დოკუმენტის სტრუქტურა
განმარტებების დათვალიერება
დაკავშირებული დოკუმენტები
დოკუმენტის მონიშვნები
უკან დაბრუნება | შ.პ.ს. „სამშნებლო კომპანია - მშენებელი 2011“-სათვის საქონლისა და მომსახურების შესყიდვების სპეციალური წესის დამტკიცების შესახებ | |
|---|---|
| დოკუმენტის ნომერი | 245 |
| დოკუმენტის მიმღები | საქართველოს მთავრობა |
| მიღების თარიღი | 23/09/2013 |
| დოკუმენტის ტიპი | საქართველოს მთავრობის დადგენილება |
| გამოქვეყნების წყარო, თარიღი | ვებგვერდი, 23/09/2013 |
| ძალის დაკარგვის თარიღი | 01/01/2014 |
| სარეგისტრაციო კოდი | 040170020.10.003.017412 |
|
შ.პ.ს. „სამშნებლო კომპანია – მშენებელი 2011“-სათვის საქონლისა და მომსახურების შესყიდვების სპეციალური წესის დამტკიცების შესახებ
|
| მუხლი 1 |
„სახელმწიფო შესყიდვების შესახებ“ საქართველოს კანონის მე-3 მუხლის პირველი პუნქტის „ა.თ“ ქვეპუნქტის საფუძველზე, დამტკიცდეს თანდართული „შპს. „სამშენებლო კომპანია - მშენებელი 2011“-ისათვის საქონლისა და მომსახურების შესყიდვების სპეციალური წესი“. |
| მუხლი 2 |
დადგენილება ამოქმედდეს გამოქვეყნებისთანავე და ძალაშია 2013 წლის 31 დეკემბრის ჩათვლით. |
|
შ.პ.ს. „სამშენებლო კომპანია - მშენებელი 2011“-სათვის საქონლისა და მომსახურების შესყიდვების სპეციალური წესი
|
მუხლი 1.
ზოგადი დებულებები |
1. შპს „სამშენებლო კომპანია – მშენებელი 2011“-ისათვის საქონლისა და მომსახურების შესყიდვების სპეციალური წესი“ (შემდგომში – წესი) შემუშავებულია „სახელმწიფო შესყიდვების შესახებ“ საქართველოს კანონის მე-3 მუხლის პირველი პუნქტის „ა.თ“ ქვეპუნქტის შესაბამისად და ადგენს შპს „სამშენებლო კომპანია – მშენებელი 2011“-ის სახსრებით საქონლისა და მომსახურების შესყიდვების სპეციალური წესს. ამ წესის მიზანია განსახორციელებელი მომსახურებისა და საქონლის შესყიდვების პროცედურების გამარტივება. კომპანიის მიზნების შეუფერხებლად განხორციელების უზრუნველყოფა.
2. შპს „სამშენებლო კომპანია – მშენებელი 2011“-ის მიერ სამუშაოების შესყიდვაზე ვრცელდება საქართველოს კანონი „სახელმწიფო შესყიდვების შესახებ“ და სახელმწიფო შესყიდვების სააგენტოს თავმჯდომარის 2011 წლის 7 აპრილის №9 ბრძანება „გამარტივებული შესყიდვის, გამარტივებული ელექტრონული ტენდერის და ელექტრონული ტენდერის ჩატარების წესის დამტკიცების შესახებ“. 3. შესყიდვების განხორციელებისას შეიძლება გამოყენებულ იქნეს მსოფლიო ბანკის, გაერთიანებული ერების ორგანიზაციის, ევროპის რეკონსტრუქციისა და განვითარების ბანკის, აზიის განვითარების ბანკის, სხვა დონორი (დამფინანსებელი) ორგანიზაციებისა და ქვეყნის მიერ განსაზღვრული შესყიდვის პროცედურები, თუ შესყიდვის განხორციელებასთან დაკავშირებული სამართალურთიერთობის მონაწილე რომელიმე ზემოაღნიშნული სუბიექტია. იმ შემთხვევაში, თუ სუბიექტები არ არიან შესყიდვის განხორციელებასთან დაკავშიებული სამართალ-ურთიერთობის მონაწილენი, მათი, აგრეთვე სხვა სუბიექტების შესყიდვების პროცედურები შესაძლებელია გამოყენებულ იქნეს მხოლოდ საქართველოს მთავრობის განკარგულების საფუძველზე. 4. საქონლისა და მომსახურების შესყიდვების შესახებ გადაწყვეტილება მიიღება ამ წესის შესაბამისად. 5. ამ წესის მოქმედების პერიოდში შპს „სამშენებლო კომპანია – მშენებელი 2011“-ის მიერ ამ წესის შესაბამისად განხორციელებული ნებისმიერი სახის შესყიდვის ღირებულების საერთო ჯამი არ უნდა აღემატებოდეს 5 000 000 (ხუთი მილიონი) ლარს. |
მუხლი 2.
