„საშიში საწარმოო ობიექტის უსაფრთხოების შესახებ“ საქართველოს კანონში ცვლილებების შეტანის თაობაზე

საქართველოს კანონი

„საშიში საწარმოო ობიექტის უსაფრთხოების შესახებ“ საქართველოს კანონში ცვლილებების შეტანის თაობაზე

    მუხლი 1

„საშიში საწარმოო ობიექტის უსაფრთხოების შესახებ“ საქართველოს კანონში (პარლამენტის უწყებანი, №47-48, 31.12.1997, გვ. 154) შეტანილ იქნეს შემდეგი ცვლილებები:

1. მე-4 მუხლი ჩამოყალიბდეს შემდეგი რედაქციით:

     „მუხლი 4. ადგილობრივი თვითმმართველობის ორგანოების უფლებები და მოვალეობები საწარმოო უსაფრთხოების სფეროში

ადგილობრივი თვითმმართველობის ორგანოების უფლებებსა და მოვალეობებს საწარმოო უსაფრთხოების სფეროში განეკუთვნება:

ა) სახელმწიფო პოლიტიკის განხორციელებისათვის ხელის შეწყობა;

ბ) ადგილობრივი პროგრამების შემუშავება და განხორციელება;

გ) საწარმოო ობიექტის განთავსების შესახებ გადაწყვეტილებების მიღება თავიანთი კომპეტენციის ფარგლებში, შესაბამის ორგანოებთან შეთანხმებით;

დ) ამ კანონის მე-3 მუხლით გათვალისწინებული ორგანოების მიერ უსაფრთხოების მოთხოვნების დამრღვევთა მიმართ წაყენებული მოთხოვნების განხორციელებისათვის ხელის შეწყობა;

ე) მოსახლეობის ინფორმირება ობიექტებზე ავარიებით გამოწვეულ საგანგებო სიტუაციებში მოქმედებათა გეგმის შესახებ;

ვ) ობიექტზე ავარიის შემთხვევაში მისი ლოკალიზაციისა და აღმოფხვრისათვის, ადამიანის სიცოცხლის, ჯანმრთელობის, საკუთრების გადარჩენისათვის, წესრიგის დაცვისა და საწარმოს საქმიანობის აღდგენასთან დაკავშირებული ღონისძიებების განხორციელებისათვის ხელის შეწყობა;

ზ) ობიექტების განთავსების შესახებ საჯარო განხილვების უზრუნველყოფა და საზოგადოებრივი აზრის შესწავლა.“.

2. მე-5 მუხლის მე-2 პუნქტის „ა“ ქვეპუნქტი ჩამოყალიბდეს შემდეგი რედაქციით:

„ა) ადგილობრივი თვითმმართველობის ორგანოებმა თავიანთ ტერიტორიებზე განლაგებული ობიექტებისათვის;“.

3. მე-8 მუხლის მე-2 პუნქტი ჩამოყალიბდეს შემდეგი რედაქციით:

„2. ახლად აშენებული ან რეკონსტრუირებული ობიექტი საექსპლუატაციოდ მიიღება დამკვეთის, შემსრულებელი ორგანიზაციის, ამ კანონის მე-3 მუხლში აღნიშნული უფლებამოსილი ორგანოებისა და ადგილობრივი თვითმმართველობის ორგანოების წარმომადგენლების მონაწილეობით.“.

4. მე-10 მუხლის პირველი პუნქტის „თ“ ქვეპუნქტი ჩამოყალიბდეს შემდეგი რედაქციით:

„თ) უფლებამოსილ სახელმწიფო და ადგილობრივი თვითმმართველობის ორგანოებს დაუყოვნებლივ მიაწოდოს ინფორმაცია მომხდარი ავარიების შესახებ;“.

5. მე-16 მუხლის მე-2 პუნქტი ჩამოყალიბდეს შემდეგი რედაქციით:

„2. საწარმოო უსაფრთხოების სფეროში სახელმწიფო ზედამხედველობასა და კონტროლს თავიანთი კომპეტენციის ფარგლებში ახორციელებენ სპეციალურად უფლებამოსილი სახელმწიფო და ადგილობრივი თვითმმართველობის ორგანოები.“.

    მუხლი 2

ეს კანონი ამოქმედდეს გამოქვეყნებისთანავე.

საქართველოს პრეზიდენტი მ. სააკაშვილი

თბილისი,

2006 წლის 10 ნოემბერი.

№3642–IIს