„ქარელის მუნიციპალიტეტის 2014 წლის ბიუჯეტის დამტკიცების შესახებ“ ქარელის მუნიციპალიტეტის საკრებულოს 2013 წლის 6 დეკემბრის №29 დადგენილებაში ცვლილების შეტანის თაობაზე

ა) დადგენილების პირველი მუხლი ჩამოყალიბდეს შემდეგი რედაქციით:

,,მუხლი 1. მუნიციპალიტეტის ბიუჯეტის ბალანსი

განისაზღვროს მუნიციპალიტეტის ბიუჯეტის ბალანსი თანდართული რედაქციით:

ბ) დადგენილების მე-2 მუხლი ჩამოყალიბდეს შემდეგი რედაქციით:

,, მუხლი 2. მუნიციპალიტეტის ბიუჯეტის შემოსულობები, გადასახდელები და ნაშთის ცვლილება

განისაზღვროს მუნიციპალიტეტის ბიუჯეტის შემოსულობები, გადასახდელები და ნაშთის ცვლილება თანდართული რედაქციით:

გ) დადგენილების მე-3 მუხლი ჩამოყალიბდეს შემდეგი რედაქციით:

,,მუხლი 3. ქარელის მუნიციპალიტეტის ბიუჯეტის შემოსავლები

განისაზღვროს მუნიციპალიტეტის ბიუჯეტის შემოსავლები 10 221 ათასი ლარის ოდენობით:

დ) დადგენილების მე-7 მუხლი ჩამოყალიბდეს შემდეგი რედაქციით:

,,მუხლი 7. მუნიციპალიტეტის ბიუჯეტის ხარჯები

განისაზღვროს მუნიციპალიტეტის ბიუჯეტის ხარჯები 7171.05 ათასი ლარის ოდენობით, თანდართული რედაქციით:

ე)  დადგენილების მე-7 მუხლი ჩამოყალიბდეს შემდეგი რედაქციით:

,,მუხლი 7. მუნიციპალიტეტის ბიუჯეტის ხარჯები

განისაზღვროს მუნიციპალიტეტის ბიუჯეტის ხარჯები 6 971,9 ათასი ლარის ოდენობით, თანდართული რედაქციით:

ვ) დადგენილების მე-8 მუხლი ჩამოყალიბდეს შემდეგი რედაქციით:

,,მუხლი 8. მუნიციპალიტეტის ბიუჯეტის არაფინანსური აქტივების ცვლილება

განისაზღვროს მუნიციპალიტეტის ბიუჯეტის არაფინანსური აქტივების ცვლილება  4857.06 ათასი ლარის ოდენობით, მათ შორის:

ა) განისაზღვროს მუნიციპალიტეტის ბიუჯეტის არაფინანსური აქტივების ზრდა 4857.06 ათასი ლარის ოდენობით, თანდართული რედაქციით:

ბ) განისაზღვროს მუნიციპალიტეტის ბიუჯეტის არაფინანსური აქტივების კლება 18 ლარის ოდენობით, მათ შორის:

ზ) დადგენილების მე-9 მუხლი ჩამოყალიბდეს შემდეგი რედაქციით:

,,მუხლი 9. მუნიციპალიტეტის ბიუჯეტის ხარჯებისა და არაფინანსური  აქტივების ზრდის ფუნქციონალური კლასიფიკაცია

განისაზღვროს მუნიციპალიტეტის ბიუჯეტის ხარჯებისა და არაფინანსური აქტივების ზრდა ფუნქციონალურ ჭრილში, თანდართული რედაქციით:

თ) დადგენილების მე-10 მუხლი ჩამოყალიბდეს შემდეგი რედაქციით:

,,მუხლი 10. მუნიციპალიტეტის ბიუჯეტის მთლიანი სალდო

განისაზღვროს მუნიციპალიტეტის ბიუჯეტის მთლიანი სალდო  -1789.14 ათასი ლარის ოდენობით“.

ი) დადგენილების მე-16 მუხლი ჩამოყალიბდეს შემდეგი რედაქციით:

,,მუხლი 16. მუნიციპალიტეტის ბიუჯეტის პრიორიტეტები და პროგრამები

1. თავდაცვა, საზოგადოებრივი წესრიგი და უსაფრთხოება

ბოლო დროს გახშირებული მიწისძვრის, სახანძრო და სხვა უბედური შემთხვევების პრევენციის მიზნით აუცილებელია პერსონალის სახანძრო და სამაშველო ტექნიკური ინვენტარით უზრუნველყოფა. პერსონალისათვის სათანადო ხარისხის ინდივიდუალური და ჯგუფური წვრთნების ჩატარება და პროფესიული დონის ამაღლება. სახანძრო სამაშველო სამსახურის შენობის რეაბილიტაცია და კომუნალური პირობების გაუმჯობესება.  საქართველოს შეიარაღებული ძალების საბრძოლო მზადყოფნის ამაღლებისათვის ქარელის მუნიციპალიტეტში ხორციელდება წვევამდელთა ჯანმრთელობის მდგომარეობის გამოკვლევა და მათი გაწვევის პუნქტებამდე ტრანსპორტირების უზრუნველყოფა.

1.1 საგანგებო სიტუაციების მართვა (პროგრამული კოდი 02 01)

ბოლო დროს გახშირებული მიწისძვრების, სახანძრო და სხვა უბედური შემთხვევების პრევენციის მიზნით სახანძრო სამაშველო სამსახურის შენობის რეაბილიტაცია და კომუნალური პირობების გაუმჯობესება. არსებული რესურსებისა და მოთხოვნების გათვალისწინებით სახანძრო და მაღალგამავლობის ავტომობილის შეძენა, რაც აუცილებელია მაშველების ოპერატიული მოქმედებისათვის.

1.2 ქვეყნის თავდაცვისუნარიანობის ამაღლების ხელშეწყობა (პროგრამული კოდი 02 03)

საქართველოს შეიარაღებული ძალების საბრძოლო მზადყოფნის ამაღლებისათვის ქარელის მუნიციპალიტეტში ხორციელდება წვევამდელთა გაწვევის პუნქტებამდე ტრანსპორტირების უზრუნველყოფა. ასევე  პროგრამის ფარგლებში ხორციელდება 17 წლამდე ჭაბუკთა პირველადი სამხედრო აღრიცხვა.ყოველი წლის გაზაფხულზე ხორციელდება მუნიციპალიტეტში მცხოვრებ რეზერვისტთა გადამოწმება.