ტერმინთა განმარტება |
ამ წესში გამოყენებულ ტერმინებს აქვს შემდეგი მნიშვნელობა:
ა) შესყიდვა – შპს „სამშენებლო კომპანია – მშენებელი 2011“-ის მიერ ამ წესის №1 დანართით განსაზღვრული თითოეული სახის საქონლისა და მომსახურების შესყიდვა; ბ) შემსყიდველი ორგანიზაცია – შპს „სამშენებლო კომპანია - მშენებელი 2011“; გ) შესყიდვის ობიექტი – შესასყიდი საქონელი ან/და მომსახურება; დ) საქონელი – ნებისმიერი სახისა და აღწერილობის ქონება (გარდა უძრავი ქონებისა), როგორც მყარ, ისე თხევად ან აირად მდგომარეობაში, აგრეთვე საქონლის მიწოდების თანმდევი მომსახურება, თუ ამ მომსახურების ღირებულება არ აღემატება საქონლის ღირებულებას; ე) მომსახურება – შესყიდვის ნებისმიერი ობიექტი, საქონლისა და სამუშაოს გარდა, ამასთან, ამ წესის მიზნებისათვის ტერმინი – მომსახურება მოიცავს იჯარას, ქირავნობასა და ლიზინგს; ვ) ერთ პირთან მოლაპარაკება – საქონლისა და მომსახურების შესყიდვის გამარტივებულული საშუალება; ზ) პირთა გამოკითხვა – საქონლისა და მომსახურების შესყიდვის გამარტივებულული საშუალება; თ) გამარტივებული ელექტრონული ტენდერი – „სახელმწიფო შესყიდვების შესახებ“ საქართველოს კანონით გათვალისწინებული შესყიდვის საშუალება; ი) ელექტრონული ტენდერი – „სახელმწიფო შესყიდვების შესახებ“ საქართველოს კანონით გათვალისწინებული შესყიდვის საშუალება; კ) პრეტედენტი – შესყიდვის მონაწილე პირი, რომელიც წარადგენს პირთა გამოკითხვის წინადადებას; ლ) მიმწოდებელი – პირი, რომელიც შპს „სამშენებლო კომპანია – მშენებელი 2011“-ს აწვდის საქონელს ან/და უწევს მომსახურებას ამ წესის შესაბამისად; მ) პირობათა გამოკითხვა – გამარტივებული საშუალება საქონლისა და მომსახურების შესყიდვისათვის; ნ) კომისია – შპს „სამშენებლო კომპანია – მშენებელი 2011“-ის დირექტორის მიერ ამ წესის მე-6 მუხლის შესაბამისად შექმნილი კომისია. |
მუხლი 3.
„სამშენებლო კომპანია - მშენებელი 2011“-ის უფლება-მოვალეობები |
1. შპს „სამშენებლო კომპანია – მშენებელი 2011“ უფლებამოსილია:
ა) ამ წესის შესაბამისად მოახდინოს პრეტედენტთა შერჩევა; ბ) ამ წესის დაცვით შეარჩიოს მიმწოდებელი; გ) ხელშეკრულების დადებამდე ნებისმიერ დროს შეაჩეროს ან შეწყვიტოს შესყიდვის პროცედურა, თუ აღნიშნული შესყიდვა შპს „სამშენებლო კომპანია – მშენებელი 2011“-სათვის წამგებიანი აღმოჩნდება; დ) განახორციელოს მიმწოდებლის მიერ ხელშეკრულების პირობების შესრულების კონტროლი და ზედამხედველობა; ე) შეაჩეროს ან შეწყვიტოს ხელშეკრულების მოქმედება საქართველოს კანონმდებლობით გათვალისწინებული შემთხვევების არსებობისას. 2. შპს „სამშენებლო კომპანია – მშენებელი 2011“ ვალდებულია ამ წესის შესაბამისად განსაზღვრული შესყიდვის საშუალებების გამოყენება: ერთ პირთან მოლაპარაკება და პირობათა გამოკითხვა შეათანხმოს საქართველოს თავდაცვის სამინისტროსთან. |
მუხლი 4.
ინტერესთა კონფლიქტის თავიდან აცილების პირობები და წესები |
1. ინტერესთა კონფლიქტი ეხება შესყიდვების განხორციელებასთან დაკავშირებული საკვალიფიკაციო მონაცემებისა და პირობათა გამოკითხვის წინადადებების განხილვას, შერჩევას და შეფასებას.
