„საჯარო სამართლის იურიდიული პირის – კონკურენციისა და სახელმწიფო შესყიდვების სააგენტოს დებულების დამტკიცების შესახებ“ საქართველოს მთავრობის 2011 წლის 27 დეკემბრის №497 დადგენილებაში ცვლილების შეტანის თაობაზე

1. მე‑2 მუხლი ჩამოყალიბდეს შემდეგი რედაქციით:

„მუხლი 2. სააგენტოს მიზნები

სააგენტოს ძირითადი მიზნებია:

ა)  საქართველოში ბაზრის ლიბერალიზაციის, თავისუფალი ვაჭრობისა და კონკურენციის ხელშეწყობა, კერძოდ:

ა.ა) სახელმწიფო, ავტონომიური რესპუბლიკის ხელისუფლების ან/და ადგილობრივი თვითმმართველობის ორგანოს მიერ ბაზარზე შესვლის ადმინისტრაციული, სამართლებრივი და დისკრიმინაციული ბარიერების დაუშვებლობა;

ა.ბ) ეკონომიკურ აგენტებს შორის კონკურენციის არამართლზომიერი შეზღუდვის დაუშვებლობა;

ა.გ) ეკონომიკური აგენტების საქმიანობაში თანასწორუფლებიანობის პრინციპის დაცვა;

ა.დ) ბაზარზე დომინირებული მდგომარეობის ბოროტად გამოყენების დაუშვებლობა;

ბ) გადაწყვეტილების მიღებისას მაქსიმალური საჯაროობა, ობიექ­ტუ­რობა, არადისკრიმინაციულობა და გამჭვირვალობა;

გ) სახელმწიფო შესყიდვების პროცედურების კანონიერების მონიტო­რინგი;

დ) სახელმწიფო შესყიდვების განხორციელებისას საჯაროობის, გამ­ჭვირ­ვალობის, სამართლიანობისა და არადისკრიმინაციულობის პრინცი­პების დაცვა, კანონმდებლობით დადგენილი პროცედურების ზუსტად შეს­რულებისა და ანგარიშგების, ჯანსაღი კონკურენციის, სახელმწიფო შეს­ყიდ­ვების მონაწილეთა რაციონალური და თავისუფალი არჩევანის შე­საძ­ლებლობის უზრუნველყოფა;

ე) სახელმწიფო  შესყიდვების ერთიანი ელექტრონული სისტემის ფუნქ­ცი­ონირების უზრუნველყოფა და მის მიმართ საზოგადოების ნდობის ამაღლება;

ვ) კონკურენციისა და სახელმწიფო შესყიდვების მარეგულირებელი კანონმდებლობის სრულყოფა, საერთაშორისოდ აღიარებულ სტანდარ­ტებ­თან და საუკეთესო პრაქტიკასთან მისი შესაბამისობის უზრუნველყოფა.“.

2.   მე‑3 მუხლი ჩამოყალიბდეს შემდეგი რედაქციით:

„მუხლი 3. სააგენტოს ფუნქციები და უფლებამოსილებები

1. სააგენტოს ფუნქციებია:

ა) სახელმწიფო შესყიდვების პროცესის რეგულირების პოლიტიკის განსაზღვრა;

ბ) ეკონომიკის ყველა სექტორში კონკურენციის განვითარებისათვის ხელსაყრელი პირობების შექმნა;

გ) ეკონომიკური აგენტის მიერ კონკურენციის დარღვევის ფაქტების გამოვლენა;

დ) სახელმწიფოს მიერ კონკურენციის შემზღუდველი ქმედებებისა და გადაწყვეტილებების გამოვლენის შემთხვევაში რეკომენდაციების შემუშავება;

ე) კონკურენციის შემზღუდველ სახელმწიფო დახმარებასთან დაკავ­შირებით შესაბამისი რეკომენდაციების შემუშავება;

ვ) სახელმწიფო შესყიდვებთან დაკავშირებული საქმიანობის კოორ­დინაცია და მონიტორინგი;

ზ) სახელმწიფო შესყიდვების ერთიანი ელექტრონული სისტემის გა­მართული ფუნქციონირების უზრუნველყოფა;

თ) სახელმწიფო შესყიდვების სფეროში არსებული მდგომარეობის სის­ტემატური შესწავლა, ანალიზი და საქართველოს მთავრობისათვის შე­სა­ბამისი წინადადებების წარდგენა;

ი) სპეციალური სასწავლო პროგრამების და სასწავლო-მეთო­დოლო­გიური მასალებისა და დოკუმენტაციის სტანდარტული ფორმების მომზა­დება, სემინარებისა და ტრენინგების მოწყობა სახელმწიფო, ავტონომიური რესპუბლიკის ხელისუფ­ლე­ბის ან/და ადგილობრივი თვითმმართველობის ორგანოებისათვის, მასმედიის  წარმომად­გენლებისა და სხვა დაინტერესებული პირებისათვის;