2. ინფრასტრუქტურის მშენებლობა, რეაბილიტაცია და ექსპლოატაცია (პროგრამული კოდი 03 00)

მუნიციპალიტეტის ეკონომიკური განვითარებისათვის აუცილებელ პირობას წარმოადგენს მუნიციპალური ინფრასტრუქტურის შემდგომი გაუმჯობესება და აღნიშნული მიმართულება ბიუჯეტის ერთ-ერთ მთავარ პრიორიტეტს წარმოადგენს. პრიორიტეტის ფარგლებში გაგრძელდება საგზაო ინფრასტრუქტურის მშენებლობა-რეაბილიტაცია, ქალაქის საცხოვრებელი უბნების ეზოების, დასასვენებელი პარკების და მრავალსართულიანი საცხოვრებელი კორპუსების ეზოების და შესასვლელების კეთილმოწყობა. მუნიციპალური ინფრასტრუქტურის  მშენებლობისა და რეაბილიტაციის გარდა პრიორიტეტის ფარგლებში განხორციელდება არსებული ინფრასტრუქტურის მოვლა შენახვა და დაფინანსდება მის ექსპლოატაციასთან დაკავშირებული ხარჯები.

2.1 საგზაო ინფრასტრუქტურის მშენებლობა-რეაბილიტაცია და მოვლა-შენახვა (პროგრამული კოდი 03 01)

პროგრამის ფარგლებში განხორციელდება მუნიციპალიტეტში არსებული რეაბილიტირებული გზების მდგომარეობის შენარჩუნება, ორმოულების შეკეთება, ზამთრის სეზონზე ქუჩების თოვლისაგან გაწმენდა. რეაბილიტაცია ჩაუტარდება და მოასფალტდება ქარელისა და აგარის ასფალტის გარეშე ქუჩებს. ასევე გათვალისწინებულია მუნიციპალიტეტის სოფლების შიდა გზების მოხრეშვა-მოშანდაკება. 2014 წლის 13 იანვრის № 34 მთავრობის განკარგულებით გამოიყო 30 000 ლარი ქ.ქარელის ქუჩების გზების რეაბილიტაციის პროექტირებისთვის. 2014 წლის 20 მარტის საქართველოს მთავრობის №471 განკარგულებით სოფლის მხარდაჭერის პროგრამის ფარგლებში გამოიყო 145 272 ლარი 17 სოფელში შიდა გზებისა და ხიდების მოწყობა-რეაბილიაციისათვის. ასევე საქართველოს მთავრობის 2014 წლის 10 აპრილის №641 განკარგულებით გამოიყო 1 076 763 ლარი ქ. ქარელის ქუჩების ასფალტირების სამუშაოების დასაფინანსებლად.

2.2 კომუნალური ინფრასტრუქტურის მშენებლობა-რეაბილიტაცია და მოვლა-შენახვა (პროგრამული კოდი 03 02)

პროგრამის ფარგლებში დაგეგმილია გარე განათების ქსელის გაფართოვება, არსებული ქსელის მოვლა-შენახვა.  დაფინანსდება მის ექსპლოატაციასთან დაკავშირებული ხარჯები, უზრუნველყოფილი იქნება მუნიციპალიტეტის დასუფთავება, მოეწყობა და რეაბილიტაცია ჩაუტარდება საკანალიზაციო და წყლის სისტემებს, დაფინანსდება სარწყავი არხებისა და ნაპირსამაგრი ნაგებობების მოწყობა-რეაბილიტაციასთან დაკავშირებული ხარჯები.

2.2.1 გარე განათების მოწყობა, რეაბილიტაცია და ექსპლოატაცია (პროგრამული კოდი 03 02 01)

დღე-ღამის ნებისმიერ დროს მოსახლეობის კომფორტული და უსაფრთხო გადაადგილებისათვის აუცილებელ პირობას წარმოადგენს მუნიციპალიტეტის განათება, რისი გათვალისწინებითაც ქვეპროგრამის ფარგლებში დაფინანსდება გარე განათების არსებული ქსელის ექსპლოატაცია. ასევე იგეგმება მუნიციპალიტეტის სოფლებში გარე განათების ქსელის გაფართოვებაც.მიმდინარე წელს ექსპულატაციაში შევიდა სოფელ ბრეთის, ქვემო ხვედურეთის,კეხიჯვრის,დირბის,ბრეთის მეურნეობის დაბა აგარის და სოფელ ბებნისის გარე განათებები.რომელშიც დაიხარჯა  65 999 ლარი.

2.2.2 დასუფთავების ღონისძიებები (პროგრამული კოდი 03 02 02)

მუნიციპალიტეტის ერთ-ერთ მთავარ ფუნქციას წარმოადგენს  სანიტარული მდგომარეობის უზრუნველყოფა, შესაბამისად ქვეპროგრამის ფარგლებში გავალისწინებულია მუნიციპალიტეტის ყოველდღიური დაგვა–დასუფთავება და ნარჩენების გატანა. აღნიშნული  პროგრამა მოიცავს ქ. ქარელის, დ. აგარის, სოფლების: ქვენატკოცა,  ბებნისი, ქვემო ხვედურეთი, ზემო ხვედურეთი, კეხიჯვარი, ქობესაანთ უბანი, თათანაანთ უბანი, სამწევრისი, რუისი,  ურბნისი, ბრეთი, საღოლაშენი, არადეთი, წვერი, სასირეთი, ბრეთის მეურნეობა, ძლევიჯარი მოსახლეობიდან, ასევე ორგანიზაცია-დაწესებულებებიდან, აგრეთვე სოფ. ახალსოფლის და სოფ. მოხისის დევნილთა ჩასახლებებიდან ნარჩენების გატანის და  ქუჩების დაგვა-დასუფთავების ღონისძიებებს.  აღნიშნულ პროგრამაში ასევე ჩაერთო და ნარჩენების გატანა მოხდება სოფელ დირბში, ახალსოფლში და მოხისში მცხოვრები მოსახლეობიდან. ასევე შეძენილია 60 ცალი ნაგვის ურნა 41 940 ლარის ღირებულების. ქვეპროგრამის ფარგლებში ზამთრის პერიოდში განხორციელდება გზების ტენიკური მარილით დამუშავება, ხოლო დიდთოვლიანობის შემთხვევაში ჭარბი თოვლისგან გათავისუფლება.