2. ამ მუხლის პირველი პუნქტით განსაზღვრული საქმიანობის განმახორციელებელ პირს ექნება ინტერესთა კონფლიქტი პრეტენდენტთან ან მიმწოდებელთან, თუ მათ შორის არსებობს საქართველოს საგადასახადო კოდექსის მე-19 მუხლით გათვალისწინებული ურთიერთობები. 3. დაუშვებელია, პრეტენდენტმა ან მომწოდებელმა ამ მუხლის პირველი პუნქტით განსაზღვრული საქმიანობის განმახორციელებელ პირზე პირდაპირ ან არაპირდაპირ მოახდინოს ზეგავლენა მისთვის ხელსაყრელი გადაწყვეტილების მიღების მიზნით. 4. მას შემდეგ, რაც ამ მუხლის პირველი პუნქტით განსაზღვრული საქმიანობის განმახორციელებელი პირისათვის ცნობილი გახდება პრეტენდენტის ან მიმწოდებლის ვინაობა, იგი ვალდებულია წერილობით დაადასტუროს, რომ ამ შესყიდვის განხორციელებაში მისი მონაწილეობა არ იწვევს ინტერესთა კონფლიქტს. 5. თუ ამ მუხლის პირველი პუნქტით განსაზღვრული საქმიანობის განმახორციელებელ პირს წარმოეშობა ინტერესთა კონფლიქტი, მან დაუყოვნებლივ უნდა განაცხადოს აღნიშნულის თაობაზე და შეწყვიტოს მონაწილეობა ამ შესყიდვის განხორციელებაში. |
მუხლი 5.
შესყიდვის საშუალებები |
1. შესყიდვის საშუალებებია:
ა) ერთ პირთან მოლაპარაკება; ბ) პირთა გამოკითხვა; გ) გამარტივებული ელექტრონული ტენდერი; დ) ელექტრონული ტენდერი. 2. შესყიდვა ხორციელდება პირობათა გამოკითხვის საშუალებით, თუ ამ მუხლით სხვა რამ არ არის გათვალისწინებული. 3. შესყიდვა შეიძლება განხორციელდეს ერთ პირთან მოლაპარაკების საშუალებით დირექტორის გადაწყვეტილებით და საქართველოს თავდაცვის სამინისტროსთან შეთანხმებით, თუ: ა) საქონლის/მომსახურების ღირებულება ამ წესის №1 დანართით განსაზღვრული თითოეული სახის საქონელი ან მომსახურება წესის მოქმედების ვადაში არ აღემატება 500 000 ლარს; ბ) საქონლის მიწოდება ან მომსახურების გაწევა მხოლოდ ერთი პირის ექსკლუზიური უფლებაა; გ) მიმწოდებლისგან შესყიდული ობიექტის ხარისხის გაუარესების თავიდან აცილების ან/და მისი შემდგომი ექსპლუატაციის უზრუნველყოფის მიზნით აუცილებელია შესყიდვა იმავე მიმწოდებლისგან, გარდა იმ შემთხვევებისა, როდესაც განსახორციელებელი შესყიდვის ობიექტის სავარაუდო ღირებულება აღემატება თავდაპირველი მოწოდების ღირებულებას; დ) ხორციელდება შესყიდული საქონლის ახალი, იმავე ან გაუმჯობესებული პარამეტრების მქონე საქონლით ჩანაცვლება; ე) მე-13 მუხლის მე-2 პუნქტით გათვალისწინებული შემთხვევის არსებობისას; ვ) კომისიის გადაწყვეტილებით, თუ ამგვარი გადაწყვეტილება გამოწვეულია ობიექტური გარემოებებით ან/და გამართლებულია დროის, ტექნიკურ-ეკონომიკური და ფინანსური თვალსაზრისით. 4. პირობათა გამოკითხვის პროცედურებს ახორციელებს კომისია. 5. შპს „სამშენებლო კომპანია – მშენებელი 2011“-ის დირექტორის გადაწყვეტილებით, შესყიდვა შეიძლება განხორციელდეს გამარტივებული ელექტრონული ტენდერისა და ელექტრონული ტენდერის საშუალებით. 6. ელექტრონული ტენდერისა და გამარტივებული ელექტრონული ტენდერის საშუალებით შესყიდვა ხორციელდება „სახელმწიფო შესყიდვების შესახებ“ საქართველოს კანონის შესაბამისად. |
მუხლი 6.
