„საქართველოს მთავრობის რეგლამენტის დამტკიცების შესახებ“ საქართველოს მთავრობის 2013 წლის 7 მარტის №54 დადგენილებაში ცვლილების შეტანის თაობაზე

დოკუმენტის სტრუქტურა

განმარტებების დათვალიერება

დაკავშირებული დოკუმენტები

დოკუმენტის მონიშვნები

„საქართველოს მთავრობის რეგლამენტის დამტკიცების შესახებ“ საქართველოს მთავრობის 2013 წლის 7 მარტის №54 დადგენილებაში ცვლილების შეტანის თაობაზე
დოკუმენტის ნომერი	224
დოკუმენტის მიმღები	საქართველოს მთავრობა
მიღების თარიღი	04/09/2013
დოკუმენტის ტიპი	საქართველოს მთავრობის დადგენილება
გამოქვეყნების წყარო, თარიღი	ვებგვერდი, 05/09/2013
ძალის დაკარგვის თარიღი	14/02/2018
სარეგისტრაციო კოდი	010240010.10.003.017391

PDF გადმოწერა

„საქართველოს მთავრობის რეგლამენტის დამტკიცების შესახებ“ საქართველოს მთავრობის 2013 წლის 7 მარტის №54 დადგენილებაში ცვლილების შეტანის თაობაზე

მუხლი 1

„ნორმატიული აქტების შესახებ“ საქართველოს კანონის მე-20 მუხლის მე-4 პუნქტის შესაბამისად, „საქართველოს მთავრობის რეგლამენტის დამტკიცების შესახებ“ საქართველოს მთავრობის 2013 წლის 7 მარტის №54 დადგენილებაში (www.matsne.gov.ge, 14/03/2013, 010240010.10. 003.017218) შეტანილ იქნეს შემდეგი ცვლილება:

1. დადგენილებით დამტკიცებული რეგლამენტის:

ა) მე‑10 მუხლის მე‑2 პუნქტის „ა“ ქვეპუნქტი ჩამოყალიბდეს შემდეგი რედაქციით:

„ა) თანდართული ფორმის განმარტებითი ბარათი, რომელშიც აისახება წარდგენილი პროექტის არსი, ზოგადი ინფორმაცია პროექტის შესახებ, მისი მიღების მიზეზი და მიზანი, საჭიროების შემთხვევაში, სამართლებრივი აქტის მოკლე ვადებში მიღების (გამოცემის) დასაბუთება, მოსალოდნელი შედეგი, იმ შედეგების საფინანსო-ეკონომიკური გაანგარიშება, რომლებსაც გამოიწვევს წარდგენილი პროექტის მიღება. განმარტებით ბარათში აღინიშნება აგრეთვე პროექტის ავტორი (ავტორები) და წარმდგენი;“;

ბ) 26‑ე მუხლი ჩამოყალიბდეს შემდეგი რედაქციით:

„მუხლი 26. კანონპროექტის სამინისტროებთან, სახელმწიფო მინისტრების აპარატებთან წინასწარი შეთანხმების პროცედურა

1. მთავრობის წევრი ან სამინისტროს, სახელმწიფო მინისტრის აპარატის საპარლამენტო მდივანი ვალდებულია, კანონპროექტის ინიციირებიდან არაუგვიანეს 10 დღისა სპეციალურ ველში დააფიქსიროს კანონპროექტის თაობაზე საკუთარი პოზიცია: „ეთანხმება“ ან „არ ეთანხმება“.

2. მთავრობის წევრი ან სამინისტროს, სახელმწიფო მინისტრის აპარატის საპარლამენტო მდივანი ვალდებულია, „ელექტრონული მთავრობის“ პროგრამაში ატვირთოს კანონპროექტის თაობაზე საკუთარი უწყების დასაბუთებული შენიშვნები, თუ:

ა) ეთანხმება კანონპროექტს, მაგრამ აქვს გარკვეული შენიშვნები;

ბ) არ ეთანხმება კანონპროექტს.

3. იმ შემთხვევაში, თუ მთავრობის წევრი ან სამინისტროს, სახელმწიფო მინისტრის აპარატის საპარლამენტო მდივანი დადგენილ ვადაში არ დააფიქსირებს პოზიციას, საკითხი არ ჩაითვლება მასთან შეთანხმებულად.

4. კანონპროექტი შეთანხმებულად ითვლება, ხოლო შეთანხმების პროცედურა – დასრულებულად, თუ „ელექტრონული მთავრობის“ პროგრამაში დაფიქსირდა არანაკლებ მთავრობის 13 წევრის ან სამინისტროს, სახელმწიფო მინისტრის აპარატის საპარლამენტო მდივნის დადებითი პოზიცია („ეთანხმება“ ან „ეთანხმება შენიშვნებით“), მათ შორის, სავალდებულოა საქართველოს იუსტიციის მინისტრის, ფინანსთა მინისტრის, ეკონომიკისა და მდგრადი განვითარების მინისტრის, შინაგან საქმეთა მინისტრის ან აღნიშნული სამინისტროების საპარლამენტო მდივნების დადებითი პოზიცია.

