„საშიში საწარმოო ობიექტის უსაფრთხოების შესახებ“ საქართველოს კანონში ცვლილებებისა და დამატებების შეტანის თაობაზე

საქართველოს კანონი

„საშიში საწარმოო ობიექტის უსაფრთხოების შესახებ“ საქართველოს კანონში ცვლილებებისა და დამატებების შეტანის თაობაზე

    მუხლი 1

„საშიში საწარმოო ობიექტის უსაფრთხოების შესახებ“ საქართველოს კანონში (პარლამენტის უწყებანი, №47-48, 31.12.1997, გვ. 154) შეტანილ იქნეს შემდეგი ცვლილებები და დამატებები:

1. მე-2 მუხლის მე-3 პუნქტი ჩამოყალიბდეს შემდეგი რედაქციით:

„3. ობიექტი, გარდა განსაკუთრებით დაცული სამხედრო და სამოქალაქო თავდაცვის ობიექტებისა, ვალდებულია საქართველოს ტექნიკური ზედამხედველობის სახელმწიფო ინსპექციას მისივე მოთხოვნით წარუდგინოს უსაფრთხოების დეკლარაცია, რომლის ფორმას შეიმუშავებს და წარდგენის წესს ადგენს საქართველოს მთავრობა.“.

2. მე-3 მუხლის:

ა) პირველ პუნქტს დაემატოს შემდეგი შინაარსის „გ“ ქვეპუნქტი:

„გ) ამ მუხლის მე-3 პუნქტით განსაზღვრულ უფლებამოსილ ორგანოთა მოთხოვნის შესაბამისად მათთვის უსაფრთხოების დეკლარაციის წარდგენა.“;

ბ) მე-3 პუნქტის:

ბ.ა) „ე“ ქვეპუნქტის შემდეგ დაემატოს შემდეგი შინაარსის „ე¹“ ქვეპუნქტი:

„ე¹) საქართველოს შინაგან საქმეთა სამინისტროს საგანგებო სიტუაციების მართვის დეპარტამენტი, საქართველოს შინაგან საქმეთა სამინისტროს საგანგებო სიტუაციების მართვის დეპარტამენტის აფხაზეთისა და აჭარის ავტონომიური რესპუბლიკების სტრუქტურული დანაყოფები, ადგილობრივი თვითმმართველობის ორგანოების საგანგებო სიტუაციების მართვის დანაყოფები – ხანძრის თავიდან აცილებისა და მისგან გამოწვეული შედეგების ლიკვიდაციის, აგრეთვე საგანგებო სიტუაციაში მოქალაქეთა მომზადების, პრევენციული ღონისძიებების დაგეგმვისა და კონტროლის სფეროებში;“;

ბ.ბ) „ვ“ და „ზ“ ქვეპუნქტები ამოღებულ იქნეს.

3. მე-10 მუხლის პირველ პუნქტს დაემატოს შემდეგი შინაარსის „თ¹“ ქვეპუნქტი:

„თ¹) საქართველოს ტექნიკური ზედამხედველობის სახელმწიფო ინსპექციას საქართველოს კანონმდებლობით დადგენილი წესით წარუდგინოს უსაფრთხოების დეკლარაცია;“.

    მუხლი 2

ეს კანონი ამოქმედდეს გამოქვეყნებისთანავე.

საქართველოს პრეზიდენტი მ. სააკაშვილი

თბილისი,

2007 წლის 8 ივნისი.

№4923–Iს