საქართველოს საგარეო საქმეთა სამინისტროსა და ინდონეზიის რესპუბლიკის საგარეო საქმეთა სამინისტროს შორის ორმხრივი კონსულტაციების შესახებ ურთიერთგაგების მემორანდუმი

მუხლი I

მიზნები

მხარეები საგარეო საქმეთა მინისტრების ან მაღალი  თანამდებობის პირების დონეზე აწარმოებენ რეგულარულ ორმხრივ კონსულტაციებს, რათა განიხილონ და შეისწავლონ მათ შორის არსებული ორმხრივი ურთიერთობის ყველა ასპექტი და იმსჯელონ მხარეთა შორის თანამშრომლობის გაგრძელებისა და გაღრმავების პირობებზე, ასევე განიხილონ საერთო ინტერესის რეგიონალური და საერთაშორისო საკითხები.

მუხლი II

კონსულტაციის მექანიზმი

1. კონსულტაცია გაიმართება საქართველოსა და ინდონეზიაში მონაცვლეობით, ყოველ 2 (ორ) წელიწადში ერთხელ, ან საჭიროების შემთხვევაში უფრო ხშირად. კონსულტაციის ჩატარების თარიღთან, ადგილთან, დღის წესრიგთან და წარმომადგენლის დონესთან დაკავშირებული დეტალები დიპლომატიური არხების საშუალებით იქნება შეთანხმებული.

2. მხარეები უზრუნველყოფენ ორმხრივი კონსულტაციების, ასევე დოკუმენტებისა და გაცვლილი ინფორმაციის კონფიდენციალურობას, რომელიც არ უნდა გადაეცეს მესამე მხარეს, სხვა მხარის წინასწარი თანხმობის გარეშე.

3. კონსულტაციები დიპლომატიურ მისიებსა და საკონსულო დაწესებულებებს, მათ შორის გაერთიანებული ერების ორგანიზაციასა და სხვა საერთაშორისო ორგანიზაციებში მუდმივ წარმომადგენლობებს, გაეროსა და სხვა საერთაშორისო კონფერენციებში მათ დელეგაციებს, ხელს შეუწყობს შეინარჩუნონ მჭიდრო თანამშრომლობა და გაცვალონ  ინფორმაცია და შეხედულებები საერთო ინტერესის საკითხებზე.

მუხლი III

თანამშრომლობის სფერო

მხარეები განახორციელებენ კონსულტაციებს და ერთმანეთს გაუზიარებენ შეხედულებებს საერთო ინტერესის საკითხებზე. კერძოდ:

1. ორმხრივ საკითხებზე, რომელიც შეიძლება მოიცავდეს პოლიტიკურ, ეკონომიკურ, კულტურულ, სამეცნიერო, სოციალურ და საგანმანათლებლო თანამშრომლობას, ასევე ორ სამინისტროს შორის დიპლომატებისთვის სასწავლო პროგრამების ჩატარებას.

2. საერთო ინტერესის რეგიონალურ საკითხებზე, რომელიც შეიძლება მოიცავდეს შესაბამის რეგიონში ეკონომიკური თანამშრომლობისა და უშიშროების საკითხებს.

3. გლობალურ საკითხებზე, რომლებიც შეიძლება მოიცავდეს  გაეროსა და სხვა საერთაშორისო ორგანიზაციებთან დაკავშირებულ საკითხებს, საერთო ინტერესის გლობალური პოლიტიკისა და უსაფრთხოების საკითხებს, მათ შორის მასობრივი განადგურების იარაღის გავრცელებისა და ასევე  ტერორიზმისა და კორუფციის წინააღმდეგ ბრძოლას.

მუხლი IV

შესწორებების შეტანა

მოცემული ურთიერთგაგების მემორანდუმი, მხარეთა ურთიერთშეთანხმების საფუძველზე, შეიძლება ჩასწორებულ იქენს ან მასში შეიძლება შეტანილ იქნეს შესწორებები. ამგვარი ცვლილებები გაფორმდება ცალკე დოკუმენტის სახით და ძალაში შევა წინამდებარე მემორანდუმის მე-6 მუხლის შესაბამისად. აღნიშნული სახით მიღებული დოკუმენტები წარმოადგენენ ამ მემორანდუმის განუყოფელ ნაწილს.

მუხლი V

დავების მოგვარება

მოცემული ურთიერთგაგების მემორანდუმის განმარტებასთან ან განხორციელებასთან დაკავშირებული ნებისმიერი დავა გადაწყდება მხარეებს შორის კონსულტაციებისა და/ან მოლაპარაკებების გზით.

მუხლი VI

ძალაში შესვლა და მოქმედების ვადა

მოცემული ურთიერთგაგების მემორანდუმი ძალაში შედის მისი ხელმოწერის დღიდან და ძალაში რჩება 5 (ხუთი) წლის ვადით და ავტომატურად გაგრძელდება მომდევნო 5 (ხუთი) წლით, გარდა იმ შემთხვევისა, როდესაც ერთ-ერთი მხარე დიპლომატიური არხების მეშვეობით 3 (სამი) თვით ადრე წერილობით შეატყობინებს მეორე მხარეს თავისი გადაწყვეტილების შესახებ მოქმედება შეუწყვიტოს  აღნიშნული ურთიერთგაგების მემორანდუმს.

ზემოაღნიშნულის დასტურად, ქვემორე ხელმომწერი პირები ხელს აწერენ ურთიერთგაგების მემორანდუმს,

შესრულებულია  ქ. ჯაკარტაში, 2012 წლის 29 ივნისს, ორ დედნად,  ქართულ, ინდონეზიურ და ინგლისურ ენებზე. მემორანდუმის ტექსტის განსხვავებული ინტერპრეტაციის შემთხვევაში, უპირატესობა ენიჭება ტექსტს ინგლისურ ენაზე.