ოზურგეთის მუნიციპალიტეტის გერბისა და დროშის დამტკიცების შესახებ

„ადგილობრივი თვითმმართველობის შესახებ“ საქართველოს ორგანული კანონის მე-8 მუხლის   მე-2 პუნქტისა და  „ნორმატიული აქტების შესახებ“ საქართველოს კანონის   შესაბამისად,  ოზურგეთის მუნიციპალიტეტის საკრებულო ადგენს:

დამტკიცდეს ოზურგეთის მუნიციპალიტეტის გერბი და დროშა, თანახმად  დანართისა.

დამტკიცდეს ოზურგეთის მუნიციპალიტეტის გერბისა და დროშის აღწერილობები, თანახმად დანართისა.

ოზურგეთის მუნიციპალიტეტის გერბისა და დროშის გამოყენება და დაცვა განხორციელდეს „თვითმმართველი ერთეულის სიმბოლოთა გამოყენების წესის დამტკიცების შესახებ” საქართველოს პრეზიდენტის 2010 წლის 31 მაისის №363 ბრძანებულებით დადგენილი წესის შესაბამისად.

ოზურგეთის მუნიციპალიტეტის გერბისა და დროშის ორიგინალების შენახვის ადგილად განისაზღვროს ოზურგეთის მუნიციპალიტეტის საკრებულოს აპარატი.

ოზურგეთის მუნიციპალიტეტის გერბისა და დროშის დაცვის უზრუნველყოფა დაევალოს ოზურგეთის მუნიციპალიტეტის გამგეობას.

 დადგენილება ძალაშია გამოქვეყნებისთანავე.

გერბის ფარი გადაკვეთილია სამ ნაწილად. ცენტრალური ზურმუხტის ველი ფარის სიმაღლის ½-ის ტოლია. ზურმუხტის ველი, მის ზემოთ არსებული ლაჟვარდის ველისგან გამოყოფილია ტალღისებურად. ლაჟვარდის ველი ფარის სიმაღლის ¼-ის ტოლია. ზურმუხტისა და ლაჟვარდის ველებზე მოთავსებულია ოქროს ფიგურა: სვეტი, რომელიც ბოლოვდება ჯვრით, და მწოლიარე ლომი, რომელსაც მარჯვენა თათით უპყრია მახვილი.  ლაჟვარიდის ველის მარჯვენა კუთხეში გამოსახულია ვერცხლის ცხრაქიმიანი მნათობი. ქვედა სევადის ველი წარმოადგენს გერბის სიმაღლის ¼-ს და გადაკვეთილია სამი ვერცხლის ტალღისებური სარტყლით.