„სამრეწველო დანიშნულების ფეთქებადი მასალების შესახებ“ საქართველოს კანონში ცვლილებების შეტანის თაობაზე

საქართველოს კანონი

„სამრეწველო დანიშნულების ფეთქებადი მასალების შესახებ“ საქართველოს კანონში ცვლილებების შეტანის თაობაზე

    მუხლი 1.

„სამრეწველო დანიშნულების ფეთქებადი მასალების შესახებ“ საქართველოს კანონში (საქართველოს საკანონმდებლო მაცნე, №15, 4.06.2003, მუხ. 108) შეტანილ იქნეს შემდეგი ცვლილებები:

1. მე-4 მუხლის მე-2 პუნქტი ჩამოყალიბდეს შემდეგი რედაქციით:

„2. რეესტრს აწარმოებს საჯარო სამართლის იურიდიული პირი – საქართველოს ტექნიკური ზედამხედველობის სახელმწიფო ინსპექცია (შემდგომში – საქართველოს ტექნიკური ზედამხედველობის სახელმწიფო ინსპექცია).“.

2. მე-5 მუხლის პირველი პუნქტის „ა“ ქვეპუნქტი ჩამოყალიბდეს შემდეგი რედაქციით:

„ა) საქართველოს ტექნიკური ზედამხედველობის სახელმწიფო ინსპექციის მიერ გაცემული ნებართვის გარეშე სამრეწველო დანიშნულების ფეთქებადი მასალების გამოყენება;“.

3. მე-8 მუხლი ჩამოყალიბდეს შემდეგი რედაქციით:

     „მუხლი 8. ნებართვის გაცემის წესი

სამრეწველო დანიშნულების ფეთქებადი მასალების გამოყენების ნებართვის მისაღებად, „ლიცენზიებისა და ნებართვების შესახებ“ საქართველოს კანონის 25-ე მუხლით გათვალისწინებული პირობების გარდა, ნებართვის მაძიებელი საქართველოს ტექნიკური ზედამხედველობის სახელმწიფო ინსპექციას დამატებით წარუდგენს:

ა) ფეთქებადი მასალების გამოყენებისას სამუშაოთა წარმოების სიტუაციურ გეგმას, პროექტს ან პასპორტს;

ბ) მხარეთა შორის გაფორმებულ ხელშეკრულებას ფეთქებადი მასალების გამოყენების შესახებ.“.

4. მე-9 მუხლის ტექსტი ჩამოყალიბდეს შემდეგი რედაქციით:

„ნებართვის მისაღებად მეწარმე ფიზიკური ან/და იურიდიული პირი იხდის სანებართვო მოსაკრებელს, რომლის ოდენობასა და გადახდის წესს განსაზღვრავს „სალიცენზიო და სანებართვო მოსაკრებლების შესახებ“ საქართველოს კანონი.“.

5. მე-13 მუხლის პირველი და მე-2 პუნქტები ჩამოყალიბდეს შემდეგი რედაქციით:

„1. ფეთქებადი მასალებისა და საამფეთქებლო საქმის ხელსაწყოების დამზადებისა და გამოცდის უფლება აქვს მეწარმე ფიზიკურ ან/და იურიდიულ პირს.

2. მეწარმე ფიზიკური ან/და იურიდიული პირი ფეთქებად მასალებს და საამფეთქებლო საქმის ხელსაწყოებს ამზადებს საქართველოს ტექნიკური ზედამხედველობის სახელმწიფო ინსპექციასთან შეთანხმებული დამზადებისა და მოხმარების ბალანსით გათვალისწინებულ ფარგლებში.“.

6. მე-14 მუხლის პირველი პუნქტი ჩამოყალიბდეს შემდეგი რედაქციით:

„1. ფეთქებადი მასალებისა და საამფეთქებლო საქმის ხელსაწყოების შეძენა შეუძლია მეწარმე ფიზიკურ ან/და იურიდიულ პირს, რომელიც:

ა) დაკავებულია ფეთქებადი მასალებისა და საამფეთქებლო საქმის ხელსაწყოების დამზადებით, შენახვითა და რეალიზაციით;

ბ) აწარმოებს აფეთქების სამუშაოებს როგორც საკუთარი საჭიროებისათვის, ისე დაკვეთით;

გ) ფეთქებად მასალებს იყენებს სამეცნიერო-კვლევითი და სასწავლო-საჩვენებელი მიზნებისათვის, თუ ასეთი საქმიანობის უფლება მინიჭებული აქვს საქართველოს კანონმდებლობით;

დ) ახორციელებს დენთისა და პიროტექნიკური ნაკეთობების შესყიდვას, შენახვას, რეალიზაციასა და გამოყენებას.“.

7. მე-15 მუხლის:

ა) პირველი პუნქტი ჩამოყალიბდეს შემდეგი რედაქციით:

„1. ფეთქებადი მასალებისა და საამფეთქებლო საქმის ხელსაწყოების შენახვა შეუძლია მეწარმე ფიზიკურ ან/და იურიდიულ პირს.“;

ბ) მე-4 პუნქტი ამოღებულ იქნეს.

    მუხლი 2.

ეს კანონი ამოქმედდეს გამოქვეყნებისთანავე.

საქართველოს პრეზიდენტი მ. სააკაშვილი

თბილისი,

2006 წლის 24 ნოემბერი.

№3765–IIს