2.2.3 საკანალიზაციო სისტემების მოწყობა და რეაბილიტაცია (პროგრამული კოდი 03 02 03)

ქვეპროგრამის ფარგლებში დაგეგმილია ქარელში და აგარაში საკანალიზაციო სისტემის რეაბილიტაცია. აღნიშნული პროგრამის განხორციელება მცხოვრებლებს გადაუჭრის წლების განმავლობაში არსებულ საკანალიზაციო სისტემასთან დაკავშირებულ პრობლემებს. 2014 წლის 20 თებერვლის №306 მთავრობის განკარგულებით გამოიყო 8175 ლარი ქ.ქარელის  და დაბა აგარის საკანალიზაციო სისტემის რეაბილიტაციის პროექტირებისთვის.

2.2.4   წყლის სისტემის რეაბილიტაცია და ექსპლოატაცია (პროგრამული კოდი 03 02 05)

მუნიციპალიტეტის ზოგიერთ სოფელში ჯერ კიდევ არსებობს სასმელი წყლის პრობლემები. მოძველებულია და მწყობრიდანაა გამოსული სასმელი წყლის შემკრები აუზები და შიდა გაყვანილობები. ქვეპროგრამის ფარგლებში 2014 წელს რეაბილიტაცია ჩაუტარდება სოფ. ზ/ხვედურეთის სასმელი წყლის სისტემას რაც დაჯდა 370 000ლარი რამაც  გააუმჯობესა  მოსახლეობას ყოველდღიურ საყოფაცხოვრებო პირობები. 2014 წლის 20 მარტის საქართველოს მთავრობის №471 განკარგულებით სოფლის მხარდაჭერის პროგრამის ფარგლებში რეაბილიტაცია ჩაუტარდება მუნიციპალიტეტის 21 სოფლის სასმელი წყლის სისტემებს, რაც მოსახლეობას გადაუჭრის წლების განმავლობაში არსებულ პრობლემებს და გაუუმჯობესებს ყოველდღიურ საყოფაცხოვრებო პირობებს. აღნიშნული პრობლემის მოსაგვარებლად გამოყოფილია 120 257 ლარი.

2.2.5  სოფლის ცენტრების, სკვერების და პარკების  მოწყობა (პროგრამული კოდი 03 02 06)

მოსახლეობის დასვენების მიზნით 2014 წლის 20 მარტის საქართველოს მთავრობის №471 განკარგულებით გამოყოფილი თანხებით სოფლის მხარდაჭერის პროგრამის ფარგლებში განხორციელდება სკვერის მოწყობის სამუშაოები სოფლებში: აბისისთავი, აგარა, თათანაანთ უბანი, რუისი.

2.2.6  საკადასტრო რუკების მომზადება (პროგრამული კოდი 03 02 07)

ქვეპროგრამის ფარგლებში განხორციელდება მუნიციპალიტეტის ბალანსზე რიცხული შენობა-ნაგებობების და მიწების ელექტრონული ნახაზებისა და საკადასტრო გეგმების მომზადება.

2.2.7  სარწყავი არხებისა და ნაპირსამაგრი ნაგებობების მოწყობა, რეაბილიტაცია და ექსპლოატაცია (პროგრამული კოდი 03 02 08)

მუნიციპალიტეტის ზოგიერთ სოფელში ჯერ კიდევ არსებობს სარწყავი წყლის პრობლემა, ხშირად საჭირო ხდება სარწყავი არხებისა და მდინარეების კალაპოტების გაწმენდა. ქვეპროგრამის ფარგლებში იგეგმება მუნიციპალიტეტის ტერიტორიებზე არსებული ირიგაციის სისტემის სარეაბილიტაციო და მოვლა-შენახვის  სამუშაოები. 2014 წლის 20 იანვრის № 78 მთავრობის განკარგულებით ძამის კალაპოტის გამაგრების სამუშაოების ჩასატარებლად გამოიყო 803 410 ლარი.

ქვეპროგრამის ფარგლებში ასევე იგეგმება სოფლების: მეხეთი, ორთუბანი და ქობესაანთ უბანი სარწყავი სისტემების მოწყობა 2014 წლის 20 მარტის საქართველოს მთავრობის №471 განკარგულებით (სოფლის მხარდაჭერის პროგრამა) გამოყოფილი  თანხებით (10 749 ლარი), რაც საშუალებას მისცემს სოფლის მოსახლეობას გაზარდონ საკუთარი შრომის ნაყოფიერება.

2.2.8  ბინათმშენებლობა (პროგრამული კოდი 03 02 10)

საქართველოს მთავრობის 2014 წლის 20 მარტის №471 განკარგულებით (სოფლის მხარდაჭერის პროგრამა) გამოყოფილი  თანხებით ქვეპროგრამის ფარგლებში განხორციელდება სოფ. ყინწვისში და ბანში წისქვილის, სოფლებში: ჯაგარაანთკარი, კუდატყე, ტყემალა, ტყემლოვანა მზის ენერგიის გამოყენებით და მინი ჰესის მოწყობით ელექტრო ენერგიის სისტემების მოწყობის და წიფლოვანაში ელ. ენერგიის ტრანსფორმატორის მონტაჟის სამუშაოები. აღნიშნული ქვეპროგრამა ხელს შეუწყობს მთის სოფლებიდან მოსახლეობის მიგრაციის შეჩერებას და მოსახლეობის სოფლებში დაბრუნებას.

2.3  მუნიციპალიტეტის კეთილმოწყობის ღონისძიებები (პროგრამული კოდი 03 04)

პროგრამის ფარგლებში განხორციელდება მუნიციპალიტეტში არსებული სკვერებისა და პარკების კეთილმოწყობის სამუშაოები, მოწესრიგდება გამწვანების ზოლები, მოეწყობა საბავშვო და სპორტული სტადიონები, სადღესასწაულო დღეებში დაგეგმილია ქალაქ გაფორმებითი ღონისძიებები.

