"ტყითსარგებლობის წესის დამტკიცების შესახებ" საქართველოს მთავრობის 2010 წლის 20 აგვისტოს №242 დადგენილებაში ცვლილების შეტანის შესახებ

საქართველოს მთავრობის

დადგენილება №367

2012 წლის 7 სექტემბერი

 ქ. თბილისი

„ტყითსარგებლობის წესის დამტკიცების შესახებ“ საქართველოს მთავრობის 2010 წლის 20 აგვისტოს №242 დადგენილებაში ცვლილების შეტანის თაობაზე

მუხლი 1. „ნორმატიული აქტების შესახებ“ საქართველოს კანონის მე-20 მუხლის მე-4 პუნქტის შესაბამისად, „ტყითსარგებლობის წესის დამტკიცების შესახებ“ საქართველოს მთავრობის 2010 წლის 20 აგვისტოს №242 დადგენილებაში (სსმ, 2010 წელი, მუხლი 1533) შეტანილ იქნეს ცვლილება და ამ დადგენილებით დამტკიცებული წესის მე‑10 მუხლს დაემატოს შემდეგი შინაარსის 1¹ პუნქტი:

„1¹. ტყითმოსარგებლე ვალდებულია სოციალური ჭრის შედეგად მოპოვებული ხე-ტყის, ასევე მისგან მიღებული პირველადი გადამუშავების პროდუქტის ეკონომიკურ ბრუნვაში ჩართვის შემთხვევაში სოციალური ჭრის შედეგად მოპოვებული ხე-ტყის, ასევე მისგან მიღებული პირველადი გადამუშავების პროდუქტის ეკონომიკურ ბრუნვაში ჩართვამდე სააგენტოს ანგარიშზე გადაიხადოს ეკონომიკურ ბრუნვაში ჩართვის საფასური: 1 კუბურ მეტრ მერქნულ რესურსზე (როგორც ხე-ტყის, ასევე გადამუშავების პროდუქტის შემთხვევაშიც) – 100 ლარი. იმ შემთხვევაში, თუ მერქნული რესურსის მოცულობა მეტია ან ნაკლებია 1 კუბურ მეტრზე, ტყითმოსარგებლე ყოველ 0,1 კუბურ მეტრზე იხდის 10 ლარს. ამასთან, მოცულობა მრგვალდება 0,1 კუბური მეტრის სიზუსტით.“.

მუხლი 2. დადგენილება ამოქმედდეს გამოქვეყნებისთანავე.

პრემიერ-მინისტრი      ი . მერაბიშვილი