ხელვაჩაურის მუნიციპალიტეტის სიმბოლოების – გერბისა და დროშის დამტკიცების შესახებ

 ხელვაჩაურის მუნიციპალიტეტის საკრებულოს

 დადგენილება №1 8

 2012 წლის 29 აგვისტო

 ქ. ბათუმი

ხელვაჩაურის მუნიციპალიტეტის სიმბოლოების – გერბისა და დროშის დამტკიცების შესახებ

„ადგილობრივი თვითმმართველობის შესახებ“ საქართველოს ორგანული კანონის მე-8 მუხლისა და 43-ე მუხლის მე-2 პუნქტის, „ნორმატიული აქტების შესახებ“ საქართველოს კანონის მე-20 მუხლის შესაბამისად, ხელვაჩაურის მუნიციპალიტეტის საკრებულომ დაადგინა:

1. დამტკიცდეს საქართველოს პარლამენტთან არსებული ჰერალდიკის სახელმწიფო საბჭოსთან შეთანხმებული ხელვაჩაურის მუნიციპალიტეტის სიმბოლოები – გერბი და დროშა თანდართულ აღწერილობასთან ერთად, დანართის შესაბამისად.

2. ეს დადგენილება ამოქმედდეს კანონმდებლობით დადგენილი წესით მისი გამოქვეყნებისთანავე.

საკრებულოს თავმჯდომარე       მ. ფარტენაძე

დანართი

ხელვაჩაურის მუნიციპალიტეტის სიმბოლოები – გერბი და დროშა

მუხლი 1

 გერბის ფარი გაკვეთილ-გადაკვეთილია და იყოფა 4 ნაწილად (ველად); I ნაწილი და III ნაწილი გადაკვეთილია ტეხილად; I ნაწილი – მეწამულ ველზე მოთავსებულია გადაჯვარედინებული ორი ოქროს თოფი; II ნაწილი – ზურმუხტოვან ველზე ზედა ნაწილში ოქროს საწმისი, ქვედა ნაწილში ოქროს ციხე-სიმაგრე; III ნაწილი – ზურმუხტოვან ველზე ზედა ნაწილში ოქროს თაღოვანი ხიდი, ქვედა ნაწილში ვერცხლის სამი შემცირებული ტალღოვანი სარტყელი; IV ნაწილი – ლაჟვარდის ველს მარჯვნიდან მარცხნივ კვეთს სამი ვერცხლის ყაბიწი.

 გერბის ფარს ზემოთ მოთავსებულია საქალაქო ვერცხლის გვირგვინი – სამკოშკიანი ქონგურებიანი გალავანი (ციხე-სიმაგრის ფორმის) ნახევრადღია კარიბჭით.

 ფარს ქვემოთ მოთავსებულია გერბის დევიზის ვერცხლ-ზურმუხტოვანი ბაფთა, რომლის ვერცხლის ველზე შავად ჩაწერილია დევიზი „ხელვაჩაური“.

ხელვაჩაურის მუნიციპალიტეტის გერბი

მუხლი 2

 დროშა ვერტიკალურად გაყოფილია ორ თანაბარ ნაწილად . პირველი ნაწილი ჰორიზონტალურად ტეხილად არის გაყოფილი თანაბარ ნაწილებად: მეწამულ და ზურმუხტოვან ველებად. მეორე ნაწილის ლაჟვარდოვან ველს ჰორიზონტალურად ყოფს სამი ვერცხლის სარტყელი.

 დროშის პროპორციაა 2:3.

ხელვაჩაურის მუნიციპალიტეტის დროშა