპს „საქართველოს გაერთიანებული წყალმომარაგების კომპანიის“ მიერ განსახორციელებელი ღონისძიებების შესახებ

1. დაბა გუდაურისა და დაბა ბაკურიანის ცალკეული სათხილამურო ტრასების ხელოვნური გათოვლიანების მიზნით, საქართველოს რეგიონული განვითარებისა და ინფრასტრუქტურის სამინისტროს (შემდგომში – სამინისტრო) მართვაში არსებულმა შპს „საქართველოს გაერთიანებული წყალმომარაგების კომპანიამ“ (შემდგომში – კომპანია) უზრუნველყოს დაბა გუდაურისა და დაბა ბაკურიანის წყალმომარაგების სისტემების რეაბილიტაციისა და წყალმომარაგების ქსელის მოწყობისათვის საჭირო საპროექტო და სამშენებლო სამუშაოების სახელმწიფო შესყიდვა.

2. სახელმწიფოებრივი და საზოგადოებრივი მნიშვნელობის ღონისძიებების შეზღუდულ ვადებში შეუფერხებლად ჩატარების მიზნით, კომპანიამ, „სახელმწიფო შესყიდვების შესახებ“ საქართველოს კანონის 10¹ მუხლის მე-3 პუნქტის „დ“ ქვეპუნქტის შესაბამისად, ამ განკარგულების პირველი პუნქტით გათვალისწინებული ღონისძიებების სახელმწიფო შესყიდვა განახორციელოს გამარტივებული შესყიდვის საშუალებით.

3. ამ განკარგულების პირველი პუნქტით გათვალისწინებული ღონისძიებების განხორციელების მიზნით, სამინისტრომ, „საქართველოს 2014 წლის სახელმწიფო ბიუჯეტის შესახებ“ საქართველოს კანონით მისთვის გამოყოფილი ასიგნებების ფარგლებში, მოიძიოს რესურსი 1 000 000 (ერთი მილიონი) ლარის ოდენობით და საქართველოს ფინანსთა სამინისტროს წარუდგინოს წინადადებები შესაბამისი ცვლილებების განხორციელებასთან დაკავშირებით.

4. სამინისტრომ უზრუნველყოს ამ განკარგულების მე-3 პუნქტით გათვალისწინებული თანხის კოპანიისათვის გადარიცხვა და კომპანიის კაპიტალის გაზრდა გადარიცხული თანხის ოდენობით.

5. კომპანიამ უზრუნველყოს სამინისტროსთვის შესაბამისი ინფორმაციის მიწოდება, სამინისტროს მოთხოვნის შესაბამისად.

პრემიერ-მინისტრი                                          ირაკლი ღარიბაშვილი