საქართველოს ეროვნული უშიშროების საბჭოს აპარატის დებულების დამტკიცების შესახებ

მუხლი 1.ზოგადი დებულებანი
1.    საქართველოს ეროვნული უშიშროების საბჭოს აპარატი (შემდეგში - აპარატი) არის საქართველოს კონსტიტუციის, „ეროვნული უშიშროების საბჭოს შესახებ“ საქართველოს ორგანული კანონის შესაბამისად შექმნილი დაწესებულება, რომელიც მოქმედი კანონმდებლობის საფუძველზე მინიჭებული უფლებამოსილების ფარგლებში ახორციელებს ეროვნული უშიშროების საბჭოს (შემდეგში - საბჭო) თავდაცვისა და სამხედრო აღმშენებლობის საკითხებში ინფორმაციულ-ანალიტიკურ უზრუნველყოფას და ორგანიზაციულად ხელს უწყობს საბჭოს საქმიანობას.
2.    აპარატი არის სრულიად საიდუმლო და საიდუმლო ინფორმაციაზე მომუშავე განსაკუთრებული მნიშვნელობის რეჟიმის დაწესებულება და საკუთარ საქმიანობას ახორციელებს საქართველოს კანონმდებლობის შესაბამისად.
3.    აპარატს უშუალოდ ხელმძღვანელობს საქართველოს პრეზიდენტის თანაშემწე ეროვნული უშიშროების საკითხებში - ეროვნული უშიშროების საბჭოს მდივანი, რომელიც ანგარიშვალდებულია საქართველოს პრეზიდენტის წინაშე.
4.    აპარატის საქმიანობის სამართლებრივი საფუძვლებია: საქართველოს კონსტიტუცია, საქართველოს საერთაშორისო ხელშეკრულებები, „ეროვნული უშიშროების საბჭოს შესახებ“ საქართველოს ორგანული კანონი, საქართველოს კანონები, კონსტიტუციური შეთანხმება, საქართველოს პრეზიდენტის ბრძანებულებები და განკარგულებები, ეს დებულება და საქართველოს პრეზიდენტის თანაშემწის ეროვნული უშიშროების საკითხებში - ეროვნული უშიშროების საბჭოს მდივნის მიერ საკუთარი კომპეტენციის ფარგლებში გამოცემული სამართლებრივი აქტები.
5.    აპარატში სამსახური არის საჯარო სამსახური, რომელიც რეგულირდება მოქმედი კანონმდებლობით.
6.    აპარატის თანამშრომლებს თანამდებობაზე ნიშნავს და თანამდებობიდან ათავისუფლებს საქართველოს პრეზიდენტი.
7.    აპარატის დაფინანსების წყაროა საქართველოს სახელმწიფო ბიუჯეტი.
8.    აპარატს აქვს დამოუკიდებელი ბალანსი, ანგარიშსწორების ანგარიში, სათანადო ხარჯთა ნუსხა, ემბლემა, ბეჭედი და ტიტულოვანი ფურცელი თავისი დასახელებითა და საქართველოს სახელმწიფო გერბის გამოსახულებით.
9.    აპარატის იურიდიული მისამართია ქ. თბილისი, პ. ინგოროყვას ქ. №7.