კომისიის შექმნის და საქმიანობის წესი |
1. პირობათა გამოკითხვას ატარებს კომისია, რომელსაც ბრძანებით ქმნის შ.პ.ს. „სამშენებლო კომპანია – მშენებელი 2011“-ის დირექტორი არანაკლებ 3 წევრის შემადგენლობით.
2. კომისიის წევრებად ინიშნებიან შპს „სამშენებლო კომპანია – მშენებელი 2011“-ის თანამშრომლები. 3. კომისიას თავჯდომარეობს შპს „სამშენებლო კომპანია – მშენებელი 2011“-ის ხელმძღვანელობაზე უფლებამოსილების მქონე პირი ან მის მიერ დანიშნული პირი. 4. კომისიის გადაწყვეტილების საფუძველზე კომისიაში ექსპერტებად და კონსულტანტებად შეიძლება მოწვეულ იქნენ შესაბამისი დარგის სპეციალისტები. 5. კომისია გადაწყვეტილებებს იღებს კომისიის წევრთა სიითი შემადგენლობის უმრავლესობით. კომისიის წევრს, რომელიც არ ეთანხმება კომისიის გადაწყვეტილებას, უფლება აქვს, წერილობით წარადგინოს თავისი აზრი, რომელიც უნდა დაერთოს კომისიის გადაწყვეტილებას. ხმათა თანაბრად განაწილების შემთხვევაში გადამწყვეტია კომისიის თავჯდომარის ხმა. 6. კომისიის სხდომის შესახებ დგება აქტი, რომელსაც ხელს აწერენ სხდომაზე დამსწრე კომისიის წევრები და კომისიის თავჯდომარე. |
მუხლი 7.
განცხადება პირობათა გამოკითხვის ჩატარების შესახებ |
1. პირობათა გამოკითხვის ჩატარებისას კომისია შ.პ.ს. „სამშენებლო კომპანია – მშენებელი 2011“-ის სახელით პირობათა გამოკითხვის დოკუმენტაციას (შემდგომში – დოკუმენტაცია) უგზავნის მის მიერ შერჩეულ არანაკლებ სამ პირს. თუ ვერ მოხერხდა სამი პირის შერჩევა, ასეთ შემთხვევაში პირობათა გამოკითხვის შესახებ განცხადებას აქვეყნებს მასობრივი ინფორმაციის საშუალებებში.
2. პირობათა გამოკითხვის ჩატარების შესახებ განცხადებაში მითითებული უნდა იყოს: ა) შპს „სამშენებლო კომპანია – მშენებელი 2011“-ის რეკვიზიტები; ბ) შესასყიდი საქონლისა და მომსახურების სახეობა, რაოდენობა, ხარისხი და სავარაუდო ღირებულება. იმ შემთხვევაში, თუ შესყიდვის ობიექტის (ნავთობპროდუქცია და სხვა მსგავსი საქონელი) ღირებულება თავისი სპეციფიკის გამო დამოკიდებულია საერთაშორისო სასაქონლო ბირჟაზე არსებულ ცვალებად ფასებზე, შესაძლებელია, შესყიდვის ობიექტის სავარაუდო ღირებულების დადგენისას შ.პ.ს. „საშენებლო კომპანია – მშენებელი 2011“-მა გაითვალისწინოს შემსყიდველის მიერ განსაზღვრული მომენტისათვის კონკრეტულ საერთაშორისო სასაქონლო ბირჟაზე არსებული მაჩვენებელი. ასეთ შემთხვევაში შესყიდვის ობიექტის სავარაუდო ღირებულების დასადგენად გამოიყენება კანონქვემდებარე ნორმატიული აქტით გათვალისწინებული წესი, მიწოდების ადგილი და ფორმა, შესრულების ადგილი, აგრეთვე სხვა მონაცემები, რომელთა მითითებას შ.პ.ს. „სამშენებლო კომპანია – მშენებელი 2011“ საჭიროდ მიიჩნევს შესყიდვის ობიექტის აღწერის მიზნით; გ) შესასყიდი საქონლის მიწოდებისა და მომსახურების გაწევის სასურველი ან სავარაუდო ვადები; დ) პირობათა გამოკითხვის შესახებ წინადადების წარდგენის ვადა, ადგილი და ენა; ე) საკვალიფიკაციო მონაცემების დამადასტურებელი დოკუმენტები, ასეთის მოთხოვნის შემთხვევაში; ვ) დოკუმენტაციის გატანის წესი, ვადა და ადგილი; 3. პირობათა გამოკითხვის ჩატარების შესახებ განცხადებას ამტკიცებს კომისია. 4. კომისიას უფლება აქვს შეცვალოს პირობათა გამოკითხვის ჩატარების შესახებ განცხადებაში მითითებული ინფორმაცია. ეს ცვლილებები უნდა გამოქვეყნდეს იმავე საინფორმაციო საშუალებებში, რომლებშიც გამოქვეყნდა განცხადება პირობათა გამოკითხვის ჩატარების შესახებ. ასევე მიეწოდოთ ინფორმაცია წერილობითი სახით იმ პრეტენდენტებს, რომელთაც დაეგზავნათ ან რომლებმაც გაიტანეს დოკუმენტაცია. 5. პირობათა გამოკითხვის ჩატარების შესახებ განცხადებში შეტანილი ცვლილებები უნდა გამოქვეყნდეს გონივრულ ვადებში, შესყიდვის ობიექტის სპეციფიკიდან გამომდინარე. |
მუხლი 8.