5. მთავრობის წევრების ან სამინისტროების, სახელმწიფო მინისტრების აპარატების საპარლამენტო მდივნების მხრიდან შენიშვნების არსებობისას ინიციატორი უწყება, ამ შენიშვნების გათვალისწინების შემთხვევაში, მთავრობის კანცელარიაში წარადგენს კანონპროექტის კორექტირებულ ვერსიას.“;

გ) 27‑ე მუხლის პირველი პუნქტი ჩამოყალიბდეს შემდეგი რედაქციით:

„1. მთავრობის სხდომაზე განსახილველი კანონპროექტის მთავრობის კანცელარიაში წარდგენა უნდა მოხდეს მთავრობის სხდომის ჩატარებამდე 6 დღის ვადაში.“;

დ) 28‑ე მუხლის მე‑4 პუნქტი ჩამოყალიბდეს შემდეგი რედაქციით:

„4. საკითხის შესწავლის შემდეგ მთავრობის საპარლამენტო მდივანი იღებს ერთ‑ერთ შემდეგ გადაწყვეტილებას:

ა) საკითხის მნიშვნელობიდან გამომდინარე, კანონპროექტის მთავრობის სხდომის დღის წესრიგში შეტანის თაობაზე;

ბ) კანონპროექტის „ელექტრონული მთავრობის“ პროგრამის მეშვეობით შეთანხმების თაობაზე;

გ) კანონპროექტის განხილვიდან მოხსნისა და ინიციატორი უწყებისათვის დაბრუნების თაობაზე.“.

2. დადგენილებით დამტკიცებულ რეგლამენტს:

ა) VIII თავის შემდეგ დაემატოს შემდეგი შინაარსის VIII¹ თავი:

„თავი VIII¹

კანონპროექტის „ელექტრონული მთავრობის“ პროგრამის

მეშვეობით შეთანხმების წესი

მუხლი 28¹. კანონპროექტის შეთანხმების პროცედურა

1. ამ რეგლამენტის 28‑ე მუხლით გათვალისწინებული პროცედურის დასრულების შემდეგ, მთავრობის კანცელარია კანონპროექტს სვამს „ელექტრონული მთავრობის“ პროგრამის ველში „კანონპროექტის შეთანხმების რეჟიმი“.

2. მთავრობის წევრები ვალდებულნი არიან 48 საათში მისცენ ხმა კანონპროექტის შეთანხმებას („მომხრე“, „წინააღმდეგი“).

3. მთავრობის წევრთა სრული შემადგენლობის უმრავლესობის მიერ მხარდაჭერის შემთხვევაში, კანონპროექტი ითვლება მთავრობის წევრთა მიერ შეთანხმებულად. ხმების თანაბრად გაყოფის შემთხვევაში, გადამწყვეტია პრემიერ‑მინისტრის ხმა.

4. ამ მუხლის შესაბამისად შეთანხმებული კანონპროექტის პარლამენტში წარდგენა ხდება ამ რეგლამენტის 30‑ე მუხლით დადგენილი წესით, ამავე თავის მოთხოვნათა გათვალისწინებით.

მუხლი 28². ელექტრონული მთავრობის სხდომის ოქმი

ამ რეგლამენტის 28¹ მუხლით გათვალისწინებული პროცედურის დასრულების შემდეგ, დგება ელექტრონული მთავრობის სხდომის ოქმი, რომელშიც აისახება ელექტრონული მთავრობის მიერ კანონპროექტის შეთანხმების შედეგი და კანონპროექტის პარლამენტში წარდგენის თაობაზე მიღებული გადაწყვეტილება.“;

ბ) დაემატოს შემდეგი შინაარსის დანართი:

„დანართი

განმარტებითი ბარათი

ინფორმაცია სამართლებრივი აქტის პროექტის შესახებ

–––––––––––––––––––––––––––––––––––––––––––––––––––––––––––––––––––––––––––––––––––

(აისახება ზოგადი ინფორმაცია პროექტის შესახებ, მისი მიღების მიზეზი და მიზანი, სამართლებრივი აქტის მოკლე ვადებში მიღების (გამოცემის) დასაბუთება)

პროექტის მიღებით გამოწვეული საფინანსო‑ეკონომიკური შედეგების გაანგარიშება

––––––––––––––––––––––––––––––––––––––––––––––––––––––––––––––––––––––––––––––––––––

(აისახება ინფორმაცია პროექტის განხორციელებისათვის საჭირო ფინანსური სახსრების ოდენობის, პროექტის დაფინანსების წყაროს, ბიუჯეტის საშემოსავლო და ხარჯვით ნაწილებზე გავლენის, სახელმწიფოს ახალი ფინანსური ვალდებულებების თაობაზე, ასეთის არსებობის შემთხვევაში)

პროექტის მოსალოდნელი შედეგები

–––––––––––––––––––––––––––––––––––––––––––––––––––––––––––––––––––––––––––––––––––––

(აისახება ინფორმაცია იმ სამართლებრივი ურთიერთობებისა და პირთა შესახებ, რომლებზეც გავლენას მოახდენს სამართლებრივი აქტის მიღება)

პროექტის განხორციელების ვადები

(თუ სამართლებრივი აქტის პროექტით გათვალისწინებული დავალების შესრულება საჭიროებს გარკვეულ ვადას, მიეთითება აღნიშნული ვადის თაობაზე)

პროექტის ავტორი და წარმდგენი

(მიეთითება პროექტის ავტორი და წარმდგენი, ხოლო თუ პროექტის ავტორი და წარმდგენი სხვადასხვა პირია, მაშინ აღინიშნება ინფორმაცია ორივეს შესახებ).“.

მუხლი 2

დადგენილება ამოქმედდეს გამოქვეყნებისთანავე.

პრემიერ-მინისტრი ბიძინა ივანიშვილი