2.3.1 გამწვანების ღონისძიებები (პროგრამული კოდი 03 04 01)

ქვეპროგრამის ფარგლებში განხორციელდება არსებული სკვერებისა და პარკების მოვლა, ახალი ხეების დარგვა და გამწვანების ზოლებში ყვავილებისა და სხვა დეკორატიული მცენარეების განაშენიანება. გამწვანების ზოლი მოეწყობა ქარელში ნინოშვილის, 9 აპრილის, სტალინის ქუჩებზე და დაბა აგარის სკვერში, ხოლო ახალი ხეები დაირგვება ქარელში სტალინისა და ჭავჭავაძის ქუჩებზე. აღნიშნული ქვეპროგრამა ასევე ითვალისწინებს ქ. ქარელში ნინოშვილის ქუჩაზე არსებული შადრევნის მოვლა-შენახვას.

2.3.2   ქალაქის ქუჩების, შენობების, ეზოებისა და სკვერების კეთილმოწყობა (პროგრამული კოდი 03 04 02)

ქალაქის ქუჩებისა და საზოგადოებრივი მნიშვნელობის შენობა-ნაგებობების კეთილმოწყობის მიზნით ქვეპროგრამის ფარგლებში დაგეგმილია ქ. ქარელში კულტურის სახლის მიმდებარე ტერიტორიის კეთილმოწყობა. კულტურის სახლის მიმდებარე ტერიტორიების კეთილმოწყობა მნიშვნელოვნად შეუწყობს ხელს ადგილობრივი მოსახლეობის კულტურულ განვითარებას და დასვენებას.

2.3.3 სპორტული მოედნების მოწყობა (პროგრამული კოდი 03 04 03)

ქვეპროგრამის ფარგლებში დაგეგმილია ქ. ქარელში სპოტრული მოედნის მოწყობის  და საქართველოს მთავრობის 2014 წლის 20 მარტის №471 განკარგულებით (სოფლის მხარდაჭერის პროგრამა) გამოყოფილი  თანხებით სოფ. ბერძენაულში სპორტული მოედნის შემოღობვის სამუშაოები, რაც ხელს შეუწყობს ახაგაზრდობაში ჯანსაღი ცხოვრების წესის დამკვიდრებას.

2.3.4   სარიტუალო სახლების მშენებლობა და აღჭურვა (პროგრამული კოდი 03 04 04)

სოფლების ცხოვრების დონის ამაღლებისა და სხვადასხვა საზოგადოებრივი პრობლემების მოგვარების მიზნით საქართველოს მთავრობის 2014 წლის 20 მარტის №471 განკარგულებით სოფლის მხარდაჭერის პროგრამის ფარგლებში, 30 სოფელში ჩატარდება სარიტუალო დარბაზების მშენებლობების სამუშაოები და მოხდება მათი ნაწილის ინვენტარით აღჭურვა.

2.3.5 ეკლესიებისა და სასაფლაოების შემოღობვა (პროგრამული კოდი 03 04 05)

სხვადასხვა საზოგაროებრივი პრობლემების მოგვარების მიზნით საქართველოს მთავრობის 2014 წლის 20 მარტის №471 განკარგულებით სოფლის მხარდაჭერის პროგრამის ფარგლებში, 6 სოფელში: აბანო, ძლევიჯვარი, სანებელი, კოდავარდისუბანი, ფცა, თამარაშენი ჩატარდება სასაფლაოების შემოღობვის სამუშაოები. 

3. განათლება (პროგრამული კოდი 04 00)

მუნიციპალიტეტის ერთ-ერთი პრიორიტეტია ახალგაზრდების სწავლა-განათლება  და მათი მრავალმხრივი განვითარების ხელშეწყობა როგორც სკოლამდელი, ასევე სკოლისშემდგომი ასაკის ახალგაზრდებისათვის. შესაბამისად, მუნიციპალიტეტი განაგრძობს საგანმანათლებლო ობიექტების ფინანსურ მხარდაჭერას და შესაბამისი პირობების შექმნას, რათა ბავშვებმა და ახალგაზრდებმა შეძლონ საფუძვლის შექმნა მათი შემდგომი განვითარებისათვის. მომავალი თაობების აღზრდის მიმართულებით დაწყებითი და ზოგადი განათლების გარდა მნიშვნელოვანი როლი ენიჭება ასევე სკოლამდელ განათლებას, რაც თვითმმართველი ერთეულის საკუთარ უფლებამოსილებებს განეკუთვნება და შესაბამისად მუნიციპალიტეტის ერთ-ერთ პრიორიტეტს წარმოადგენს, რომლის ფარგლებში მომდევნო წლებში განხორციელდება საბავშვო ბაღების გახსნა და მათი ფუნქციონირებისათვის საჭირო ხარჯების დაფინანსება, მათი რეაბილიტაცია, ინვენტარით უზრუნველყოფა.

3.1 სკოლამდელი განათლების დაფინანსება (პროგრამული კოდი 04 01)

ადამიანის სწორი განვითარებისათვის ერთ-ერთი მთავარი პირობაა სკოლამდელი აღზრდა.  მუნიციპალიტეტში ამ ეტაპზე ფუნქციონირებს 14 საბავშვო ბაღი, სადაც დაწყებით განათლებას იღებს  980-ზე მეტი აღსაზრდელი.  პროგრამის ფარგლებში დაფინანსდება მუნიციპალიტეტში მოქმედი ყველა საბავშვო ბაღის მიმდინარე ხარჯები და დაგეგმილია უმეტესი აღნიშნული საბავშვო ბაღების სარემონტო სამუშაოები. აღნიშნული ქვეპროგრამით მუნიციპალიტეტი ხელს უწყობს დასაქმებულთა სტაბილურ შრომის ანაზღაურებას, კვების და მატერიალური ბაზის გაუმჯობესებას.

სკოლამდელი განათლების ხელშეწყობის მიზნით სოფლის მხარდაჭერის პროგრამის ფარგლებში განხორციელდება დაბა აგარის, სოფ. ქვენატკოცის, კეხიჯვარის და რუისის საბავშვო ბაღების რეაბილიტაციის სამუშაოები.