მუხლი 2. აპარატის ძირითადი ამოცანები და ფუნქციები
1.    აპარატის ძირითადი ამოცანაა „ეროვნული უშიშროების საბჭოს შესახებ“ საქართველოს ორგანული კანონის შესაბამისად, ხელი შეუწყოს საქართველოს პრეზიდენტის საქმიანობასა და საბჭოს მუშაობას ქვეყნის თავდაცვისა და სამხედრო აღმშენებლობის საკითხებში ინფომაციულ-ანალიტიკური უზრუნველყოფით. ასევე განახორციელოს საბჭოს საქმიანობის ორგანიზაციული უზრუნველყოფა, რისთვისაც იგი:
1.1    ახორციელებს ქვეყნის თავდაცვისა და სამხედრო აღმშენებლობის სფეროში არსებული მდგომარეობის, შიდა და გარე საფრთხეებისა და გამოწვევების შეფასებასა და პროგნოზირებას;
1.2    ახორციელებს ქვეყნის თავდაცვისა და სამხედრო აღმშენებლობის სფეროში არსებული კანონმდებლობის ექსპერტიზას;
1.3    საქართველოს პრეზიდენტის დავალების და საბჭოს რეკომენდაციის საფუძველზე, საბჭოს კომპეტენციის ფარგლებში, კანონმდებლობით დადგენილი წესით ამზადებს საქართველოს პრეზიდენტის სამართლებრივი აქტების პროექტებს;
1.4    ახორციელებს ქვეყნის თავდაცვისა და სამხედრო აღმშენებლობის სფეროში პრეზიდენტის მიერ გამოცემული დეკრეტების, ბრძანებულებების, განკარგულებების და როგორც საქართველოს სამხედრო ძალების უმაღლესი მთავარსარდლის - ბრძანებების შესრულების საერთო კონტროლს;
1.5    ანალიტიკურად ამზადებს და რეკომენდაციებს წარადგენს პრეზიდენტის მოხსენებების იმ ნაწილზე, რომელიც თავდაცვისა და სამხედრო აღმშენებლობის საკითხებს ეხება;
1.6    საქართველოს პრეზიდენტს რეგულარულად უმზადებს ინფორმაციულ-ანალიტიკურ მასალას სახელმწიფოს ფუნქციონირებასთან დაკავშირებულ საკითხებზე, რომელთა რეალიზაციის გარანტად საქართველოს კონსტიტუცია ასახელებს საქართველოს პრეზიდენტს;
1.7    ახორციელებს თავდაცვის უწყებიდან ინფორმაციის გამოთხოვასა და მიღებას, საჭიროების შემთხვევაში მათ წარდგენას საქართველოს პრეზიდენტისათვის;
1.8    ამზადებს საქართველოს პრეზიდენტის მიერ შეიარაღებული ძალების გენერალური შტაბის უფროსის და სხვა მხედართმთავრების თანამდებობაზე დანიშვნის და თანამდებობიდან გადაყენების, მათთვის სამხედრო და სპეციალური წოდებების მინიჭების შესახებ აქტების პროექტებს;
1.9    ამზადებს ეროვნული უშიშროების საბჭოს სხდომებს;
1.10    საქართველოს პრეზიდენტს წარუდგენს ეროვნული უშიშროების საბჭოს სხდომაზე განსახილველ საკითხთა შესახებ წინადადებებსა და რეკომენდაციებს;
1.11    საქართველოზე სამხედრო თავდასხმის შემთხვევაში და საომარი მდგომარეობის პირობებში ოპერატიულად ემსახურება რიგგარეშე მოწვევის საბჭოს სხდომის ორგანიზაციულ და ანალიტიკურ მოთხოვნილებებს;
1.12    საქართველოს პრეზიდენტისათვის მოსახსენებლად განიხილავს თავდაცვის სტრუქტურის მიმართვებსა და წერილებს;
1.13    საქართველოს პრეზიდენტის დავალებით წარმართავს და ორგანიზაციულად უზრუნველყოფს საბჭოსთან არსებული მუდმივი და დროებითი უწყებათაშორისი კომისიების საქმიანობას.
2.    აპარატი, დაკისრებულ ამოცანათა შესრულებისას, სამსახურეობრივად ანგარიშვალდებულია მხოლოდ საქართველოს პრეზიდენტის წინაშე.
მუხლი 3. აპარატის ხელმძღვანელობა
1.    აპარატს ხელმძღვანელობს საქართველოს პრეზიდენტის თანაშემწე ეროვნული უშიშროების საკითხებში - ეროვნული უშიშროების საბჭოს მდივანი, რომელსაც თანამდებობაზე ნიშნავს და თანამდებობიდან ათავისუფლებს საქართველოს პრეზიდენტი.
