საქართველოს იუსტიციის სამინისტროს მმართველობის სფეროში მოქმედი საჯარო სამართლის იურიდიული პირის – სახელმწიფო სერვისების განვითარების სააგენტოს მიერ სახელმწიფო შესყიდვის გამარტივებული შესყიდვის საშუალებით განხორციელების შესახებ

საქართველოს მთავრობის

განკარგულება  №199

2014 წლის 10 თებერვალი

ქ. თბილისი

საქართველოს იუსტიციის სამინისტროს მმართველობის სფეროში მოქმედი საჯარო სამართლის იურიდიული პირის – სახელმწიფო სერვისების განვითარების სააგენტოს მიერ სახელმწიფო შესყიდვის გამარტივებული შესყიდვის საშუალებით განხორციელების შესახებ

„საჯარო სამართლის იურიდიული პირის შესახებ“ საქართველოს კანონის მე-13 მუხლის მე-2 პუნქტისა და „სახელმწიფო შესყიდვების შესახებ“ საქართველოს კანონის 10¹ მუხლის მე-3 პუნქტის „დ“ ქვეპუნქტის საფუძველზე:

1. საქართველოს იუსტიციის სამინისტროს მმართველობის სფეროში მოქმედი საჯარო სამართლის იურიდიული პირის – სახელმწიფო სერვისების განვითარების სააგენტოს (შემდგომში – სააგენტო) მონაცემთა ელექტრონულ ბაზაში არსებულ ფიზიკურ პირთა საიდენტიფიკაციო მონაცემებში ხარვეზების გამოვლენის, მათი აღმოფხვრისა და ამ გზით საქართველოს მოქალაქეთა ერთიანი საარჩევნო სიის ფორმირებისათვის აუცილებელი ზუსტი მონაცემების დადგენის მიზნით, რომელიც 2014 წლის 1 მაისს უნდა დასრულდეს, სააგენტოს მიერ გამარტივებული შესყიდვის საშუალებით განხორციელდეს საქონლის, მომსახურებისა და სამუშაოს სახელმწიფო შესყიდვა, მათ შორის:

ა) სააგენტოში არსებული ფოტოსაძიებო სისტემის განახლების, ფოტოსაძიებო სისტემის ცალკეული კომპონენტების, ფოტოსაძიებო სისტემის ფუნქციონირებასა და გამოყენებასთან დაკავშირებული მომსახურების, მათ შორის კონსალტინგური მომსახურების, ფოტოსურათების ხარისხის შემოწმების პროგრამული კომპონენტების და მათი განახლების შესყიდვა;

ბ) პროექტის მოკლე ვადებში განხორციელებისათვის საჭირო პერსონალისთვის გამოყოფილი სამუშაო ადგილის სარემონტო სამუშაოების და აუცილებელი საოფისე ინვენტარის შესყიდვა.

2. სააგენტომ ამ განკარგულების პირველი პუნქტის „ა“ ქვეპუნქტის საფუძველზე, ფოტოსაძიებო სისტემის და ფოტოსურათების ხარისხის შემოწმების პროგრამული კომპონენტების განახლების შესყიდვა განახორციელოს 3 წლის ვადით, სახელმწიფო შესყიდვის შესახებ შესაბამისი ხელშეკრულების ძალაში შესვლიდან.

3. ამ განკარგულებით გათვალისწინებული საქონლის, მომსახურებისა და სამუშაოს სახელმწიფო შესყიდვისათვის ფინანსური რესურსების მობილიზება სააგენტომ უზრუნველყოს მის მიერ მიღებული კანონმდებლობით ნებადართული სახსრებით, მისთვის კანონმდებლობით დაკისრებული მიზნებისა და ფუნქციების განხორციელების შეუფერხებლად.

პრემიერ-მინისტრი                                            ი. ღარიბაშვილი