საკვალიფიკაციო მონაცემები |
შესყიდვის მონაწილეობის მსურველთათვის საკვალიფიკაციო მონაცემების შესახებ მოთხოვნებს ყოველ კონკრეტულ შემთხვევაში განსაზღვრავს კომისია. |
მუხლი 9.
პირობათა გამოკითხვის დოკუმენტაცია |
1. კომისია დოკუმენტაციას ამტკიცებს პირობათა გამოკითხვის ჩატარების შესახებ განცხადების გაგზავნამდე ან მის გამოქვეყნებამდე.
2. დოკუმენტაცია უნდა შეიცავდეს: ა) განაცხადს პირობათა გამოკითხვის პროცედურაში მონაწილეობისათვის; ბ) ინფორმაციას ტექნიკური შესაბამისობის შესახებ (შესყიდვის ობიექტის დასახელება, შესყიდვის ობიექტის აღწერილობა); გ) ინფორმაციას ფასებისა და მიწოდების გრაფიკის შესახებ; დ) პირობათა გამოკითხვის წინადადებას; ე) შეფასების კრიტერიუმებს. |
მუხლი 10.
პრეტენდენტთა პირობათა გამოკითხვის წინადადების წარდგენისა და განხილვის წესი |
1. პირობათა გამოკითხვის წინადადების (შემდგომში – წინადადება) წარდგენა შესაძლებელია დახურული კონვერტით. შეთავაზებული წინადადებების შერჩევა ხდება პრეტენდენტთა თანდასწრებით.
2. პრეტენდენტებს უფლება აქვთ, კონვერტების გახსნამდე ნებისმიერ დროს წერილობით გამოითხოვონ ან შეცვალონ წინადადება. 3. შესული წინადადების შერჩევა ხდება იმავე დღეს, წინადადების მიღების დამთავრებისთანავე, ხოლო გამარჯვებული გამოვლინდება შერჩევის დასრულებიდან 2 დღის ვადაში. 4. კომისია პრეტენდენტის დისკვალიფიკაციას ახდენს იმ შემთხვევაში თუ: ა) პრეტენდენტის მიერ არ არის წარდგენილი ყველა საჭირო დოკუმენტაცია (თანმხლები დოკუმენტების ჩათვლით) ან/და ინფორმაცია, საჭიროების შემთხვევაში – ნიმუში; ბ) შესყიდვის პროცედურების დროს ადგილი ექნება პრეტენდენტის არაკეთილსინდისიერ ქმედებას; გ) შესყიდვის პროცედურების მონაწილე პირის მიერ წარმოდგენილი მონაცემები ან/და მათი დამადასტურებელი დოკუმენტები ყალბი აღმოჩნდება. 5. შემსყიდველი იტოვებს უფლებას, წარდგენილ დოკუმენტაციაში რაიმე სახის ეჭვის გამოვლენის შემთხვევაში მოსთხოვოს პრეტენდენტს აღნიშნული დოკუმენტის ხელახალი (დაზუსტებული) წარდგენა. 6. წინადადების შერჩევის დროს უნდა შემოწმდეს, არის თუ არა მასში დაშვებული მექანიკური შეცდომები. შეცდომების გამოვლენის შემთხვევაში კომისიამ ამ წინადადების წარმდგენ პრეტენდენტს უნდა შესთავაზოს შეცდომის გამოსწორება. 7. კომისია ვალდებულია ზეპირ ვაჭრობაზე მოიწვიოს ის პრეტენდენტები, რომლების შერჩევის პროცედურების დასრულების შემდეგ დაიშვებიან შეფასებაზე. ამასთან, ზეპირი ვაჭრობის დროს დასაშვებია მხოლოდ წინადადებით წარდგენილი ფასის შეცვლა. 8. წინადადებები შეფასდება დოკუმენტაციაში მითითებული კრიტერიუმებისა და ამ კრიტერიუმების პრიორიტეტულობის გათვალისწინებით. 9. წინადადების შეფასებისას შეიძლება გამოყენებულ იქნას შემდეგი კრიტერიუმები: ა) წინადადების ღირებულება; ბ) საქონლის მიწოდებისა და მომსახურების გაწევის ვადები; გ) საქონლისა და მომსახურების ხარისხობრივი პარამეტრები და ფუნქციონალური მახასიათებლები; დ) ანგარიშსწორების ფორმები და პირობები. 