3.2 მოსწავლე ახალგაზრდობის სახლის ხელშეწყობა (პროგრამული კოდი 04 03)

მუნიციპალიტეტის ერთ-ერთ მთავარ მიზანს წარმოადგენს ხელი შეუწყოს მოსახლეობას დასაქმებაში და მიცეს საშუალება დაეუფლონ იმ უნარ-ჩვევებს რაც ხშირ შემთხვევაში აუცილებელი პირობაა სტაბილური დასაქმებისათვის. აღნიშნული მიზნით პროგრამის ფარგლებში დაფინასდება ქარგვის, ხალიჩების ქსოვის, თექაზე მუშაობის, კულინარიის და სხვადასხვა მუსიკალურ ინტრუმენტებზე დაკვრის შემსწავლელი კურსები. მუნიციპალიტეტის ყველა მაცხოვრებელს ექნება საშუალება შესაბამისი განაცხადის საფუძველზე გაიაროს აღნიშნული კურსები, რაც აამაღლებს მათ კვალიფიკაციას და ხელს შეუწყობს მათ შემდგომ დასაქმებას.

4. კულტურა, რელიგია ახალგაზრდობის ხელშეწყობა და სპორტი (პროგრამული კოდი 05 00)

მუნიციპალიტეტის ინფრასტრუქტურული და ეკონომიკური განვითარების პარალერულად აუცილებელია ხელი შეეწყოს კულტურული ტრადიციების დაცვას და ღირსეულ გაგრძელებას. ამასთანავე, ერთ-ერთი პრიორიტეტია ახალგაზრდების მრავალმხრივი (როგორც სულიერი, ისე ფიზიკური თვალსაზრისით) განვითარების ხელშეწყობა და მათში ცხოვრების ჯანსაღი წესის დამკვიდრება. შესაბამისად, მუნიციპალიტეტი განაგრძობს კულტურული ობიექტების ფინანსურ მხარდაჭერას, წარმატებული სპორტსმენების ხელშეწყობას და შესაბამისი პირობების შექმნას, რათა ნიჭიერმა ბავშვებმა და ახალგაზრდებმა შეძლონ მათი სპორტული შესაძლებლობების გამოვლენა.

4.1 სპორტის განვითარების ხელშეწყობა (პროგრამული კოდი 05 01)

პროგრამის ფარგლებში განხორციელდება სხვადასხვა სპორტული ორგანიზაციების და კლუბების ფინანსური მხარდაჭერა, რათა მათ ქონდეთ შესაძლებლობა უზრუნველყონ სპორტსმენებისათვის სავარჯიშოდ შესაბამისი პირობების შექმნა და ნიჭიერი სპორტსმენების წახალისება.

4.1.1 სპორტული ღონისძიებების დაფინასება (პროგრამული კოდი 05 01 01)

2014 წლის განმავლობაში პროგრამის ფარგლებში გაიმართება სხვადასხვა სპორტული შეჯიბრებები. ახალგაზრდებში ჯანსაღი ცხოვრების წესის დამკვიდრების მიზნით დაგეგმილია სპორტის სახეობათა პოპულარიზაცია მუნიციპალიტეტის მოსახლეობაში, მუნიციპალიტეტის სპორტსმენთა მონაწილეობის მიღება რეგიონალურ, სახელობით, რესპუბლიკურ, საერთაშორისო ტურნირებზე, მოწინავე სპორტსმენების ოსტატობის ამაღლების და ფიზიკური მოზადებისათვის სასწავლო-საწრთვნელი და გამაჯანსაღებელი შეკრებების მოწყობა. 2014 წლის განმავლობაში 550 სპორტსმენი გაივლის სპორტულ მომზადებას.

4.2 კულტურის განვითარების ხელშეწყობა (პროგრამული კოდი 05 02)

მუნიციპალიტეტის კულტურული ტრადიციების დაცვის მიზნით პროგრამის ფარგლებში გაგრძელდება სხვადასხვა კულტურული ობიექტების ფინანსური მხარდაჭერა, ასევე განხორციელდება სხვადასხვა კულტურული ღონისძიებები, მათ შორის სადღესასწაულო დღეებში სხვადასხვა გასართობი და სანახაობრივი ღონისძიებები.

4.2.1 კულტურული ღონისძიებების დაფინანსება (პროგრამული კოდი 05 02 01)

ქვეპროგრამის ფარგლებში დაგეგმილია მუნიციპალიტეტში მცხოვრები მოსახლეობისათვის კულტურული და გასართობი ღონისძიებების მოწყობა. სხვადასხვა დღესასწაულებისადმი მიძღვნილი ღონისძიებების ორგანიზება. აღნიშნული ღონისძიებები ხელს შეუწყობს მუნიციპალიტეტში არსებული შემოქმედებითი კოლექტივების გამოვლენასა და მათ შემდგომ განვითარებას. მიმდინარე წელს მუნიციპალიტეტში დაგეგმილია შემდეგი სახის კულტურული ღონისძიების მოწყობა:

ა) ქალთა და დედის დღისადმი მიძღვნილი ღონისძიება  შეხვედრა მრავალშვილიან დედებთან;

ბ)1989 წლის 9 აპრილს დაღუპულთა ხსოვნისადმი რეკვიემი;

გ) აღდგომის ბრწ. დღესასწაულისადმი მიძღვნილი ღონისძიება;

დ) ხელოვნების ნიმუშების გამოფენა-გაყიდვა;

ე) 9 მაისისადმი მიძღვნილი ღონისძიება შეხვედრა ომის ვეტერანებთან;

ვ) საქართველოს დამოუკიდებლობის აღდგენის დღისადმი მიძღვნილი საზეიმო ღონისძიება;

ზ) პოეზიის საღამო;

თ) მუნიციპალიტში მცხოვრები ღვაწლმოსილი კულტურის მუშაკების დაჯილდოება, ღონისძიების მოწყობა;

ი) 2008 წლის აგვისტოში რუსეთის აგრესიის შედეგად დაღუპულთა ხსოვნისადმი მიძღვნილი ღონისძიება;

კ) კონცერტი მუნიციპალიტეტის შემოქმ. კოლექტივების მონაწილეობით;

ლ) ადგილობრივი ტურიზმის პოპულარიზაცია;

მ)საეკლესიო და ხალხური საგალობლების ფესტივალი;

ნ) ადგილობრივი სოფლის მეურნეობის პროდუქტების გამოფენა;

ო) ზაზა ფანასკერტელის სახელობის სახალხო დღესასაწაული;

პ) პრესტური – ჟურნალისტებისა და ტურისტული კომპანიებისათვის საინფორმაციო ტურის მოწყობა ქარელის მუნიციპალიტეტში ღირსშესანიშნავ ადგილებში;.

