„პროდუქციის და მომსახურების სერტიფიკაციის შესახებ“ საქართველოს კანონში ცვლილებების შეტანისთაობაზე

საქართველოს კანონი

„პროდუქციის და მომსახურების სერტიფიკაციის შესახებ“ საქართველოს კანონში ცვლილებების შეტანის თაობაზე

    მუხლი 1

„პროდუქციის და მომსახურების სერტიფიკაციის შესახებ“ საქართველოს კანონში (პარლამენტის უწყებანი, №22-23, 17 ოქტომბერი, 1996, გვ. 25) შეტანილ იქნეს შემდეგი ცვლილებები:

1. მე-3 მუხლის:

ა) „ჟ.ბ“ ქვეპუნქტი ჩამოყალიბდეს შემდეგი რედაქციით:

„ჟ.ბ) საქართველოს ტერიტორიაზე მოქმედი წარმომადგენელი ან ბაზარზე პროდუქციის განმთავსებელი, როდესაც უცხოელ დამამზადებელს არ ჰყავს წარმომადგენელი;“;

ბ) „ს“ ქვეპუნქტი ჩამოყალიბდეს შემდეგი რედაქციით:

„ს) ბაზარზე განთავსება – საქართველოს ბაზარზე პროდუქციის პირველადი განთავსება (ხელმისაწვდომად გახდომა) პროდუქციის გავრცელების ან გამოყენების მიზნით;“.

2. მე-5 მუხლის მე-5–მე-7 პუნქტები ჩამოყალიბდეს შემდეგი რედაქციით:

„5. საქართველოს მთავრობის გადაწყვეტილებით ან სხვა შიდა სამართლებრივი აქტებით შესაძლებელია, ეკვივალენტად მიღებულ იქნეს სხვა ქვეყნის ტექნიკური რეგლამენტი და დაშვებულ იქნეს ამ ტექნიკური რეგლამენტის შესაბამისი პროდუქციის ბაზარზე განთავსება და ბრუნვა.

6. პროდუქციის ბაზარზე განთავსება და ბრუნვა დასაშვებია, თუ ის შეესაბამება აღიარებულ ან ეკვივალენტად მიღებულ ტექნიკურ რეგლამენტებს ან საქართველოში მოქმედ ტექნიკურ რეგლამენტებს ანდა სხვა წესებსა და ნორმებს, რომლებიც ადგენს სავალდებულო მოთხოვნებს პროდუქციის მიმართ.

7. აღიარებული ან ეკვივალენტად მიღებული ტექნიკური რეგლამენტის შესაბამისი პროდუქციის ბაზარზე განთავსება შესაძლებელია პროდუქციის წარმოშობის ქვეყანაში მიღებული შესაბამისობის შეფასების პროცედურით გათვალისწინებული შესაბამისობის დამადასტურებელი დოკუმენტის წარმოდგენის საფუძველზე.“.

    მუხლი 2

საქართველოს მთავრობამ უზრუნველყოს სათანადო ღონისძიებების განხორციელება საქართველოს კანონმდებლობის ამ კანონის მოთხოვნებთან შესაბამისობის მიზნით.

    მუხლი 3

ეს კანონი ამოქმედდეს გამოქვეყნებისთანავე.

საქართველოს პრეზიდენტი მ. სააკაშვილი

თბილისი,

2006 წლის 29 დეკემბერი.

№4291–რს