10. შეფასებისას გამოყენებულ თითოეულ კრიტერიუმს უნდა გააჩნდეს ციფრობრივად გამოსახული ხვედრითი წონა ჯამურ შეფასებაში (პრიორიტეტულობის მაჩვენებელი), რომელიც უნდა გამოიხატოს კოეფიციენტის სახით. ამასთან ყველა კრიტერიუმის პრიორიტეტულობის კოეფიციენტების ჯამი უნდა უდრიდეს ერთ მთელს. მათ შორის ფასთა გამოკითხვის კოეფიციენტი გათვალისწინებული იქნება არანაკლებ 0,4-ით. 11. კომისიის თითოეული წევრი წერილობითი ფორმით აფასებს ყოველი პრეტენდენტის წინადადებას ცალ-ცალკე, ყოველი კრიტერიუმის მიხედვით ათქულიანი სისტემით, თითოეული კრიტერიუმის მიხედვით პრეტენდენტისათვის მინიჭებული ქულა მრავლდება ამ კრიტერიუმის პრიორიტეტულობის კოეფიციენტზე, ხოლო მიღებული ნამრავლის დაჯამებით გამოითვლება თითოეული პრეტენდენტის წინადადების ჯამური შეფასება. კომისიის წევრების მიერ ერთ-ერთი პრეტენდენტისათვის მინიჭებული ყველაზე მაღალი ჯამური შეფასება ჩაითვლება ამ პრეტენდენტისათვის მიცემულ ერთ ხმად. 12. პრეტენდენტი გამარჯვებულად ჩაითვლება, თუ მას კომისიის წევრთა სიის შემადგენლობის უმრავლესობის დასკვნით მიენიჭება უპირატესობა, ხმათა თანაბრად განაწილების შემთხვევაში გადამწყვეტია კომისიის თავჯდომარის დასკვნა. 13. კომისიის გადაწყვეტილება პირობათა გამოკითხვის პროცედურაში გამარჯვებული პრეტენდენტის შესახებ ფორმდება კომისიის სხდომის ოქმით, რომელსაც თან ერთვის კომისიის წევრთა დასკვნები. ოქმში აგრეთვე მოკლედ უნდა იყოს აღწერილი პრეტენდენტების მიერ წარდგენილი წინადადებები. |
მუხლი 11.
პირობათა გამოკითხვისას ზეპირი ვაჭრობის ჩატარების წესი და პირობები |
1. ზეპირი ვაჭრობა გაიმართება შემსყიდველი ორგანიზაციის მიერ დოკუმენტაციაში მითითებულ ადგილზე და დროს.
2. შემსყიდველი ორგანიზაცია უფლებამოსილია დოკუმენტაციაში არ მიუთითოს ზეპირი ვაჭრობის დაწყების კონკრეტული დრო. ასეთ შემთხვევაში შემსყიდველი ორგანიზაცია ვალდებულია შერჩევის პროცედურის დასრულებისთანავე დაადგინოს დოკუმენტაციაში მითითებულ დღეს ზეპირი ვაჭრობის დაწყების კონკრეტული დრო და ამის შესახებ დაუყოვნებლივ აცნობოს შეფასებაზე დაშვებულ პრეტენდენტებს. 3. კომისია ვალდებულია ზეპირ ვაჭრობაზე მოიწვიოს ის პრეტენდენტები, რომლებიც შერჩევის პროცედურების დასრულების შემდეგ დაიშვებიან შეფასებაზე. 4. ზეპირ ვაჭრობაზე გამოუცხადებლობა ან/და ზეპირ ვაჭრობაში მონაწილეობაზე უარი არ გამოიწვევს პრეტენდენტის დისკვალიფიკაციას. ასეთ შემთხვევაში ძალაში რჩება და ფიქსირდება პრეტენდენტის მიერ წარდგენილი წინადადების პირვანდელი ფასი. 5. ზეპირი ვაჭრობის გამართვის დროს კომისია წარუდგენს ზეპირი ვაჭრობის მონაწილე პრეტენდენტებს მათ მიერ წინადადებით წარდგენილ ფასებს ან/და ერთეულის ფასებს (მათი არსებობის შემთხვევაში) (შემდგომში – ფასი) აღნიშნული ინფორმაციის მიღების შემდეგ თითოეულ მონაწილე პრეტენდენტს უფლება აქვს, სამჯერ მოახდინოს წინადადების ფასის ცვლილება კლებადობის პრინციპის დაცვით. 