შპს „საქართველოს გაერთიანებული წყალმომარაგების კომპანიის“ მიერ ელექტროენერგიის ხარჯის ანაზღაურების შესახებ

საქართველოს მთავრობის

განკარგულება №453

2012 წლის 15 მარტი

ქ. თბილისი

 შპს „საქართველოს გაერთიანებული წყალმომარაგების კომპანიის“ მიერ ელექტროენერგიის ხარჯის ანაზღაურების შესახებ

1. ცნობად იქნეს მიღებული, რომ თელავის მუნიციპალიტეტის გამგეობის საკუთრებაში არსებულ ჭაბურღილებს (ქ. თელავი (სამხრეთით), საკადასტრო კოდები: 53.19.31.041 და 53.19.31.043) 2011 წელს ფაქტობრივად ფლობდა შპს „საქართველოს გაერთიანებული წყალმომარაგების კომპანია“, რის მეშვეობითაც იგი სასმელ წყალს აწვდიდა ქალაქ თელავის მოსახლეობას და თელავის მუნიციპალიტეტის ბიუჯეტით არ იყო გათვალისწინებული აღნიშნული ჭაბურღილების ოპერირებისათვის საჭირო ელექტროენერგიის ღირებულების ანაზღაურება.

2. შპს „საქართველოს გაერთიანებული წყალმომარაგების კომპანიამ“ განახორციელოს ამ განკარგულების პირველი პუნქტით გათვალისწინებული ჭაბურღილების ოპერირებისათვის 2011 წელს გაწეული ელექტროენერგიის ხარჯის ანაზღაურება „საქართველოს 2012 წლის სახელმწიფო ბიუჯეტის შესახებ“ საქართველოს კანონის 31-ე მუხლის შესაბამისად გამოყოფილი და „საქართველოს რეგიონული განვითარებისა და ინფრასტრუქტურის სამინისტროს მიერ განსახორციელებელ ღონისძიებათა თაობაზე“ საქართველოს მთავრობის 2012 წლის 24 იანვრის N110 განკარგულების საფუძველზე გადარიცხული სახსრებიდან.

პრემიერ-მინისტრი                                         ნ. გილაური