2014 წლის 15 ივნისის ადგილობრივი თვითმმართველობის არჩევნებისათვის არჩევნების შედეგების შემაჯამებელი ოქმის შედგენის წესის თაობაზე

  საქართველოს ორგანული კანონის „საქართველოს საარჩევნო კოდექსი” მე-14 მუხლის პირველი პუნქტის „ა“ ქვეპუნქტის, მე-3 პუნქტისა და 77-ე მუხლის მე-5 პუნქტის საფუძველზე, საქართველოს ცენტრალური საარჩევნო კომისია ადგენს:

საოლქო საარჩევნო კომისია პროპორციული საარჩევნო სისტემის საფუძველზე ჩატარებული არჩევნებისთვის და ყოველ ერთმანდატიანი მაჟორიტარულ საარჩევნო ოლქში ჩატარებული არჩევნებისთვის ადგენს თითო შემაჯამებელ ოქმს, გარდა ქალაქ თბილისის საკრებულოს არჩევნებისა.

საოლქო საარჩევნო კომისია პროპორციული და მაჟორიტარული საარჩევნო სისტემით ჩატარებული არჩევნების შემაჯამებელი ოქმების საფუძველზე ადგენს ადგილობრივი თვითმმართველობის ორგანოს - საკრებულოს არჩევნების შედეგების შემაჯამებელ ერთიან ოქმს (თანდართული რედაქციით), რომელიც ივსება სამ ეგზემპლარად, რომელთაგან ერთი გადაეცემა ცესკოს, მეორე ეგზემპლარი ინახება შესაბამის საოლქო საარჩევნო კომისიაში, ხოლო მესამე ეგზემპლარი გადაეცემა საკრებულოს სამანდატო კომისიას.

ქალაქ თბილისის საკრებულოს არჩევნებისთვის ერთმანდატიან მაჟორიტარულ საარჩევნო ოლქებში არჩევნების შედეგებს აჯამებს შესაბამისი საოლქო საარჩევნო კომისია და ადგენს ერთ შემაჯამებელ ოქმს.

ცენტრალური საარჩევნო კომისია პროპორციული და მაჟორიტარული საარჩევნო სისტემით ჩატარებული არჩევნების შემაჯამებელი ოქმების საფუძველზე  ადგენს ქალაქ თბილისის საკრებულოს არჩევნების შედეგების შემაჯამებელ ერთიან ოქმს, რომელიც ივსება სამ ეგზემპლარად, რომელთაგან ორი ინახება ცესკოში, ხოლო მესამე ეგზემპლარი გადაეცემა საკრებულოს სამანდატო კომისიას.

ეს დადგენილება შეიძლება გასაჩივრდეს თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ. თბილისი, დავით აღმაშენებლის ხეივანი, მე-12 კილომეტრი, №6) მისი მიღებიდან  2 კალენდარული დღის ვადაში.

ეს დადგენილება ამოქმედდეს  გამოქვეყნებისთანავე.