6. ზეპირი ვაჭრობის მონაწილე პრეტენდენტების მიერ წინადადების ფასის ცვლა ხორციელდება რიგითობით. წინადადების ფასის ცვლას იწყებს შეფასებაზე დაშვებული უმაღლესი წინადადების ფასის მქონე და რიგითობის პრინციპით აგრძელებს ყოველი წინაზე უფრო დაბალი ფასის წინადადება. 7. ზეპირი ვაჭრობა დასრულებულად ითვლება ყოველი მონაწილის მიერ თავისი ფასის სამჯერ შეცვლის ან/და საბოლოო ფასის დაფიქსირების მომენტში. ზეპირი ვაჭრობის პროცედურა უნდა დასრულდეს მისი ჩატარების დღეს. 8. ზეპირი ვაჭრობის მსვლელობა, მათ შორის, თითოეული მონაწილე პრეტენდენტის წინადადების ფასი და ყოველ ჯერზე შეცვლილი დაფიქსირებული ფასი უნდა აისახოს შესაბამის ოქმში, რომელსაც ხალს აწერენ კომისიის ყველა წევრი და მონაწილე პრეტენდენტები. ზეპირი ვაჭრობის მონაწილე პრეტენდენტების მიერ ოქმის ხელმოწერაზე უარის თქმა მიიჩნევა, როგორც უარი მის მიერ ზეპირ ვაჭრობაზე დაფიქსირებულ ყველა შეცვლილ ფასზე და ძალაში დარჩება მისი წინადადების პირვანდელი ფასი. 9. ზეპირ ვაჭრობაზე საბოლოო ფასების დაფიქსირების შემდეგ შეფასება ხორციელდება ამ წესის შესაბამისად. |
მუხლი 12.
გამარჯვებულ პრეტენდენტებთან ხელშეკრულების დადება |
1. ამ წესის შესაბამისად გამარჯვებული პრეტენდენტის წინადადებით განსაზღვრული პირობების საფუძველზე გამარჯვებულ პრეტენდენტსა და შ.პ.ს. „სამშენებლო კომპანია – მშენებელი 2011“–ს შორის იდება ხელშეკრულება.
2. გამარჯვებული პრეტენდენტის დისკვალიფიკაციის ან მის მიერ ხელშეკრულების დადებაზე უარის თქმის შემთხვევაში, კომისია მიმართავს პირობათა გამოკითხვის პროცედურის მონაწილე დანარჩენ პრეტენდენტებს წინადადებათა ხელახალ განხილვაში მონაწილეობის თაობაზე, თუ არც ერთმა პრეტენდენტმა არ გამოთქვა თანხმობა წინადადებათა ხელახალ განხილვაში მონაწილეობის მიღებაზე ტარდება ახალი პირობათა გამოკითხვა. თუ წინადადებათა ხელახალ განხილვაში მონაწილეობაზე თანხმობა გამოთქვა ერთმა ან რამდენიმე პრეტენდენტმა, ხდება მათი წინადადებების ხელახალი განხილვა. |
მუხლი 13.
ჩაშლილი პირობათა გამოკითხვა |
1. პირობათა გამოკითხვა ითვლება ჩაშლილად, თუ:
ა) დადგენილ ვადებში არ იქნება წარდგენილი არც ერთი პირის საკვალიფიკაციო მონაცემები ან/და წინადადება; ბ) არც ერთი პირის მიერ წარდგენილი საკვალიფიკაციო მონაცემები ან/და წინადადება არ შეესაბამებოდა შ.პ.ს. „სამშენებლო კომპანია – მშენებელი 2011“-ის მოთხოვნებს; გ) წარდგენილი წინადადების ფასებიდან არც ერთი არ შეესაბამება შ.პ.ს. „სამშენებლო კომპანია – მშენებელი 2011“-ის ფინანსურ შესაძლებლობებს. 2. ამ მუხლის პირველი პუნქტით გათვალისწინებულ შემთხვევებში ტარდება ხელახალი პირობათა გამოკითხვა, ან კომისიის გადაწყვეტილებით, აუცილებლობის შემთხვევაში, შესყიდვა ხორციელდება ერთ პირთან მოლაპარაკების საშუალებით. |
მუხლი 14.
