მაგისტრალური გაზსადენების განშტოებებისა და მათთან დაკავშირებული ობიექტების სამშენებლო-სარეკონსტრუქციო სამუშაოების შესრულების ღონისძიებათა შესახებ

საქართველოს მთავრობის

განკარგულება №375

2008 წლის 4 ივნისი

ქ. თბილისი

მაგისტრალური გაზსადენების განშტოებებისა და მათთან დაკავშირებული ობიექტების სამშენებლო-სარეკონსტრუქციო სამუშაოების შესრულების ღონისძიებათა შესახებ

1. შპს „საქართველოს ნავთობისა და გაზის კორპორაციისა“ და შპს „საქართველოს გაზის ტრანსპორტირების კომპანიის“ მიერ განსახორციელებული მაგისტრალური გაზსადენებისა და მათთან დაკავშირებული ობიექტების გადაუდებელი სამშენებლო-სარეკონსტრუქციო სამუშაოების განსაკუთრებული და სოციალურ-ეკონომიკური მნიშვნელობიდან გამომდინარე, „მშენებლობის ნებართვის გაცემის წესისა და სანებართვო პირობების შესახებ“ საქართველოს მთავრობის 2005 წლის 11 აგვისტოს №140 დადგენილების მე-3 მუხლის მე-3 პუნქტის „დ“ ქვეპუნქტის შესაბამისად საქართველოს ეკონომიკური განვითარების სამინისტრომ (ე. შარაშიძე) უზრუნველყოს მშენებლობის ნებართვის გამარტივებული წესით გაცემა კანონმდებლობის შესაბამისად:

ა) „წითელი ხიდი – წალკა – ალასტანი – ახალქალაქის“ მაგისტრალური გაზსადენის „კოთელია-ასპინძის“ განშტოების მონაკვეთის რეკონსტრუქციისათვის;

ბ) „ქუთაისი – სოხუმის“ მაგისტრალური გაზსადენის ქობულეთის განშტოების („სამტრედია-ნატანების“ მონაკვეთი) 30-ე კილომეტრზე მდინარე სუფსის საჰაერო გადასასვლელის რეკონსტრუქციისათვის;

გ) „რუსთავი – თელავის“ 315 მმ-იანი მაგისტრალური გაზსადენის საგარეჯოს განშტოების (საერთო სიგრძით 25 კმ) 250 მმ-იანი საწყისი სექციის მონაკვეთზე გაზის გამანაწილებელი სადგურის სამშენებლო-სამონტაჟო სამუშაოებისათვის;

დ) „ქუთაისი – სოხუმის მაგისტრალური გაზსადენის 22-ე კილომეტრზე ხონის განშტოების“ მშენებლობისათვის.

2. განკარგულება ძალაშია ხელმოწერის დღიდან.

პრემიერ-მინისტრი                              ვ. გურგენიძე