კ) კომპეტენციის ფარგლებში, შემსყიდველი ორგანიზაციებისათვის საექსპერტო და საკონსულტაციო-სარეკომენდაციო მომსახურების გაწევა;

ლ) თანამედროვე ინფორმაციული და საკომუნიკაციო ტექნოლო­გიე­ბის კონკურენციისა და სახელმწიფო შესყიდვების სფეროში ინტეგრი­რების ხელშეწყობა;

მ) სახელმწიფო შესყიდვების განხორციელებისას წარმოშობილი და­ვე­ბის განხილვის გამჭვირვალე და სამართლიანი მექანიზმის უზრუნ­ველ­ყოფა;

ნ) სახელმწიფო შესყიდვებში მონაწილე არაკეთილსინდისიერ პირთა რეესტრისა (შავი სიის) და კვალიფიციურ მიმწოდებელთა რეესტრის (თეთრი სიის) წარმოება;

ო) განსაკუთრებულ შემთხვევებში, შემსყიდველი ორგანიზაციის წე­რი­­ლობითი მიმართვის საფუძველზე ან საკუთარი გადაწყვეტილებით, ინ­დივიდუალური ადმინისტრაციულ-სამართლებრივი აქტით შესყიდვის ობი­­ექ­ტის იდენტიფიცირება ან/და საერთაშორისო ორგანიზაციების მიერ მიღებულ კლასიფიკატორში ინტეგრირება;

პ) სახელმწიფო შესყიდვების ხელოვნურად დაყოფის ფაქტების გა­მოვ­ლენა და შესაბამისი რეაგირება;

ჟ) კონკურენციისა და სახელმწიფო შესყიდვების მარეგულირებელი კა­ნონმდებლობის შემუშავება;

რ) საქართველოს კანონმდებლობით განსაზღვრული სხვა ფუნქციების განხორციელება.

2. სააგენტო თავისი მიზნებისა და ფუნქციების განხორციელების უზ­რუნველსაყოფად უფლებამოსილია:

ა) ეკონომიკურ აგენტთან მიმართებაში აწარმოოს საქმის მოკვლევა თავისუფალი ვაჭრობისა და კონკურენციიის დარღვევის ფაქტზე წარდგენილი განცხადების ან/და საჩივრის საფუძველზე საქართველოს მოქმედი კანონმდებლობის შესაბამისად;

ბ) კონკრეტულ საქმესთან დაკავშირებით შესაბამის ეკონომიკურ აგენტს და სხვა დაინტერესებულ მხარეს მოსთხოვოს ინფორმაცია საქართველოს კანონმდებლობით დადგენილი წესით;

გ) მოკვლევის მიზნით, სასამართლოს თანხმობის საფუძველზე, ადგილზე შეამოწმოს საქმეში ჩართული ეკონომიკური აგენტი;

დ) ეკონომიკურ აგენტს მოსთხოვოს განხორციელებული ქმედების „თავისუფალი ვაჭრობისა და კონკურენციის შესახებ“ საქართველოს კანონთან შესაბამისობის უზრუნველყოფა;

ე) მიმართოს სასამართლოს ეკონომიკური აგენტის მიერ ამ კანონის მოთხოვნათა დარღვევით განხორციელებული ქმედების ან მიღებული გადაწყვეტილების შეჩერების თაობაზე, ხოლო მიღებული გადაწყვეტილების ან დადებული ხელშეკრულების შემთხვევაში − მისი ძალადაკარგულად ცნობის თაობაზე;

ვ) მიზანშეწონილობის შემთხვევაში აწარმოოს კვლევა დაუკვირვებადი ეკონომიკის მასშტაბების დასადგენად შესაბამის ბაზარზე დომინირებული მდგომარეობის განმსაზღვრელი საბაზრო წილის განსაზღვრის მიზნით;

ზ) მოსთხოვოს სახელმწიფო, ავტონომიური რესპუბლიკის ხელისუფლების ან/და ადგილობრივი თვითმმართველობის ორგანოს ამ კანონის დებულებათა შესაძლო დარღვევასთან დაკავშირებული დოკუმენტაცია საქართველოს კანონმდებლობით დადგენილი წესით;

თ) ამ კანონის დამრღვევ სახელმწიფო, ავტონომიური რესპუბლიკის ხელისუფლების ან/და ადგილობრივი თვითმმართველობის ორგანოს წარუდგინოს წერილობითი დასკვნა და შესაბამისი რეკომენდაცია მის მიერ მიღებული კანონსაწინააღმდეგო გადაწყვეტილების თაობაზე;

ი) საქართველოს მთავრობას მიმართოს რეკომენდაციით შესაბამის ბაზარზე შესვლის საკანონმდებლო, ადმინისტრაციული და დისკრიმინაციული ბარიერების არსებობის და მათი აღმოფხვრის საჭიროების თაობაზე;

კ) საქართველოს მთავრობას მიმართოს რეკომენდაციით საქართველოს კანონმდებლობით დადგენილი ვაჭრობის ტექნიკური ბარიერების გაუქმების თაობაზე, თუ ისინი ზღუდავს კონკურენციას;