ხელახალი პირობათა გამოკითხვა |
1. პირობათა გამოკითხვის ჩაშლილად გამოცხადების შემდეგ კომისიას შეაქვს საჭირო ცვლილებები ახალ დოკუმენტაციაში და ატარებს ხელახალ პირობათა გამოკითხვას.
2. ამ მუხლის პირველი პუნქტით გათვალისწინებულ შემთხვევებში შ.პ.ს. „სამშენებლო კომპანია – მშენებელი 2011“–ის დირექტორს უფლება აქვს შეცვალოს კომისიის შემადგენლობა. |
მუხლი 15.
შესყიდვის შესახებ ხელშეკრულების პირობები |
1. შესყიდვის შესახებ ხელშეკრულება შეიძლება დაიდოს ზეპირი ან წერილობითი ფორმით, თუ ამ წესით სხვა რამ არ არის გათვალისწინებული.
2. შესყიდვის განხორციელება დასაშვებია წერილობითი ხელშეკრულების გარეშე ერთ პირთან მოლაპარაკების საშუალებით, თუ შესყიდვის საერთო ღირებულება არ აღემატება 20 000 ლარს. 3. შესყიდვის შესახებ ხელშეკრულების შესრულების უზრუნველყოფის მიზნით, როგორც წესი გამოიყენება ხელშეკრულების შესრულების გარანტირების მექანიზმი. 4. ხელშეკრულების შესრულების უზრუნველყოფის გარანტიის მექანიზმის მოთხოვნა სავალდებულოა, თუ ხელშეკრულების საერთო ღირებულება საქონლის ან/და მომსახურების შესყიდვის შემთხვევაში შეადგენს ან აღემატება 200 000 ლარს. გარდა ამ მუხლის მე-8 პუნქტით გათვალისწინებული შემთხვევებისა. 5. ავანსის უზრუნველყოფის გარანტიის მოთხოვნა სავალდებულოა, თუ ხელშეკრულებით გათვალისწინებულია წინასწარი ანგარიშსწორება (ავანსი) და მისი ოდენობა აღემატება ხელშეკრულების საერთო ღირებულების 50%-ს, გარდა ამ მუხლის მე-6 პუნქტით გათვალისწინებული შემთხვევებისა. 6. შესყიდვის განხორციელებისას დასაშვებია წინასწარი ანგარიშსწორება ავანსის უზრუნველყოფის გარანტიის მოთხოვნის გარეშე, თუ შესყიდვის ობიექტის ღირებულება არ აღემატება 5 000 ლარს. 7. ამ მუხლის მე-4 პუნქტში გათვალისწინებულ შემთხვევაში ხელშეკრულების შესრულების გარანტია შეიძლება მოთხოვნილ იქნას ხელშეკრულების ღირებულების 1%-დან 5%-მდე ოდენობით. 8. ობიექტური პირობების არსებობისას, კომისიის გადაწყვეტილებით ხელშეკრულების შესრულების უზრუნველყოფის გარანტია შეიძლება არ იქნეს მოთხოვნილი. 9. მიმწოდებელთან დადებული ხელშეკრულების პირობების გადასინჯვის წესი განისაზღვრება საქართველოს კანონმდებლობით. |
მუხლი 16.
ანგარიშის წარდგენა |
1. შ.პ.ს. „სამშენებლო კომპანია – მშენებელი 2011“ განხორციელებული საქონლისა და მომსახურების შესყიდვის შესახებ ანგარიშს წარუდგენს სსიპ – კონკურენციისა და სახელმწიფო შესყიდვების სააგენტოს არაუგვიანეს 2014 წლის 20 თებერვლისა.
2. ანგარიში წარდგენილი უნდა იქნეს ამ წესის №2 და №3 დანართების შესაბამისად. |
მუხლი 17.
ცვლილებებისა და დამატებების შეტანის წესი |
ამ წესში ცვლილებებისა და დამატებების შეტანა ხდება საქართველოს მთავრობის დადგენილებით. |
დანართი №1
შ.პ.ს :სამშენებლო კომპანია-მშენებელი 2011“-ის მიერ შესასყიდი საქონლისა და მომსახურების ჩამონათვალი
|
დანართი №2
ანგარიში შპს „სამშენებლო კომპანია – მშენებელი 2011“-ის მიერ _____ წელს ერთ პირთან მოლაპარაკების საშუალებით განხორციელებული შესყიდვების შესახებ
დანართი №3
ანგარიში შპს „სამშენებლო კომპანია – მშენებელი 2011“-ის მიერ _____ წელს პირობათა გამოკითხვის საშუალებით განხორციელებული შესყიდვების შესახებ
|
დოკუმენტის კომენტარები