2.    საქართველოს პრეზიდენტის თანაშემწე ეროვნული უშიშროების საკითხებში - ეროვნული უშიშროების საბჭოს მდივანი:
2.1    უზრუნველყოფს საბჭოს მუშაობის ორგანიზებას;
2.2    ხელმძღვანელობს საბჭოს აპარატს;
2.3 ახორციელებს ღონისძიებებს საქართველოს კონსტიტუციის მოთხოვნების, საქართველოს კანონების და საქართველოს პრეზიდენტის ნორმატიული აქტების შესასრულებლად;
2.4 წარმართავს აპარატის საქმიანობას, ახორციელებს აპარატის თანამდებობის პირთა გადაწყვეტილებებისა და საქმიანობის სამსახურებრივ ზედამხედველობას;
2.5 საქართველოს კანონმდებლობის შესაბამისად, საკუთარი კომპეტენციის ფარგლებში გამოსცემს სამართლებრივ აქტებს, ასევე აწესებს კონტროლს მათ შესრულებაზე;
2.6    ხელს აწერს სამსახურებრივ დოკუმენტებს;
2.7    საქართველოს პრეზიდენტს დასანიშნად წარუდგენს საბჭოს მდივნის მოადგილეების კანდიდატურებს;
2.8    საბჭოს მდივნის მოადგილეებს შორის ანაწილებს უფლებამოსილებებს;
2.9    უფლებამოსილია შექმნას საკონკურსო-საატესტაციო კომისია;
2.10 დადგენილი წესით იღებს გადაწყვეტილებას აპარატის მოხელეთა წახალისებისა და დისციპლინარული პასუხისმგებლობის შესახებ;
2.11    ამტკიცებს აპარატის შინაგანაწესს;
2.12  დადგენილი წესით ანიჭებს აპარატში მომუშავე საჯარო მოხელეებს საჯარო სამსახურის შესაბამის საკლასო ჩინებს;
2.13    განსაკუთრებული დამსახურებისათვის წარადგენს აპარატის თანამშრომლებს სახელმწიფო ჯილდოზე;
2.14  წარადგენს წინადადებებს აპარატის წლიური ბიუჯეტის შემოსავლისა და გასავლის საკითხების შესახებ და აუცილებლობის შემთხვევაში, ბიუჯეტიდან დამატებითი სახსრების გამოყოფის თაობაზე;
2.15    იღებს გადაწყვეტილებას აპარატის საბიუჯეტო სახსრების მიზნობრივი გამოყენების შესახებ;
2.16    საქართველოს პრეზიდენტს დასამტკიცებლად წარუდგენს აპარატის დებულებას და საშტატო განრიგს;
2.17    საქართველოს პრეზიდენტს წარუდგენს წინადადებებს მუდმივი და დროებითი უწყებათაშორისი კომისიების და სამუშაო ჯგუფების შექმნის შესახებ;
2.18    კოორდინაციას უწევს მუდმივი და დროებითი კომისიების საქმიანობას. უფლება აქვს, ცალკეულ დავალებათა შესრულების ვადით კომისიის მუშაობაში მონაწილეობის მისაღებად ხელშეკრულების საფუძველზე მოიწვიოს სპეციალისტები, რომლებიც არ არიან საჯარო მოსამსახურეები;
2.19    საქართველოს პრეზიდენტს აბარებს ანგარიშს აპარატის საქმიანობასთან დაკავშირებით;
2.20    დადგენილი წესით ასრულებს საქართველოს პრეზიდენტის ცალკეულ დავალებებს.
