„საქართველოს შინაგან საქმეთა სამინისტროს სახელმწიფო საქვეუწყებო დაწესებულება – საქართველოს სასაზღვრო პოლიციის დებულების დამტკიცების შესახებ“ საქართველოს შინაგან საქმეთა მინისტრის 2006 წლის 21 ივნისის №786 ბრძანებაში ცვლილების შეტანის თაობაზე

1. მე-6 მუხლის მე-5 პუნქტი ჩამოყალიბდეს შემდეგი რედაქციით:

„5. სასაზღვრო პოლიციის უფროსს ჰყავს სამი მოადგილე.“.

2. მე-11 მუხლი ჩამოყალიბდეს შემდეგი რედაქციით:

„მუხლი 11. საგამოძიებო-ოპერატიული მთავარი სამმართველო

1. საგამოძიებო-ოპერატიული მთავარი სამმართველო სტრუქტურული დანაყოფების მეშვეობით ამ დებულების მე-2 მუხლის მე-3 პუნქტით განსაზღვრულ არეალში ახორციელებს:

ა) პრევენციულ და სამართალდარღვევებზე რეაგირების ღონისძიებებს, საქართველოს კანონმდებლობით განსაზღვრულ სხვა საქმიანობას დანაშაულის პრევენციის, გამოვლენისა და აღკვეთის მიზნით;

ბ) კომპეტენციის ფარგლებში პოლიტიკური, ეკონომიკური, სამხედრო ხასიათის, ტერორისტული ორგანიზაციების საქმიანობის ამსახველი და წინმსწრები ოპერატიული ინფორმაციის მოპოვებას;

გ) არალეგალური მიგრაციის წინააღმდეგ ბრძოლას, ერთობლივ ოპერატიულ ღონისძიებებს, საერთაშორისო ხელშეკრულებების საფუძველზე სხვა ქვეყნების შესაბამის სამსახურებთან ინფორმაციის გაცვლას;

დ) საქართველოს სახელმწიფო საზღვრის დაცვასთან დაკავშირებული ოპერატიული ვითარების, მისი განვითარების შესაძლო ტენდენციების შესწავლასა და პრევენციას.

2.  საგამოძიებო-ოპერატიულ მთავარ სამმართველოს ხელმძღვანელობს მთავარი სამმართველოს უფროსი, რომელიც ამავდროულად არის სასაზღვრო პოლიციის უფროსის მოადგილე. მას თანამდებობაზე ნიშნავს და თანამდებობიდან ათავისუფლებს საქართველოს შინაგან საქმეთა მინისტრი სასაზღვრო პოლიციის უფროსის წარდგინებით. იგი ანგარიშვალდებულია უშუალოდ სასაზღვრო პოლიციის უფროსის წინაშე.“.