ჟ) საახალწლო ღონისძიებების კვირეული;

რ) რეგიონალური, რესპუბლიკური და საერთაშორისო ღონისძიებებში შემოქმედებითი კოლექტივების მონაწილეობა;

ს) სხვა ინიციატივები;

ტ) პერსონალური გამოფენების კვირეული მუნიციპალიტეტში მოღვაწე მხატვრების მონაწილეობით;

უ) ექსკურსია ახალგაზრდებისათვის კონკურსებში გამარჯვებული ბავშვებისათვის .

4.2.2 სახელოვნებო სკოლების ხელშეწყობა (პროგრამული კოდი 05 02 02)

ქვეპროგრამის ფარგლებში დაგეგმილია მუნიციპალიტეტში არსებული ორი სახელოვნებო და ორი მუსიკალური სკოლა, სადაც სწავლობს 350-მდე ბავშვი. სასწავლო წლის განმავლობაში ერთ მოსწავლეზე გადასახადი შეადგენს 100 ლარს, რაც არ არის საკმარისი მოსწავლეთა სწავლებისათვის და სხვადასხვა კონკურსებსა და ფესტივალებში მონაწილეობის მისაღებად.  აღნიშნული პროგრამის განხორციელება ხელს შეუწყობს სხვადასხვა კონკურსებისა და ფესტივალების ჩატარების უზრუნველყოფას.

4.2.3 ბიბლიოთეკების ხელშეწყობა (პროგრამული კოდი 05 02 03)

ქვეპროგრამის ფარგლებში დაგეგმილია მუნიციპალიტეტში არსებული ბიბლიოთეკების დაფინანსება. ქვეპროგამის მიზანია მუნიციპალიტეტსა და მის საზღვრებს გარეთ მცხოვრები მკითხველების სწრაფი და სრული დაკმაყოფილება მათთვის საჭირო ინფორმაციითა და საბიბლიოთეკო დოკუმენტებით (ბეჭდური,  ხელნაწერი და ინფორმაციის შემცველი სხვა მასალები), შესაბამისი პროფილის საბიბლიოთეკო დოკუმენტების შეგროვება, დაცვა და ამ დოკუმენტებით მომსახურება, როგორც ადგილზე გაცემით, ასე ასლების გაგზავნით ბიბლიოთეკათშორისი აბონემენტით და საერთაშორისო წიგნთგაცვლის საშუალებით, ბიბლიოთეკათმცოდნეობის, ბიბლიოგრაფიის, წიგნთმცოდნეობისა და ინფორმაციის დარგში მეცნიერული და მეთოდური მოღვაწეობისათვის ხელშეწყობა. ბიბლიოთეკის კულტურულ ფასეულობათა შენარჩუნების, გამდიდრების, რეგისტრაციისა და მათი საგანგებო რეჟიმით დაცვის ხელშეწყობა. ბიბლიოთეკის მატერიალურ-ტექნიკური ბაზის განმტკიცება და ამ მიმართულებით წარმოდგენილი სპეციალური პროგრამების მხარდაჭერა, არსებული წიგნადი ფონდის გადარჩევა და მომზადება ელექტრონული საინფორმაციო ბაზისათვის, წიგნადი ფონდის შევსება თანამედროვე ლიტერატურით.

4.2.4 კულტურის სახლისა და სოფლის კლუბების ხელშეწყობა (პროგრამული კოდი 05 02 04)

ქვეპროგრამის ფარგლებში დაფინანსდება მუნიციპალიტეტში არსებული 3 სოფლის კლუბი და ერთი ქალაქის კულტურის სახლი, სადაც ფუნქციონირებს სახალხო თეატრი, თოჯინების თეატრი, ბავშვთა დრამატური თეატრი და ქორეოგრაფიული წრეები.

4.2.5 მუზეუმების ხელშეწყობა (პროგრამული კოდი 05 02 05)

ქვეპროგრამის ფარგლებში დაფინანსდება ქარელის მხარეთმცოდნეობის მუზეუმი, სადაც დაცულია დედოფლის მინდორზე არქეოლოგიური გათხრების შედეგად მოპოვებული მრავალი სამუზეუმო ექსპონანტი.

4.2.6 მუსიკალური კოლექტივების დაფინანსება (პროგრამული კოდი 05 02 06)

მუნიციპალიტეტში ფუნქციონირებს ფოლკლორული ანსამბლი „ქარელი“, რომელსაც სრულად აფინანსებს მუნიციპალიტეტი, აღნიშნული ანსამბლი ორიენტირებულია ქართული ხალხური სომღერების პოპულარიზაციისკენ და სტაბილურად მონაწილეობს სხვადასხვა ფესტივლებსა და კონკურსებში.

4.2.7 კულტურის ხელშეწყობის სხვა ღონისძიებები (კულტურის გაერთიანების ადმინისტრაციული ხარჯი) (პროგრამული კოდი 05 02 08)

ქვეპროგრამის ფარგლებში დაფინანსდება ა(ა)იპ „კულტურის დაწესებულებების გაერთიანების“ ადმინისტრაციის ხარჯი, რომელიც უზრუნველყოფს კულტურის სფეროში შემავალი დაწესებულებების ადმინისტრირებას და კულტურული ღონისძიებების ორგანიზებას.