3.    საქართველოს პრეზიდენტის თანაშემწეს ეროვნული უშიშროების საკითხებში - ეროვნული უშიშროების საბჭოს მდივანს ჰყავს ოთხი მოადგილე, რომლებსაც თანამდებობაზე ნიშნავს და თანამდებობიდან ათავისუფლებს საქართველოს პრეზიდენტი, საქართველოს პრეზიდენტის თანაშემწის ეროვნული უშიშროების საკითხებში - ეროვნული უშიშროების საბჭოს მდივნის წარდგინებით.
4.    საქართველოს პრეზიდენტის თანაშემწის ეროვნული უშიშროების საკითხებში - ეროვნული უშიშროების საბჭოს მდივნის არყოფნის შემთხვევაში, მის უფლებამოსილებას ახორციელებს საბჭოს მდივნის ერთ-ერთი მოადგილე.
მუხლი 4. აპარატის სტრუქტურული ქვედანაყოფები და მათი ძირითადი ამოცანები
1.    აპარატის სტრუქტურული ქვედანაყოფებია:
1.1    თავდაცვისა და ანალიტიკის დეპარტამენტი: მონაწილეობს თავდაცვის კუთხით ეროვნული უსაფრთხოების კონცეფციის და სხვა სტრატეგიული დოკუმენტების შემუშავებაში, განიხილავს და საბჭოს წარუდგენს რეკომენდაციებს თავდაცვის პოლიტიკის განმსაზღვრელი დოკუმენტების შესახებ; ახორციელებს თავდაცვის სფეროში არსებული მდგომარეობის ანალიზს და საბჭოს მიერ განსახილველად ამზადებს რეკომენდაციებს; აანალიზებს და საბჭოს მიერ განსახილველად წარადგენს პროექტებს, რომლებიც ეხება ქვეყნის თავდაცვის საკითხებს; ახორციელებს საბჭოს ინფორმაციულ-ანალიტიკურ უზრუნველყოფას, როგორც მშვიდობიან, ისე ომის პირობებში; აფასებს ქვეყნის წინაშე არსებულ საგარეო და საშინაო სამხედრო-პოლიტიკურ საფრთხეებს და საბჭოსთვის შეიმუშავებს შესაბამის რეკომენდაციებს; ანალიტიკურად უზრუნველყოფს პრეზიდენტის მოხსენებებს ქვეყნის თავდაცვას საკითხებზე; საქართველოს პრეზიდენტს აწვდის ინფორმაციულ-ანალიტიკურ მასალას სახელმწიფოს ფუნქციონირებასთან დაკავშირებულ იმ საკითხებზე, რომელთა რეალიზაციის გარანტად საქართველოს კონსტიტუციის მიერ დასახელებულია საქართველოს პრეზიდენტი. ამზადებს რეკომენდაციებს ქვეყნის თავდაცვისუნარიანობის ამ ასპექტების გაძლიერებისათვის საქართველოს ჯარში პატრიოტიზმისა და მხედრული სულისკვეთების, ასევე პოლიეთნიკურ და პოლიკონფესიურ ჯარში ერთიანი სახელმწიფოებრივი განცდის მდგომარეობას და თავდაცვის უწყებიდან გამოითხოვს და იღებს საჭირო ინფორმაციას; საქართველოს პრეზიდენტისათვის მოსახსენებლად განიხილავს თავდაცვის სტრუქტურის მიმართვებსა და წერილებს; საკუთარი ამოცანების მისაღწევად მჭიდროდ კოორდინირებს სამხედრო აღმშენებლობის საკითხთა დეპარტამენტთან.