ლ) საქართველოს მთავრობას მიმართოს სამართლებრივი დასკვნით და საჭიროების შემთხვევაში, რეკომენდაციით, თუ გაცემული სახელმწიფო დახმარება მნიშვნელოვნად ზღუდავს კონკურენციას;

მ) უფლებამოსილებათა განსახორციელებლად, საჭიროების შემთხვევაში, სახელმწიფო, ავტონომიური რესპუბლიკის ხელისუფლების ან/და ადგილობრივი თვითმმართველობის ორგანოსაგან გამოითხოვოს შესაბამისი ინფორმაცია;

ნ) საქართველოს საგადასახადო კოდექსის საფუძველზე საგადასახადო ორგანოსაგან გამოითხოვოს და მიიღოს ცალკეულ გადასახადის გადამხდელთა თაობაზე იდენტიფიცირებული ინფორმაცია საქართველოს მთავრობის მიერ დადგენილი წესით.

ო) ითანამშრომლოს დამოუკიდებელ ეროვნულ მარეგულირებ­ლებ­თან რეგულირების მქონე ეკონომიკურ სფეროებში კონკურენციის დარ­ღვევის შემთხვევების შესწავლის პროცესში;

პ) მოითხოვოს შემსყიდველი ორგანიზაციებისაგან განხორციე­ლე­ბუ­ლი სახელმწიფო შესყიდვების შესახებ ანგარიშების წარდგენა „სახელ­მწიფო შესყიდვების შესახებ“ საქართველოს კანონითა და შესაბა­მისი ნორ­მატიული აქტებით დადგენილი ფორმებითა და ვადებში, აგრეთ­ვე მოით­ხოვოს შემსყიდველი ორგანიზაციებისა და სახელმწიფო შესყიდ­ვებში მო­ნა­წილე პირთაგან სახელმწიფო შესყიდვებთან დაკავშირებული ნების­მიე­რი ინფორმაცია, სახელმწიფო შესყიდვების შესახებ ხელშეკ­რულებების შეს­რულების მდგომარეობასთან დაკავშირებული ინფორმა­ციის ჩათვლით;

ჟ) კანონითა და შესაბამისი ნორმატიული აქტებით დადგენილი ნორ­მების დარღვევის ან მათი არასწორი გამოყენებისას, სახელმწიფო შესყიდ­ვე­ბისათვის გამოყოფილი სახელმწიფო სახსრების არარაციო­ნალუ­რი ხარჯ­ვის ფაქტების გამოვლენის შემთხვევაში, მიუთითოს ამ ფაქტებზე შემსყიდ­ველ ორგანიზაციებს და მოითხოვოს მათგან არასწორი გადაწყვე­ტილე­ბე­ბისა და მოქმედების კანონმდებლობით დადგენილ წესებსა და ნორმებ­თან შესა­ბამისობაში მოყვანა;

რ) კანონმდებლობით დადგენილ ფარგლებში და წესით მოახდინოს შესაბამისი რეაგირება სააგენტოს კომპეტენციას მიკუთვნებულ კონკურენ­ციისა და სახელმწიფო შესყიდვების სფეროში გამოვლენილ ადმინისტრა­ციულ სამართალდარღვევათა ფაქტებზე;

ს) „სახელმწიფო შესყიდვების შესახებ“ საქართველოს კანონისა და შესა­ბამისი ნორმატიული აქტების მოთხოვნათა დარღვევის შემთხვევაში, კანონმდებლობით უფლებამოსილი ორგანოების წინაშე დასვას სახელ­მწი­ფო შესყიდვებში მონაწილე პირების პასუხისმგებლობის საკით­ხი;

ტ) სააგენტოს მიზნების უზრუნველსაყოფად განახორციელოს ფასიანი მომსახურება, რომელიც უშუალოდ არ წარმოადგენს მის ვალდებულებას;

უ) განახორციელოს საქართველოს კანონმდებლობით განსაზღვრუ­ლი სხვა უფლებამოსილებანი.“.

3. მე‑8 მუხლი ჩამოყალიბდეს შემდეგი რედაქციით:

„მუხლი 8. სააგენტოს წლიური ანგარიში

სააგენტო ყოველი მომდევნო წლის 15 მაისამდე ამზადებს წლიურ ანგარიშს თავისი საქმიანობის შესახებ, რომელიც წარედგინება საქართვე­ლოს მთავრობას, აგრეთვე ქვეყნდება სააგენტოს ოფიციალურ ვებგვერდზე.“.

4. მე‑9 მუხლი ჩამოყალიბდეს შემდეგი რედაქციით:

„მუხლი 9. სააგენტოს რეორგანიზაცია და ლიკვიდაცია

სააგენტოს რეორგანიზაცია ან/და ლიკვიდაცია ხორციელდება საქარ­თველოს მთავრობის მიერ, კანონმდებლობით გათვალისწი­ნე­ბული წესით.“.