4.3 ახალგაზრდული პროგრამების დაფინანსება (პროგრამული კოდი 05 03)

პროგრამის ფარგლებში დაფინანსდება სხვადასხვა ღონისძიებები, რომლებიც ხელს შეუწყობს ახალგაზრდა თაობის ჩართვას მუნიციპალიტეტის ყოველდღიურ საქმიანობასა და მის განვითარებაში. პროგრამის ფარგლებში დაფინანსდება შემდეგი ღონისძიებები:

ა) მუნიციპალიტეტში მცხოვრები უნარშეზღუდული ბავშვების მონახულება;

ბ) დედის დღისადმი მიძღვნილი ღონისძიება და სამშობიარო სახლში ახალშობილების და დედების მონახულება;

გ) საქართველოს დამოუკიდებლობისა და ტერიტორიული მთლიანობისთვის დაღუპულ მამულიშვილთა ხსოვნისდმი მიძღვნილი ღონისძიებები;

დ) ლიტერატურული კონკურსი;

ე) ბავშვთა თოჯინური სპექტაკლი;

ვ) ბავშვთა საერთაშორისო დაცვის დღისადმი მიძღვნილი ღონისძიება;

ზ) ექსკურსია; 

ზ.ა) ნიჭიერი ახალგაზრდებისათვის; 

ზ.ბ) უნარშეზღუდული ბავშვებისათვის;

თ) ქორეოგრაფიული ცეკვის და ხალხური სიმღერების კონცერტი;

ი) ფოტოკონკურსი;

კ) შეზღუდული შესაძლებლობების მქონე პირთა დაცვის დღისადმი მიძღვნილი ღონისძიებები;

ლ) ნიჭიერი და წარმატებული მოსწავლე- ახალგაზრდების წახალისება (ფინანსური მხარდაჭერა);

მ) წარმატებული ბავშვებისა და ახალგაზრდების სხვადასხვა კონკურსებში და შესარჩევ ტურებში მონაწილეობა;

ნ) ინტელექტუალური თამაში რა, სად როდის?;

ო) მუნიციპალიტეტის ახალგაზრდების მონაწილეობა სხვადასხვა მასობრივ რესპუბლიკურ ღონისძიებებში;

პ) მუნიციპალიტეტის შემოქმედებითი კოლექტივების მონაწილეობა რესპუბლიკურ ღონისძიებებში;

ჟ) საახალწლო ღონისძიებები;

რ) სხვა ინიციატივები;

ს) გაუთვალისწინებელი ღონისძიებები.

4.4 რელიგიური ორგანიზაციების ხელშეწყობა (პროგრამული კოდი 05 04)

პროგრამის ფარგლებში განხორციელდება მუნიციპალიტეტის ტერიტორიაზე არსებული ეკლესია მონასტრების ფინანსური მხარდაჭერა, ასევე ზოგიერთ ტაძარსა და მის მიმდებარე ტერიტორიაზე განხორციელდება სარეაბილიტაციო სამუშაოები.

5. მოსახლეობის ჯანმრთელობის დაცვა და სოციალური უზრუნველყოფა (პროგრამული კოდი 06 00)

მოსახლეობის ჯანმრთელობის დაცვის ხელშეწყობა და მათი სოციალური დაცვა მუნიციპალიტეტის ერთ-ერთ მთავარ პრიორიტეტს წარმოადგენს. მუნიციპალიტეტი არსებული რესურსების ფარგლებში განაგრძობს სოციალურად დაუცველი მოსახლეობის სხვადასხვა დახმარებების და შეღავათების უზრუნველყოფას. ერთიანი სახელმწიფო პოლიტიკის ფარგლებში გაგრძელდება საზოგადოებრივი ჯანმრთელობის დაცვის მიზნით ადგილობრივ დონეზე სხვადასხვა ღონისძიებების განხორციელება, რაც უზრუნველყოფს არა მხოლოდ მუნიციპალიტეტის, არამედ მთელი ქვეყნის მოსახლეობის ჯანმრთელობის დაცვას სხვადასხვა გადამდები და ინფექციური დაავადებებისაგან.

5.1 საზოგადოებრივი ჯანდაცვის მომსახურება (პროგრამული კოდი 06 01)

პროგრამა ითვალისწინებს სახელმწიფო ბიუჯეტიდან გამოყოფილი მიზნობრივი ტრანსფერის ფარგლებში „საზოგადოებრივი ჯანმრთელობის შესახებ“ საქართველოს კანონით განსაზღვრული ფუნქციების დაფინანსებას, კერძოდ:

ა) არსებობის შემთხვევაში ცოფის კერის ლიკვიდაცია და დაკბენილი მოსახლეობის ზუსტი აღრიცხვა, სასწრაფო შეტყობინების სისტემის დახვეწა და გაუმჯობესება;

ბ) დაავადებათა გავრცელების ეტაპობრივი შემცირება მისი კონტროლის გზით. ეპიდსიტუაციის გამწვავების დროული გამოვლენის ხელშეწყობა და მათზე სწრაფი რეაგირება, პროფილაქტიკურ ღონისძიებათა გატარება;

გ) მუნიციპალიტეტის მოსახლეობაში არაგადამდებ დაავადებათა პრევენციის და ჯანმრთელობაზე მავნე ფაქტორების ზემოქმედებაზე მოსახლეობის ინფორმირების გზით ჯანმრთელობის დაცვის ხელშეწყობა;

დ) სადერატიზაციო სამუშაოების ჩატარება საცხოვრებელი სახლების სარდაფებსა და ბუნკერებში (კერძო სექტორის გარდა) და ამის საფუძველზე ქალაქში ეპიდსიტუაციის გაუმჯობესება;

ე) ჯანმრთელობისათვის მნიშვნელოვანი ინფექციური და არაგადამდები დაავადებებისა და მასობრივი მოშხამვების, აგრეთვე პროფესიული დაავადებების თავიდან აცილება;

ვ) მუნიციპალიტეტში არსებული სანიტარულ-ჰიგიენური მგომარეობის მონიტორინგი, მოსახლეობისათვის ჯანსაღი გარემოს შექმნის ხელშეწყობის მიზნით მუნიციპალიტეტის დასახლებულ ტერიტორიებზე ადამიანისათვის საშიში და შხამიანი ცხოველების ცხოველმყოფელობის დადგენისა და გაუვნებელყოფის ღონისძიებები.

