"აფხაზეთის ავტონომიური რესპუბლიკის შრომის, ჯანმრთელობისა და სოციალური დაცვის სამინისტროს დებულების დამტკიცების შესახებ" აფხაზეთის მთავრობის 2010 წლის 14 აპრილის №14 დადგენილებაში ცვლილებების შეტანის შესახებ

აფხაზეთის ავტონომიური რესპუბლიკის მთავრობის

დადგენილება №18

2013 წლის 31 ოქტომბერი

 ქ. თბილისი

,,აფხაზეთის ავტონომიური რესპუბლიკის  შრომის, ჯანმრთელობისა და სოციალური დაცვის  სამინისტროს დებულების დამტკიცების შესახებ’’ აფხაზეთის მთავრობის 2010  წლის 14 აპრილის №14 დადგენილებაში ცვლილებების შეტანის შესახებ

მუხლი 1. ,,ნორმატიული აქტების  შესახებ’’ საქართველოს კანონის მე-20 მუხლის, ,,ნორმატიული აქტების შესახებ’’ აფხაზეთის ავტონომიური რესპუბლიკის კანონის მე-18 მუხლის   შესაბამისად, ,,აფხაზეთის  ავტონომიური რესპუბლიკის   შრომის, ჯანმრთელობისა და სოციალური დაცვის სამინისტროს დებულების  დამტკიცების შესახებ’’ აფხაზეთის  მთავრობის 2010 წლის 14 აპრილის   №14 დადგენილებით (აფხაზეთის ავტონომიური რესპუბლიკის საკანონმდებლო მაცნე №6, 15.04.2010 წ., მუხლი 16) დამტკიცებულ დებულებაში შეტანილ იქნეს შემდეგი სახის ცვლილებები:

1. დებულების მე-3 მუხლის პირველი პუნქტის ,,ე“ ქვეპუნქტი ამოღებულ იქნეს.

2. დებულების მე-8 მუხლის პირველი პუნქტი ჩამოყალიბდეს შემდეგი რედაქციით:

,,1. ადმინისტრაციული დეპარტამენტის ძირითადი ამოცანები და კომპეტენცია:

ა) სამინისტროს სახელმწიფო პროგრამებისათვის დანახარჯებისა და რესურსების პროგნოზირება და ხარჯვის მიმდინარეობის ანალიზი;

ბ) სამინისტროს წლიური და საშუალოვადიანი ბიუჯეტების პროექტების მომზადება;

გ) სახელმწიფო შესყიდვების ორგანიზება, საბუღალტრო აღრიცხვა-ანგარიშგება, საფინანსო-ეკონომიკური საქმიანობის მიზანმიმართულად განხორციელება;

დ) სახელმწიფო შესყიდვების წესით შეძენილი ტვირთის მიღება, შენახვა და გადაცემა დადგენილი წესით. ასევე, ჰუმანიტარული ტვირთის მიღება-შენახვის ორგანიზება;

ე) სამინისტროს საქმიანობის სამართლებრივი უზრუნველყოფა და კანონშემოქმედებითი საქმიანობის განხორციელება;

ვ) სამინისტროს საქმისწარმოების ორგანიზება;

ზ) სამინისტროს საჯარო მოხელეთა და მოსამსახურეთა დისციპლინის დაცვის კონტროლი, სამსახურებრივი გადაცდომის ფაქტებზე სამსახურებრივი მოკვლევა და სათანადო დასკვნების დადება;

თ) მინისტრის მინდობილობის საფუძველზე სამინისტროს წარმომადგენლობის უზრუნველყოფა;

ი) სამინისტროს სისტემის საჯარო მოხელეთა და მოსამსახურეთა დანიშვნა-გათავისუფლების შესახებ ინდივიდუალური ადმინისტრაციულ-სამართლებრივი აქტების პროექტების მომზადება, პირადი საქმეების შედგენა და საკადრო საკითხების წარმოება;

კ) სამინისტროს მატერიალურ-ტექნიკური უზრუნველყოფისა და მომსახურების განხორციელება;

ლ) კადრების კვალიფიკაციის ამაღლებისა და დახელოვნების ღონისძიებათა უზრუნველყოფა;

მ) მინისტრის, მინისტრის მოადგილეებისა და სამინისტროს თანამდებობის პირების საქმიანობის ხელშეწყობა და უზრუნველყოფა;

ნ) მინისტრის ცალკეულ დავალებათა შესრულების უზრუნველყოფა.“.

3. დებულების 10² მუხლი ამოღებულ იქნეს.

მუხლი 2. დადგენილება ძალაშია გამოქვეყნებისთანავე.

აფხაზეთის ავტონომიური რესპუბლიკის

მთავრობის თავმჯდომარის

მოვალეობის შემსრულებელი   ვ. ყოლბაია