საერთაშორისო მნიშვნელობის მცხეთა-სტეფანწმინდა-ლარსის (რუსეთის ფედერაციის საზღვარი) საავტომობილო გზის კმ 134-კმ 135 მონაკვეთზე (დარიალის ხეობა) განვითარებული სტიქიური მოვლენების შედეგების სალიკვიდაციო დროებითი ღონისძიებების შესახებ

  საქართველოს მთავრობის

განკარგულება №1495

 2014 წლის 26 აგვისტო

ქ. თბილისი

საერთაშორისო მნიშვნელობის მცხეთა-სტეფანწმინდა-ლარსის (რუსეთის ფედერაციის საზღვარი) საავტომობილო გზის კმ134-კმ135 მონაკვეთზე (დარიალის ხეობა) განვითარებული სტიქიური მოვლენების შედეგების სალიკვიდაციო დროებითი ღონისძიებების შესახებ

1. საქართველოს რეგიონული განვითარებისა და ინფრასტრუქტურის სამინისტროს გამგებლობაში არსებულმა სახელმწიფო საქვეუწყებო დაწესებულებამ – საქართველოს საავტომობილო გზების დეპარტამენტმა (შემდგომში – დეპარტამენტი) 2014 წლის 20 აგვისტოს საერთაშორისო მნიშვნელობის მცხეთა-სტეფანწმინდა-ლარსის (რუსეთის ფედერაციის საზღვარი) საავტომობილო გზის კმ134–კმ135 მონაკვეთზე განვითარებული სტიქიური მოვლენების შედეგების სალიკვიდაციო დროებითი ღონისძიებების განხორციელების მიზნით, 2014 წელს, უზრუნველყოს:

ა) საერთაშორისო მნიშვნელობის მცხეთა-სტეფანწმინდა-ლარსის (რუსეთის ფედერაციის საზღვარი) საავტომობილო გზის კმ134-კმ135 მონაკვეთზე განვითარებული სტიქიური მოვლენების შედეგების სალიკვიდაციო დროებითი ღონისძიებების განხორციელებისათვის საჭირო სამუშაოების შესყიდვა, საქართველოს რეგიონული განვითარებისა და ინფრასტრუქტურის სამინისტროსათვის 100%–იანი წილის მართვის უფლებით გადაცემული შპს „სახელმწიფო სამშენებლო კომპანიისაგან“ (შემდგომში – კომპანია);

ბ) ამ პუნქტის „ა“ ქვეპუნქტით გათვალისწინებულ სამუშაოებთან დაკავშირებული საზედამხედველო და საპროექტო მომსახურების შესყიდვის განხორციელება;

გ) „საქართველოს საავტომობილო გზების საგზაო სამუშაოების კლასიფიკაციის ტექნიკური რეგლამენტის დამტკიცების თაობაზე“ საქართველოს მთავრობის 2013 წლის 10 ივლისის №172 დადგენილებით დამტკიცებული ტექნიკური რეგლამენტის მე-14 მუხლის საფუძველზე, ამ პუნქტის „ა“ ქვეპუნქტით გათვალისწინებული სალიკვიდაციო სამუშაოების განხორციელება პროექტირების პარალელურ რეჟიმში, ეტაპობრივად, შეთანხმებული საპროექტო დოკუმენტაციის შესაბამისად.

2. სახელმწიფოებრივი და საზოგადოებრივი მნიშვნელობის ღონისძიებების შეზღუდულ ვადებში შეუფერხებლად ჩატარების მიზნით, ამ განკარგულების პირველი პუნქტის „ა“ და „ბ“ ქვეპუნქტებით გათვალისწინებული ღონისძიებების სახელმწიფო შესყიდვა განხორციელდეს „სახელმწიფო შესყიდვის შესახებ“ საქართველოს კანონის 10¹ მუხლის მე-3 პუნქტის „დ“ ქვეპუნქტის შესაბამისად, გამარტივებული შესყიდვის საშუალებით.

3. ამ განკარგულების პირველი პუნქტის „ა“ და „ბ“ ქვეპუნ ქტებით გათვალისწინებული ღონისძიებების დაფინანსება განხორციელდეს საქართველოს მთავრობის 2014 წლის 22 მაისის №907 განკარგულების საფუძველზე, დეპარტამენტისთვის გამოყოფილი 7 000 000 (შვიდი მილიონი) ლარიდან დარჩენილი, აუთვისებელი სახსრებით.

4. ,,გამარტივებული შესყიდვის, გამარტივებული ელექტრონული ტენდერისა და ელექტრონული ტენდერის ჩატარების წესის დამტკიცების შესახებ“ სსიპ – სახელმწიფო შესყიდვების სააგენტოს თავმჯდომარის 2011 წლის 7 აპრილის №9 ბრძანებით დამტკიცებული წესის მე-19 მუხლის მე-7 და მე-12 პუნქტების საფუძველზე, ამ განკარგულების პირველი პუნქტის „ა“ ქვეპუნქტით გათვალისწინებულ კომპანიასთან გასაფორმებელი ხელშეკრულების მიმართ დადგინდეს ამავე ბრძანების მე-19 მუხლის მე-7 პუნქტით დადგენილისაგან განსხვავებული პირობები და კომპანია, საქმიანი რეპუტაციის, ცნობადობისა და სამუშაოების შესრულების ხარისხის გათვალისწინებით, გათავისუფლდეს წინასწარ გადასახდელი თანხის ოდენობის გარანტიის წარდგენის ვალდებულებისაგან.

პრემიერ-მინისტრი                                                     ირაკლი ღარიბაშვილი