საქართველოს შავიზღვისპირა რეგიონში სატრანსპორტო გადაზიდვების არსებული პოტენციალის შემდგომი განვითარების მიზნით განსახორციელებელი ღონისძიებების შესახებ

საქართველოს მთავრობის

განკარგულება №1590

2013 წლის 25 ნოემბერი

ქ. თბილისი

საქართველოს შავიზღვისპირა რეგიონში სატრანსპორტო გადაზიდვების არსებული პოტენციალის შემდგომი განვითარების მიზნით განსახორციელებელი ღონისძიებების შესახებ

1. საქართველოს ხელსაყრელი გეოპოლიტიკური მდებარეობით განპირობებული კონკურენტული უპირატესობების განვითარებისა და შავიზღვისპირა რეგიონში სატრანსპორტო გადაზიდვების არსებული პოტენციალის შემდგომი რეალიზაციის მიზნით დაევალოს სს „საპარტნიორო ფონდს“:

ა) გლობალურ ეკონომიკაში არსებული ტენდენციებისა და საქართველოს კონკურენტული უპირატესობების გათვალისწინებით, „შავიზღვისპირა რეგიონში სატვირთო‑სატრანსპორტო ინფრასტრუქტურის განვითარების კონცეფციის“ მომზადება და საქართველოს ეკონომიკისა და მდგრადი განვითარების სამინისტროსთან შეთანხმებით  საქართველოს მთავრობისთვის დასამტკიცებლად წარდგენა;

ბ) საქართველოს მთავრობის მიერ  დამტკიცებული „შავიზღვისპირა რეგიონში სატვირთო‑სატრანსპორტო ინფრასტრუქტურის განვითარების კონცეფციის“ განხორციელების უზრუნველყოფა თავისი კომპეტენციის ფარგლებში.

2. „სახელმწიფო შესყიდვების შესახებ“ საქართველოს კანონის 10¹ მუხლის მე-3 პუნქტის „დ“ ქვეპუნქტის შესაბამისად, სს „საპარტნიორო ფონდმა“ ამ განკარგულების პირველი პუნქტით გათვალისწინებული დავალების ეფექტიანი შესრულების მიზნით ერთი ან რამოდენიმე საკონსულტაციო მომსახურების  შესყიდვა ჯამურად ხუთი მილიონი აშშ დოლარის ფარგლებში განახორციელოს გამარტივებული შესყიდვის საშუალებით, საკუთარი სახსრებით.

3. მე-2 პუნქტში მითითებული მომსახურება მიზნად უნდა ისახავდეს კონსულტაციის გაწევას საქართველოს შავიზღვისპირა რეგიონში  სატვირთო‑სატრანსპორტო ინფრასტრუქტურის განვითარების განახლებული კონცეფციის მომზადების პროცესში; აგრეთვე აღნიშნული კონცეფციის რეალიზაციით დაინტერესებული პოტენციური ინვესტორების, გადამზიდავი კომპანიების, მსხვილი კორპორატიული მომხმარებლების, სხვა დაინტერესებული ორგანიზაციების მოძიებას და მათთან მოლაპარაკების წარმოებაში სს „საპარტნიორო ფონდისთვის“ დახმარების გაწევას .

4. ამ განკარგულების პირველ პუნქტში მითითებული კონცეფციის დამტკიცების შემდეგ, სს „საპარტნიორო ფონდმა“ საქართველოს ეკონომიკისა და მდგრადი განვითარების სამინისტროსთან ერთად მოახდინოს საქართველოს შავიზღვისპირა რეგიონში სხვადასხვა სახეობის სატრანსპორტო ინფრასტრუქტურული პროექტების ანალიზი პირველ პუნქტში მითითებულ კონცეფციასთან შესაბამისობის თვალსაზრისით.

პრემიერ‑მინისტრი                             ი . ღარიბაშვილი