1.2    სამხედრო აღმშენებლობის საკითხთა დეპარტამენტი: აანალიზებს სამხედრო აღმშენებლობის სფეროში მიმდინარე მოვლენებს და საბჭოსთვის განსახილველად შეიმუშავებს რეკომენდაციებს; შესაბამის უწყებებთან კოორდინაციით განიხილავს სამხედრო აღმშენებლობის სფეროში დაგეგმილ პროექტებს და ამავე სფეროში პოლიტიკის განმსაზღვრელ დოკუმენტებს; ახორციელებს საქართველოს პრეზიდენტის ინფორმაციულ-ანალიტიკურ უზრუნველყოფას სამხედრო აღმშენებლობის სფეროში მიმდინარე მოვლენებთან დაკავშირებით; აანალიზებს და შეიმუშავებს საქართველოს პრეზიდენტის მიერ კანონმდებლობით განსაზღვრულ სამხედრო თანამდებობებზე დანიშვნასა და თანამდებობიდან გათავისუფლებასთან, სამხედრო და სპეციალური წოდებების მინიჭებასთან დაკავშირებულ საკითხებს; საკუთარი ამოცანების მისაღწევად მჭიდროდ კოორდინირებს თავდაცვისა და ანალიტიკის დეპარტამენტთან.
1.3    საზოგადოებასთან და საერთაშორისო ორგანიზაციებთან ურთიერთობის დეპარტამენტი: ურთიერთობს უცხო ქვეყნების ოფიციალურ პირებთან, საერთაშორისო ორგანიზაციებთან და უცხოურ მედიასთან; წარმართავს აპარატის ურთიერთობას სხვა ქვეყნების ანალოგიური ფუნქციის მქონე უწყებათა აპარატებთან; ურთიერთობს ქვეყნის შიგნით არსებულ ორგანიზაციებთან, საზოგადოებასთან და ეროვნულ მედიასთან; ახორციელებს ქვეყნის თავდაცვისა და სამხედრო აღმშენებლობის სფეროში არსებული პროექტების პოპულარიზაციას და საზოგადოების ინფორმირებას მათი მიმდინარეობის შესახებ.
1.4    იურიდიული დეპარტამენტი: ახორციელებს ქვეყნის თავდაცვისა და სამხედრო აღმშენებლობის სფეროში არსებული კანონმდებლობის სამართლებრივ ექსპერტიზას; განიხილავს და საბჭოს მიერ განსახილველად ამზადებს პრეზიდენტის მიერ გამოსაცემ იმ ნორმატიული აქტების სამართლებრივ ფორმას, რომლებიც ეხება ქვეყნის თავდაცვისა და სამხედრო აღმშენებლობის საკითხებს და აფასებს მათ შესაბამისობას ამ სფეროში არსებულ კანონმდებლობასთან; წარმოადგენს საბჭოს და მის აპარატს სამართლებრივი დავისას; ახორციელებს აპარატის იურიდიულ მომსახურებას.
1.5    ადამიანური რესურსების მართვისა და საქმისწარმოების დეპარტამენტი: უზრუნველყოფს ადამიანური რესურსების მართვის საქმიანობას; ახორციელებს აპარატში სახელმწიფო საიდუმლოების საქმისწარმოებას; საქართველოს პრეზიდენტის შესაბამისი საიდუმლო გრიფის მქონე დოკუმენტების რეგისტრაციას; ასრულებს საბჭოს საქმისწარმოების სამუშაოებს; გასცემს საჯარო ინფორმაციას; ასრულებს საქართველოს პრეზიდენტისა და საქართველოს პრეზიდენტის თანაშემწის ეროვნული უშიშროების საკითხებში - ეროვნული უშიშროების საბჭოს მდივნის საკონტროლო დავალებებს.
1.6    საფინანსო-სამეურნეო დეპარტამენტი: განკარგავს აპარატის ფინანსებს, ბუღალტერიას; აწარმოებს აპარატის შესყიდვებს; განკარგავს აპარატის მატერიალურ-ტექნიკურ ქონებას; ამზადებს აპარატის ბიუჯეტს.
2.    აპარატის სტრუქტურულ ქვედანაყოფებს ხელმძღვანელობენ დეპარტამენტის დირექტორები.
მუხლი 5. დასკვნითი დებულება
არსებული დებულების გაუქმება, მასში ცვლილებებისა და დამატებების შეტანა ხდება საქართველოს პრეზიდენტის ბრძანებულებით.