ზოგიერთი საჯარო სამართლის იურიდიული პირის ბიუჯეტის, საშტატო ნუსხისა და სახელფასო ფონდის შეთანხმების მიზნით გასატარებელი ღონისძიებების თაობაზე

საქართველოს მთავრობის

განკარგულება №46

2014 წლის 14 იანვარი

 ქ. თბილისი

 ზოგიერთი საჯარო სამართლის იურიდიული პირის ბიუჯეტის, საშტატო ნუსხისა და სახელფასო ფონდის შეთანხმების მიზნით გასატარებელი ღონისძიებების თაობაზე

 1. „საჯარო სამართლის იურიდიული პირის შესახებ“ საქართველოს კანონის მე-12 მუხლის მე-4 პუნქტით გათვალისწინებული მოთხოვნების, „სახელმწიფო შესყიდვების შესახებ” საქართველოს კანონის მე-7 მუხლის მე-2 პუნქტის „ა” ქვეპუნქტით გათვალისწინებული მოთხოვნების შესასრულებლად და ზოგიერთი საჯარო სამართლის იურიდიული პირის შეუფერხებელი ფუნქციონირების მიზნით:

 ა) „საჯარო სამართლის იურიდიული პირის შესახებ“ საქართველოს კანონის მე-12 მუხლის მე-4 პუნქტით გათვალისწინებულმა საჯარო სამართლის იურიდიულმა პირებმა მათი ბიუჯეტების, საშტატო ნუსხებისა და სახელფასო ფონდის საქართველოს მთავრობასთან შეთანხმება უზრუნველყონ, თანდართული ფორმით (დანართი), არა უგვიანეს 2014 წლის 1 თებერვლისა, საქართველოს ფინანსთა სამინისტროს წინასწარი წერილობითი თანხმობით;

ბ) „საჯარო სამართლის იურიდიული პირის შესახებ" საქართველოს კანონის მე-12 მუხლის მე-4 პუნქტით გათვალისწინებული საჯარო სამართლის იურიდიული პირები უფლებამოსილნი არიან ამ პუნქტის „ა“ ქვეპუნქტით გათვალისწინებულ ვადებში შესაბამისი ღონისძიებების განხორციელებამდე, ხარჯვა განახორციელონ საქართველოს კანონმდებლობით დადგენილი წესით, სახელმწიფო კონტროლის განმახორციელებელ ორგანოსთან (ასეთის არსებობის შემთხვევაში) შეთანხმებული წლიური ბიუჯეტების, საშტატო ნუსხებისა და სახელფასო ფონდის საფუძველზე;

გ) „საჯარო სამართლის იურიდიული პირის შესახებ" საქართველოს კანონის მე-12 მუხლის მე-4 პუნქტით გათვალისწინებული საჯარო სამართლის იურიდიული პირები, საქართველოს მთავრობის მიერ მათი ბიუჯეტების შეთანხმებამდე, უფლებამოსილნი არიან, განახორციელონ წლიური სახელმწიფო შესყიდვები „სახელმწიფო შესყიდვების შესახებ" საქართველოს კანონით დადგენილი წესით უწყვეტ მომსახურებებზე, ასევე, ორგანიზაციის ფუნქციონირებისათვის სხვა აუცილებელი შესყიდვის ობიექტებზე.

2. „საჯარო სამართლის იურიდიული პირის შესახებ” საქართველოს კანონის მე-12 მუხლის მე-4 პუნქტით გათვალისწინებულ საჯარო სამართლის იურიდიულ პირებს უფლება მიეცეთ, საქართველოს მთავრობასთან მათი ბიუჯეტების, საშტატო ნუსხებისა და სახელფასო ფონდების შეთანხმე ბის შემდგომ, საქართველოს მთავრობასთან შეთანხმების გარეშე განახორციელონ:

ა) შეთანხმებული ბიუჯეტის ცვლილება დონორებიდან მიღებული  დაფინანსების ფარგლებში;

  ბ) შეთანხმებული ბიუჯეტის ცვლილება საბიუჯეტო სახსრების ნაწილში;

გ) შეთანხმებული ბიუჯეტის საბიუჯეტო კლასიფიკაციის მუხლებს შორის ცვლილება, თუ აღნიშნული ცვლილებები ჯამურად არ აღემატება შეთანხმებული ბიუჯეტის 10%-ს ან/და არ ზრდის შრომის ანაზღაურების მუხლს, ხოლო თუ ცვლილებები აღემატება შეთანხმებული ბიუჯეტის 10%-ს ან/და ზრდის შრომის ანაზღაურების მუხლს, ცვლილება შესაძლებელია განხორციელდეს მხოლოდ საქართველოს ფინანსთა სამინისტროს თანხმობით;

დ) საშტატო ნუსხის და სახელფასო ფონდის ცვლილება, თუ იგი არ იწვევს თანამდებობრივი სარგოს ერთი თვის ფონდის ზრდას ან/და შრომის ანაზღაურების წლიური ფონდის ზრდას, ხოლო თუ იგი იწვევს ერთი თვის ფონდის ზრდას ან/და შრომის ანაზღაურების წლიური ფონდის ზრდას, ცვლილება შესაძლებელია განხორციელდეს მხოლოდ საქართველოს ფინანსთა სამინისტროს თანხმობით.

3. საქართველოს მთავრობასთან შეთანხმების გარეშე დაუშვებელია შეთანხმებული ბიუჯეტების, საშტატო ნუსხებისა და სახელფასო ფონდების ნებისმიერი ცვლილება, გარდა ამ განკარგულების მე-2 პუნქტით განსაზღვრული შემთხვევებისა.

4.  ამ განკარგულების მე-3 პუნქტის შესაბამისად, შეთანხმებული ბიუჯეტების, საშტატო ნუსხებისა და სახელფასო ფონდის ცვლილების საქართველოს მთავრობასთან შეთანხმება ხორციელდება საქართველოს ფინანსთა სამინისტროს წინასწარი წერილობითი თანხმობით.

5. განკარგულება ძალაშია 2014 წლის 1 იანვრიდან.

   პრემიერ-მინისტრი                             ირაკლი ღარიბაშვილი

დანართი

საჯარო სამართლის იურიდიული პირის მიერ ბიუჯეტის, საშტატო ნუსხისა და სახელფასო ფონდის საქართველოს მთავრობასთან შეთანხმების ფორმა

საჯარო სამართლის იურიდიული პირის დასახელება

                                                             ცხრილი №1

2014 წლის ბიუჯეტი

ათასი ლარი

ცხრილი №2

საშტატო ნუსხა და სახელფასო ფონდი