5.2 მოსახლეობის სოციალური უზრუნველყოფა (პროგრამული კოდი 06 02)

პროგრამა ითვალისწინებს მუნიციპალიტეტის ტერიტორიაზე მცხოვრები მოსახლეობის სხვადასხვა ფენებისათვის გარკვეული შეღავათებითა და სოციალური დახმარებებით უზრუნველყოფას. სახელმწიფო ბიუჯეტიდან გამოყოფილი მიზნობრივი ტრანსფერის ფარგლებში კანონმდებლობით გათვალისწინებული სარიტუალო მომსახურების ხარჯების ანაზღაურებას, მოხუცებულთა, მიუსაფართა და სოციალურად დაუცველთა კვებით და საცხოვრებელი ფართით უზრუნველყოფას, დემოგრაფიული მდგომარეობის გაუმჯობესების მიზნით მრავალშვილიანი ოჯახების დახმარებას და სხვა სოციალურ ღონისძიებებს, რომლებიც მთლიანობაში უზრუნველყოფენ მუნიციპალიტეტის მოსახლეობის სოციალური მდგომარეობის გაუმჯობესებას.

5.2.1 უფასო სასადილოს დაფინანსება (პროგრამული კოდი 06 02 01)

„ქვეპროგრამის ფარგლებში გათვალისწინებულია უმწეო მდგომარეობაში მყოფი მუნიციპალიტეტში მცხოვრები 70 ბენეფიციარის ყოველდღიური კვებით უზრუნველყოფა.

5.2.2 დევნილთა დასახლებებში გარე განათებებისა და წყლის ტუმბოების ელექტროენერგიის დავალიანებების დაფარვა (პროგრამული კოდი 06 02 03)

ქარელის მუნიციპალიტეტის ტერიტორიაზე მცხოვრები დევნილი მოსახლეობის სოციალური ყოფის გაუმჯობესების მიზნით, ქვეპროგრამის ფარგლებში  დაგეგმილია დევნილთა დასახლებებში გარე განათებებისა და წყლის ტუმბოების მიერ მოხმარებული ელექტროენერგიის საფასურის დაფარვა.

5.2.3 ოჯახებისა და ბავშვთა სოციალური დაცვა (პროგრამული კოდი 06 02 04)

საქართველოში  დღეის მდგომარეობით არსებობს სხვადასხვა სახის ჯანმთელობის დაზღვევის პროგრამები, 2013 წლის 1 ივლისიდან ამოქმედდა საყოველთაო ,,ჯანმრთელობის დაცვის სახელმწიფო პროგრამა.”რომელიც სრულად არ აფინანსებს ყველა სახის  მკურნალობასა და ოპერაციას , აქედან გამომდინარე ქარელის მუნიციპალიტეტში დამუშავდა პროგრამა, რომელიც ითვალისწინებს ისეთი სახის მკურნალობის ან ოპერაციის თანადაფინანსებას 40%-ით, რომლებიც არ არის გათვალისწინებული სადაზღვევო პაკეტების მომსახურებაში და საყოველთაო ჯანდაცვის პროგრამაში. (შეიძლება გათვალისწინებულ იქნეს შემთხვევები, როდესაც ადამიანი არ არის რეგისტრირებული სუბსიდიების სააგენტოში და არის სოციალურად გაჭირვებული, ამასთან არ აქვს საშუალება მკურნალობის სრულად დაფინანსების) ასევე გათვალისწინებული იქნება ის შემთხვევები, როდესაც მოქალაქეს აქვს პოლისი, ან დაზღვევა, მაგრამ არ უნაზღაურდება ოპერაციის და მკურნალობის ხარჯები სრულად, ასეთ შემთხვევაში მოქალაქეს გაეწევა დახმარება თანადაფინანსებით.

ა) იმ შემთხვევაში, თუ სხვადასხვა  სახის  ჯანმრთელობის დაზღვევის პროგრამებით დაფინანსებული მკურნალობის ან ოპერაციის ღირებულების აუნაზღაურებელი  ნაწილის 40 %  არ აღემატება 500 ლარს თანადაფინანსება განხორციელდება 500 ლარით;

ბ) თუ სხვადასხვა სახის  ჯანმრთელობის დაზღვევის პროგრამებით დაფინანსებული მკურნალობის ან ოპერაციის ღირებულების აუნაზღაურებელი ნაწილის 40 % - აღემატება 500 ლარს,  თანადაფინანსება განხორციელდება დაუფინანსებელი თანხის 40%-თ;

გ) 10 000 ლარის თანადაფინანსება განხორციელდება მთლიანი თანხის 40% -ით;

დ) თუ მკურნალობის ღირებულება აღემატება 10 000 ლარს თანადაფინანსება მოხდება 4000 ლარის ოდენობით.

5.2.4  სარიტუალო მომსახურება (პროგრამული კოდი 06 02 05)

ქვეპროგრამის ფარგლებში გათვალისწინებულია:

ა) სამშობლოს დაცვისას დაღუპულთა და ომის შემდეგ გარდაცვლილ მეომართა დაკრძალვის ხარჯების ანაზღაურება, თითოეულ ბენეფიციარზე 250 ლარის ოდენობით (მიზნობრივი ტრანსფერის ფარგლებში);

ბ) მუნიციპალიტეტის ტერიტორიაზე მცხოვრები მარტოხელა სოციალურად დაუცველ პირთა დაკრძალვის ხარჯების ანაზღაურება, თითოეულ ბენეფიციარზე 250 ლარის ოდენობით;

5.2.5 სოფ. ურბნისის მოსახლეობისათვის სატუმბი სადგურის მოერ მოხმარებული ელენერგიის დავალიანების დაფარვა  (პროგრამული კოდი 06 02 06)

ქვეპროგრამის ფარგლებში დაგეგმილია სოფ. ურბნისის მოსახლეობისათვის სატუმბი სადგურის მიერ მოხმარებული ელენერგიის დავალიანების დაფარვა 

5.2.6 სტიქიური უბედურებების შედეგად დაზარალებული მოსახლეობის დახმარება (პროგრამული კოდი 06 02 07)

ქვეპროგრამის ფარგლებში დაგეგმილია სტიქიის შედეგად დაზარალებული ოჯახების დახმარება, კერძოდ: სტიქიის შედეგად მიყენებული ზარალის ანაზღაურება 30%-ის ოდენობით“.

კ) დადგენილების მე-17 მუხლი ჩამოყალიბდეს შემდეგი რედაქციით:

,,მუხლი17. მუნიციპალიტეტის ბიუჯეტის ასიგნებები

განისაზღვროს მუნიციპალიტეტის ბიუჯეტის ასიგნებები საბიუჯეტო კლასიფიკაციის მიხედვით თანდართული რედაქციით: