„მასწავლებელთა სერტიფიცირების დებულებისა და მასწავლებლის სერტიფიკატის ნიმუშის დამტკიცების შესახებ“ საქართველოს განათლებისა და მეცნიერების მინისტრის 2009 წლის 4 დეკემბრის №1101 ბრძანებაში ცვლილების შეტანის თაობაზე

საქართველოს განათლებისა და მეცნიერების მინისტრის

ბრძანება №1 64/ნ

2012 წლის 23 აგვისტო

ქ. თბილისი

„მასწავლებელთა სერტიფიცირების დებულებისა და მასწავლებლის სერტიფიკატის ნიმუშის დამტკიცების შესახებ“ საქართველოს განათლებისა და მეცნიერების მინისტრის 2009 წლის 4 დეკემბრის №1101 ბრძანებაში ცვლილების შეტანის თაობაზე

„ნორმატიული აქტების შესახებ“ საქართველოს კანონის მე-20 მუხლის მე-4 პუნქტის საფუძველზე, ვ ბ რ ძ ა ნ ე ბ:

მუხლი 1. „მასწავლებელთა სერტიფიცირების დებულებისა და მასწავლებლის სერტიფიკატის ნიმუშის დამტკიცების შესახებ“ საქართველოს განათლებისა და მეცნიერების მინისტრის 2009 წლის 4 დეკემბრის №1101 ბრძანებაში (სსმ III, 04.12.2009, № 149, მუხ. 1764, სახელმწიფო სარეგისტრაციო კოდი 430.210.000.22.022.013.878 ) შევიდეს შემდეგი ცვლილება:

ა) ბრძანებას დაემატოს შემდგეგი შინაარსის 2¹ და 2¹ პუნქტები:

„2¹. დამტკიცდეს „დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებელთა სერტიფიცირების დებულება“ დანართი №3-ის შესაბამისად.

2². დამტკიცდეს დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატის ნიმუში დანართი №4-ის შესაბამისად.“

ბ) ბრძანების მე-11 მუხლის მე-6 პუნქტის „თ“ ქვეპუნქტი ჩამოყალიბდეს შემდეგი რედაქციით:

„თ) ესთეტიკური აღზრდის საგნები:

თ .ა) სახვითი და გამოყენებითი ხელოვნება;

თ .ბ) მუსიკა.“

გ) ბრძანების მე-11 მუხლის მე-6 პუნქტს დაემატოს შემდეგი შინაარსის „ი“ ქვეპუნქტი:

„ი) სპორტი.“

დ) ბრძანებას დაემატოს დანართი №3 ამ ბრძანების დანართი №1-ის შესაბამისად.

ე) ბრძანებას დაემატოს დანართი №4 ამ ბრძანების დანართი №2-ის შესაბამისად.

მუხლი 2. ბრძანება ძალაშია გამოქვეყნებისთანავე.

ხ . დეკანოიძე

დანართი №1

დანართი №3

დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებელთა სერტიფიცირების დებულება

თავი I. ზოგადი დებულებები

    მუხლი 1. რეგულირების საგანი

ეს დებულება განსაზღვრავს დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სასერტიფიკაციო გამოცდის (შემდგომში – სასერტიფიკაციო გამოცდა) ჩატარების, დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების მოპოვების, დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატის გაცემის, დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების განახლებისა და სერტიფიცირებული დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სტატუსის ვადამდე ჩამორთმევის პირობებს.

    მუხლი 2. სერტიფიცირების მიზანი

სერტიფიცირების მიზანია „მასწავლებლის პროფესიული სტანდარტის დამტკიცების შესახებ“ საქართველოს განათლებისა და მეცნიერების მინისტრის 2008 წლის 28 ნოემბრის №1014 ბრძანების პირველი პუნქტით დამტკიცებული მასწავლებლის პროფესიული სტანდარტის XXVI თავით განსაზღვრულ სტანდარტთან სასერტიფიკაციო გამოცდის ჩაბარების მსურველი პირის ცოდნისა და უნარ-ჩვევების შესაბამისობის დადგენა.

    მუხლი 3. რეგულირების სფერო

ეს დებულება ვრცელდება საქართველოს მოქალაქეებზე, უცხო ქვეყნის მოქალაქეებსა და მოქალაქეობის არმქონე პირებზე, რომლებსაც სურთ არაქართულენოვან სკოლაში დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების მოპოვება. აგრეთვე განსაზღვრავს არაქართულენოვანი სკოლის, საქართველოს განათლებისა და მეცნიერების სამინისტროსა (შემდგომში – სამინისტრო) და აფხაზეთისა და აჭარის ავტონომიური რესპუბლიკების შესაბამისი განათლების სამინისტროების ტერიტორიული ორგანოს – საგანმანათლებლო რესურსცენტრის (შემდგომში – რესურსცენტრი), საჯარო სამართლის იურიდიული პირის მასწავლებელთა პროფესიული განვითარების ცენტრის (შემდგომში – ცენტრი) და საჯარო სამართლის იურიდიული პირის – გამოცდების ეროვნული ცენტრის (შემდგომში – გამოცდების ეროვნული ცენტრი) საქმიანობას დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიცირების პროცესში.

    მუხლი 4. ტერმინთა განმარტება

დებულებაში გამოყენებულ ტერმინებს ამ დებულების მიზნებისათვის აქვს შემდეგი მნიშვნელობა:

ა) დამკვირვებელი – საზოგადოების წარმომადგენელი, რომელსაც ამ დებულების შესაბამისად გამოცდების ეროვნულმა ცენტრმა მიანიჭა დამკვირვებლის სტატუსი;

ბ) დაშიფვრის ინდივიდუალური სისტემა – გამოცდების ეროვნული ცენტრის მიერ დადგენილი კოდირების სისტემა;

გ) ლაპარაკის ტესტი (ზეპირი გამოცდა) – გამოცდების ეროვნული ცენტრის მიერ შედგენილი ტესტური დავალებები, რომლებსაც დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის კანდიდატი პასუხს სცემს ზეპირი ფორმით. ზეპირი გამოცდა ტარდება კომპიუტერის და საამისოდ გამიზნული სხვა ტექნიკური საშუალებების მეშვეობით;

დ) დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის კანდიდატი (შემდგომში - მასწავლებლობის კანდიდატი) – „ზოგადი განათლების შესახებ” საქართველოს კანონის 21³ მუხლის მე-5 და მე-6 პუნქტებით დადგენილი კვალიფიკაციის მქონე პირი, რომელსაც სურვილი აქვს ჩააბაროს დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სასერტიფიკაციო გამოცდა;

ე) საგამოცდო ბარათი – გამოცდების ეროვნული ცენტრის მიერ გაცემული მოწმობა, რომლის საფუძველზეც მასწავლებლობის კანდიდატი დაიშვება სასერტიფიკაციო გამოცდაზე;

ვ) საგამოცდო ცენტრი – სასერტიფიკაციო გამოცდის ჩატარების მიზნით, გამოცდების ეროვნული ცენტრის მიერ სპეციალურად მოწყობილი, შესაბამისი ტექნიკით აღჭურვილი შენობა ან მისი ნაწილი;

ზ) საგამოცდო სექტორი – საგამოცდო ცენტრის დანაყოფი, სადაც მასწავლებლობის კანდიდატები განთავსდებიან სასერტიფიკაციო გამოცდის მიმდინარეობისას;

თ) საპრეტენზიო კომისია – სასერტიფიკაციო გამოცდების ფარგლებში, ტესტირების პროცედურის დადგენილი წესის დარღვევის ფაქტის თაობაზე და ტესტის/ტესტების შეფასებასთან დაკავშირებით წარმოშობილი პრეტენზიების განხილვის მიზნით, საქართველოს განათლებისა და მეცნიერების მინისტრის (შემდგომში – მინისტრი) ინდივიდუალური ადმინისტრაციულ-სამართლებრივი აქტით შექმნილი დროებითი ორგანო;

ი) საგნობრივი ქვეკომისია – სასერტიფიკაციო გამოცდების ტესტის/ტესტების შეფასებასთან დაკავშირებით წარდგენილი საპრეტენზიო განაცხადის განხილვისას საპრეტენზიო კომისიისათვის დახმარების გაწევის მიზნით, გამოცდების ეროვნული ცენტრის წარდგინებით, მინისტრის ინდივიდუალური ადმინისტრაციულ-სამართლებრივი აქტით შექმნილი დროებითი ორგანო;

კ) ტესტი – გამოცდების ეროვნული ცენტრის მიერ შედგენილი ტესტური დავალებები და პასუხების ფურცელი;

ლ) ტექნიკური კონტროლი – სასერტიფიკაციო გამოცდის ჩატარების პროცესზე დაკვირვების მეთოდი ვიდეოაღჭურვილობის მეშვეობით.

თავი II. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიცირების პროცედურა

    მუხლი 5. სასერტიფიკაციო გამოცდაში მონაწილეობის უფლება

1. სასერტიფიკაციო გამოცდაში მონაწილეობის უფლება აქვს ამ დებულებით დადგენილი წესით სასერტიფიკაციო გამოცდაზე დარეგისტრირებულ არაქართულენოვანი სკოლის მასწავლებლობის კანდიდატს, თუ იგი აკმაყოფილებს „ზოგადი განათლების შესახებ” საქართველოს კანონის 21³ მუხლის მე-5 და მე-6 პუნქტებით ან 61-ე მუხლის მე-3 პუნქტით დადგენილ საკვალიფიკაციო მოთხოვნებს.

2. სასერტიფიკაციო გამოცდაში მონაწილეობას ვერ მიიღებს, მათ შორის, ამ დებულების 35-ე მუხლის პირველი პუნქტით დადგენილ სიებში არ იქნება გათვალისწინებული ის მასწავლებლობის კანდიდატი, რომელიც ვერ დააკმაყოფილებს ამ მუხლის პირველი პუნქტით გათვალისწინებულ მოთხოვნებს.

3. ამ მუხლის მე-2 პუნქტით გათვალისწინებული მასწავლებლობის კანდიდატების თაობაზე, გამოცდების ეროვნული ცენტრი ეყრდნობა ცენტრის მიერ ამ დებულებით დადგენილი წესით მიწოდებულ ინფორმაციას.

    მუხლი 6. მასწავლებლობის კანდიდატთა რეგისტრაცია

1. მასწავლებლობის კანდიდატთა რეგისტრაცია მოიცავს ორ ეტაპს:

ა) სასერტიფიკაციო გამოცდაზე გამსვლელი მასწავლებლობის კანდიდატების დადგენის მიზნით გამოცდების ეროვნულ ცენტრში ელექტრონულ რეგისტრაციას;

ბ) სასერტიფიკაციო გამოცდაზე გასვლის უფლების მქონე მასწავლებლობის კანდიდატების დადგენის მიზნით ცენტრში რეგისტრაციას.

2. სასერტიფიკაციო გამოცდებში მონაწილეობის მიღების საფუძველია მასწავლებლობის კანდიდატის მიერ გამოცდების ეროვნულ ცენტრში და ცენტრში ამ დებულებით დადგენილი წესით შევსებული განცხადებები სასერტიფიკაციო გამოცდებში მონაწილეობის მიღების შესახებ.

    მუხლი 7. გამოცდების ეროვნულ ცენტრში რეგისტრაცია

1. სასერტიფიკაციო გამოცდის ჩატარების მიზნით, მასწავლებლობის კანდიდატის ამ დებულების მე-6 მუხლის პირველი პუნქტის „ა“ ქვეპუნქტით გათვალისწინებული რეგისტრაცია ხორციელდება ამ მუხლით დადგენილი პროცედურებისა და გამოცდების ეროვნული ცენტრის მიერ განსაზღვრული ვადების შესაბამისად.

2. ამ მუხლის პირველი პუნქტით გათვალისწინებული განცხადება მასწავლებლობის კანდიდატის მიერ ივსება ელექტრონული ფორმით, ონლაინ რეჟიმში, გამოცდების ეროვნული ცენტრის ოფიციალური ვებგვერდისა www.naec.ge და რეგისტრაციის ოფიციალური ვებგვერდის online.naec.ge (შემდგომში – სამსახურის ვებგვერდის) გამოყენებით.

3. ამ მუხლის პირველი პუნქტით გათვალისწინებული რეგისტრაციის გავლამდე, მასწავლებლობის კანდიდატი სამსახურის ვებგვერდზე უთითებს თავის პირად ნომერს (თერთმეტნიშნა ნომერი), ელექტრონულ მისამართს და შესაბამის ველში აღნიშვნით ადასტურებს, რომ ეთანხმება გამოცდების ეროვნული ცენტრის მიერ დადგენილ პირობებს და გამოთქვამს მზადყოფნას გააგრძელოს ელექტრონული ფორმით რეგისტრაცია.

4. მასწავლებლობის კანდიდატს სპეციალური პროგრამა არ შეუშვებს სისტემაში, თუ მას წინასწარ გადახდილი არ აქვს ამ დებულების 22-ე მუხლის პირველი პუნქტის „ა“ ან/და „გ“ ქვეპუნქტებით გათვალისწინებული სასერტიფიკაციო გამოცდის საფასური.

5. ამ მუხლის მე-3 პუნქტით გათვალისწინებული ქმედების განხორციელების შემდეგ გამოცდების ეროვნული ცენტრი მასწავლებლობის კანდიდატს შეტყობინებას გაუგზავნის ელექტრონულ მისამართზე შესაბამისი კოდის მითითებით, რომ მას უფლება აქვს გაიაროს რეგისტრაცია.

6. რეგისტრაციის დროს მასწავლებლობის კანდიდატი უთითებს/აღნიშნავს:

ა) საკონტაქტო ტელეფონის ნომერს;

ბ) სასერტიფიკაციო გამოცდის იმ ნაწილს/ნაწილებს, რომლის ჩაბარებაც მას სურს;

გ) სასურველი საგამოცდო ცენტრის ადგილმდებარეობას;

დ) გამოცდების ეროვნული ცენტრის მიერ განსაზღვრულ სხვა ინფორმაციას.

7. ელექტრონული ფორმით რეგისტრაციის წარმატებით გავლის თაობაზე, აგრეთვე შევსებულ განცხადებაში ნებისმიერი ცვლილების თაობაზე მასწავლებლობის კანდიდატს ეცნობება ელექტრონული მისამართის მეშვეობით.

8. გამოცდების ეროვნული ცენტრის მოთხოვნის შემთხვევაში, მასწავლებლობის კანდიდატმა უნდა წარმოადგინოს გამოცდების ეროვნული ცენტრის დირექტორის ინდივიდუალური ადმინისტრაციულ-სამართლებრივი აქტით დადგენილი დოკუმენტები.

9. სასერტიფიკაციო გამოცდის ჩატარების მიზნით, გამოცდების ეროვნული ცენტრი ქმნის სასერტიფიკაციო გამოცდაში მონაწილე მასწავლებლობის კანდიდატთა მონაცემთა ელექტრონულ ბაზას, რომლის საფუძველზე ხდება სასერტიფიკაციო გამოცდების დაგეგმვა (ტესტების დაბეჭდვა, სასერტიფიკაციო გამოცდის განრიგი, საგამოცდო ცენტრების მომზადება და სხვა).

10. ამ მუხლის მე-9 პუნქტით გათვალისწინებული ელექტრონული ბაზის საფუძველზე გამოცდების ეროვნული ცენტრი ცენტრს შესაბამისი სასერტიფიკაციო გამოცდის ჩატარებამდე მინისტრის ინდივიდუალურადმინისტრაციულ-სამართლებრივი აქტით დადგენილ ვადაში გადასცემს მასწავლებლობის კანდიდატთა სიას.

    მუხლი 8. ცენტრში რეგისტრაცია

1. სასერტიფიკაციო გამოცდაზე გასვლის უფლების მქონე მასწავლებლობის კანდიდატების დადგენის მიზნით ცენტრი აცხადებს ამ დებულების მე-6 მუხლის პირველი პუნქტის „ბ“ ქვეპუნქტით გათვალისწინებულ რეგისტრაციას.

2. ამ დებულების მე-6 მუხლის პირველი პუნქტის „ბ“ ქვეპუნქტით გათვალისწინებულ რეგისტრაციის გავლის მიზნით მასწავლებლობის კანდიდატი ავსებს და რესურსცენტრში წარადგენს ცენტრის მიერ დადგენილი ფორმის განცხადებას.

3. ამ მუხლის მეორე პუნქტით გათვალისწინებული განცხადება შეიცავს შემდეგ ინფორმაციას:

ა) მასწავლებლობის კანდიდატის სახელი, გვარი, დაბადების თარიღი, ფაქტობრივი საცხოვრებელი ადგილი, საკონტაქტო ტელეფონის ნომერი და პირადი ნომერი (პირადობის დამადასტურებელი დოკუმენტის მიხედვით);

ბ) ჩასაბარებელი ტესტის/ტესტის ნაწილის ჩამონათვალი;

გ) თანდართული საბუთების ნუსხა.

4. მასწავლებლობის კანდიდატი განცხადებასთან ერთად რესურსცენტრში წარადგენს შემდეგ დოკუმენტებს:

ა) პირადობის დამადასტურებელი დოკუმენტის ასლს;

ბ) განათლების დამადასტურებელი დოკუმენტის კანონმდებლობით დადგენილი წესით დამოწმებულ ასლს.

5. რესურსცენტრი ამ მუხლის პირველი პუნქტის შესაბამისად დადგენილი რეგისტრაციის ვადის გასვლიდან 2 დღის ვადაში, ცენტრს უგზავნის ამ მუხლის მე-2 პუნქტით დადგენილი ფორმის განცხადების ასლს და ამ მუხლის მე-4 პუნქტით გათვალისწინებულ დოკუმენტებს.

6. რესურსცენტრს მასწავლებლობის კანდიდატის რეგისტრაციის შესახებ მონაცემები განცხადებების მიღების პარალელურად შეჰყავს მასწავლებელთა რეგისტრაციის ელექტრონულ საინფორმაციო სისტემაში. რესურსცენტრი პასუხისმგებელია მასწავლებელთა რეგისტრაციის ელექტრონულ საინფორმაციო სისტემაში მის მიერ შეყვანილი მონაცემების სისწორეზე.

7. ცენტრი უზრუნველყოფს მასწავლებლობის კანდიდატების რეგისტრაციის ელექტრონულ საინფორმაციო სისტემაში შეყვანილი მონაცემების პერიოდულ გადამოწმებას და განახლებას.

8. ცენტრი ადგენს ამ დებულების მე-7 მუხლის მე-10 პუნქტით გათვალისწინებულ სიებში მყოფი მასწავლებლობის კანდიდატები აკმაყოფილებენ თუ არა ამ დებულების მე-5 მუხლის პირველი პუნქტით გათვალისწინებულ მოთხოვნებს.

9. მასწავლებლობის კანდიდატების რეგისტრაციის ელექტრონული საინფორმაციო სისტემის მონაცემები ხელმისაწვდომია ცენტრის და რესურსცენტრის უფლებამოსილი თანამშრომლებისთვის.

10. მასწავლებლობის კანდიდატი არ დაიშვება სასერტიფიკაციო გამოცდაზე, მათ შორის, გათვალისწინებული არ იქნება ამ დებულების 35-ე მუხლის პირველი პუნქტით დადგენილ სიებში, თუ ის სასერტიფიკაციო გამოცდაზე რეგისტრაციისათვის დადგენილ ვადაში არ შეავსებს გამოცდების ეროვნული ცენტრის და ცენტრის მიერ დადგენილ განცხადებებს.

    მუხლი 9. გადაწყვეტილება მასწავლებლობის კანდიდატის რეგისტრაციისა და სასერტიფიკაციო გამოცდაზე დაშვების შესახებ

1. ცენტრი ამ დებულების მე-7 მუხლის მე-10 პუნქტით გათვალისწინებული სიის ფარგლებში გამოცდების ეროვნულ ცენტრს მინისტრის ინდივიდუალურ-ადმინისტრაციულ სამართლებრივი აქტით დადგენილ ვადაში წარუდგენს მასწავლებლობის კანდიდატების საბოლოო სიას.

2. მასწავლებლობის კანდიდატი არ დაიშვება სასერტიფიკაციო გამოცდაზე, თუ ის მითითებული არ არის ამ მუხლის პირველი პუნქტით გათვალისწინებულ სიებში.

3. გამოცდების ეროვნული ცენტრი რესურსცენტრების დახმარებით უზრუნველყოფს საგამოცდო ბარათების მასწავლებლობის კანდიდატებისთვის გადაცემას.

4. რესურსცენტრი საგამოცდო ბარათის გადაცემას მასწავლებლობის კანდიდატისათვის უზრუნველყოფს სასერტიფიკაციო გამოცდამდე გონივრულ ვადაში.

5. საგამოცდო ბარათი შეიცავს შემდეგ ინფორმაციას:

ა) სასერტიფიკაციო გამოცდის ნაწილების ჩამონათვალს;

ბ) საგამოცდო ცენტრის დასახელებას, სადაც უნდა გამოცხადდეს მასწავლებლობის კანდიდატი;

გ) სასერტიფიკაციო გამოცდის ნაწილების ჩატარების თარიღს და რეგისტრაციის დაწყების დროს.

    მუხლი 10. სასერტიფიკაციო გამოცდის დანიშვნა

სასერტიფიკაციო გამოცდის ჩატარების თარიღს, გამოცდების ეროვნული ცენტრის წინადადების გათვალისწინებით, ინდივიდუალური ადმინისტრაციულ-სამართლებრივი აქტით ადგენს მინისტრი, რომელიც ქვეყნდება სამინისტროს ოფიციალურ ვებგვერდზე.

    მუხლი 11. სასერტიფიკაციო გამოცდის შინაარსი

1. სასერტიფიკაციო გამოცდის საგამოცდო პროგრამა ეფუძნება ეროვნულ სასწავლო გეგმასა და მასწავლებლის პროფესიულ სტანდარტს.

2. სასერტიფიკაციო გამოცდის პროგრამას გამოცდების ეროვნული ცენტრი, მასწავლებელთა პროფესიული განვითარების ცენტრთან შეთანხმებით, დასამტკიცებლად წარუდგენს მინისტრს.

3. სასერტიფიკაციო გამოცდა შედგება ქართული ენისა და საგნობრივი ნაწილებისაგან.

4. მასწავლებლობის კანდიდატს სასერტიფიკაციო გამოცდა ჩაბარებულად ეთვლება ქართული ენისა და საგნობრივი ნაწილის წარმატებით დაძლევის შემთხვევაში.

5. ამ მუხლის მე-4 პუნქტით გათვალისწინებული სასერტიფიკაციო გამოცდის ნაწილის წარმატებით ჩაბარება გულისხმობს მინისტრის მიერ, გამოცდების ეროვნული ცენტრის წარდგინებით, დადგენილი დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების მოპოვებისთვის სასერტიფიკაციო გამოცდის ტესტში ან/და ტესტის ნაწილში საჭირო ქულების დაგროვებას.

6. ამ მუხლის მე-5 პუნქტით გათვალისწინებული მინისტრის ინდივიდუალური ადმინისტრაციულ-სამართლებრივი აქტი გამოიცემა სასერტიფიკაციო გამოცდის ჩატარებამდე.

7. სასერტიფიკაციო გამოცდის საგნობრივი ნაწილი ტარდება ეროვნული სასწავლო გეგმით გათვალისწინებულ შემდეგ საგნებში:

 ა) მათემატიკა;

ბ) საზოგადოებრივი მეცნიერებები:

ბ.ა) ისტორია;

ბ.ბ) გეოგრაფია;

ბ.გ) სამოქალაქო განათლება;

გ) საბუნებისმეტყველო მეცნიერებები:

გ.ა) ფიზიკა;

გ.ბ) ქიმია;

გ.გ) ბიოლოგია;

დ) ბუნებისმეტყველება;

ე) ესთეტიკური აღზრდის საგნები:

ე .ა) სახვითი და გამოყენებითი ხელოვნება;

ე .ბ) მუსიკა;

ვ) სპორტი.

8. I - IV კლასების მასწავლებლის უფლების მოპოვების მსურველი პირი სასერტიფიკაციო გამოცდის საგნობრივ ნაწილში აბარებს ტესტს დაწყებითი საფეხურის I - IV კლასების მასწავლებლებისთვის.

    მუხლი 12. სასერტიფიკაციო გამოცდის ენა

1. სასერტიფიკაციო გამოცდის ქართული ენის ტესტი შედგენილია ქართულ ენაზე.

2. სასერტიფიკაციო გამოცდის საგნობრივი ნაწილის ტესტი შედგენილია ბილინგვურად: ქართულსა და შესაბამისად სომხურ ან აზერბაიჯანულ ენაზე.

    მუხლი 13. სასერტიფიკაციო გამოცდის ჩატარების ფორმა

1. სასერტიფიკაციო გამოცდა ტარდება წერილობითი ფორმით, ტესტირების გზით, გარდა ქართული ენის გამოცდისა.

2. ქართული ენის გამოცდა ტარდება წერილობითი ან/და ზეპირი ფორმით, ტესტირების გზით.

    მუხლი 14. სასერტიფიკაციო გამოცდის ჩატარების დრო და ადგილი

1. სამინისტროს სისტემაში შემავალი დაწესებულებები, სასერტიფიკაციო გამოცდის ჩატარებისათვის უზრუნველყოფენ მათ სარგებლობაში არსებული შენობა-ნაგებობებიდან საჭირო ფართისა და ინვენტარის გამოყოფას საქართველოს კანონმდებლობით გათვალისწინებული წესით.

2. საგამოცდო ცენტრები განლაგებულია გამოცდების ეროვნული ცენტრის მიმართვის შესაბამისად, მინისტრის ინდივიდუალური ადმინისტრაციულ-სამართლებრივი აქტით განსაზღვრულ შენობებში.

3. სასერტიფიკაციო გამოცდა წერილობითი ფორმით შესაბამის ნაწილში ყველა საგამოცდო ცენტრში მიმდინარეობს ერთდროულად, გამოცდების ეროვნული ცენტრის წარდგინებით, მინისტრის ინდივიდუალური ადმინისტრაციულ-სამართლებრივი აქტით დადგენილი თარიღის შესაბამისად.

4. ფორსმაჟორის არსებობის შემთხვევაში, გამოცდების ეროვნული ცენტრის დირექტორის ინდივიდუალური ადმინისტრაციულ-სამართლებრივი აქტით განისაზღვრება კონკრეტულ საგამოცდო ცენტრში სასერტიფიკაციო გამოცდის ჩატარების თარიღი.

    მუხლი 15. სასერტიფიკაციო გამოცდის მიმდინარეობის პროცესზე დასწრება

1. სასერტიფიკაციო გამოცდის მიმდინარეობის დროს საგამოცდო ცენტრში დაშვებელია მხოლოდ იმ პირების ყოფნა, რომელთაც აქვთ გამოცდების ეროვნული ცენტრის მიერ გაცემული სპეციალური დოკუმენტი.

2. ამ მუხლის პირველი პუნქტით გათვალისწინებული პირის საგამოცდო ცენტრში ყოფნამ ხელი არ უნდა შეუშალოს სასერტიფიკაციო გამოცდის მიმდინარეობას. მას ეკრძალება ტესტის შინაარსთან დაკავშირებით მასწავლებლობის კანდიდატის დახმარება ან მისი მუშაობისათვის ხელის შეშლა.

3. სასერტიფიკაციო გამოცდის ობიექტურად და გამჭვირვალედ ჩატარების მიზნით საგამოცდო ცენტრებში ტესტირების მიმდინარეობას თვალყურს ადევნებენ დამკვირვებლები. დამკვირვებელთა რაოდენობის განსაზღვრა, მათი დანიშვნა და საგამოცდო ცენტრებში განაწილება ხდება გამოცდების ეროვნული ცენტრის ინდივიდუალური ადმინისტრაციულ-სამართლებრივი აქტით.

4. დამკვირვებელი შეიძლება იყოს საზოგადოებრივი ორგანიზაციის წარმომადგენელი ან დამოუკიდებელი ფიზიკური პირი, რომელმაც გამოცდების ეროვნული ცენტრის მიერ დადგენილ ვადაში გააკეთა განაცხადი დამკვირვებლად რეგისტრაციის მოთხოვნით და რომელსაც გამოცდების ეროვნული ცენტრის მიერ მიენიჭა ან წილისყრით განესაზღვრა დამკვირვებლის სტატუსი. დამკვირვებლის სტატუსის მოსაპოვებლად წილისყრა ტარდება იმ შემთხვევაში, თუ იმ პირთა რიცხვი, რომელთაც გააკეთეს განაცხადი დამკვირვებლად რეგისტრაციაზე, აჭარბებს საგამოცდო ცენტრში გამოცდების ეროვნული ცენტრის მიერ დადგენილ დამკვირვებელთა ზღვრულ ოდენობას. წილისყრის შედეგები ფორმდება შესაბამისი ოქმით.

    მუხლი 16. საგამოცდო ცენტრში რეგისტრაცია

1. სასერტიფიკაციო გამოცდის ნაწილის ჩაბარების მიზნით, მასწავლებლობის კანდიდატი ვალდებულია:

ა) დროულად გამოცხადდეს საგამოცდო ცენტრში რეგისტრაციაზე;

ბ) თან იქონიოს:

ბ.ა) საგამოცდო ბარათი;

ბ.ბ) პირადობის დამადასტურებელი დოკუმენტი;

ბ.გ) თუ დოკუმენტი/დოკუმენტები უცხო ენაზეა შედგენილი, ასევე ნოტარიულად დამოწმებული ქართული თარგმანი.

2. სასერტიფიკაციო გამოცდაზე რეგისტრაციის დასრულების შემდეგ მასწავლებლობის კანდიდატი არ დაიშვება სასერტიფიკაციო გამოცდაზე.

3. ამ მუხლის პირველი პუნქტის “ბ“ ქვეპუნქტებით გათვალისწინებული დოკუმენტების გარეშე გამოცხადებული მასწავლებლობის კანდიდატი ტესტირებაზე დაიშვება მხოლოდ გამოცდების ეროვნულ ცენტრში ინფორმაციის გადამოწმების შემდგომ. გამოცდების ეროვნული ცენტრი საგამოცდო ცენტრიდან მიღებული ინფორმაციის საფუძველზე, ახორციელებს მასწალებლობის კანდიდატების მონაცემთა ელექტრონულ ბაზაში ინფორმაციის გადამოწმებასა და მასწავლებლობის კანდიდატების მონაცემთა ელექტრობული ბაზიდან ამონაბეჭდის გადაგზავნას საგამოცდო ცენტრის პასუხისმგებელ პირთან. იმ შემთხვევაში, თუ მასწავლებლობის კანდიდატების მონაცემთა ელექტრონულ ბაზაში მასწავლებლობის კანდიდატის თაობაზე არ აღმოჩნდება ინფორმაცია ან აღმოჩნდება, მაგრამ მასწავლებლობის კანდიდატების მონაცემთა ელექტრონულ ბაზაში არსებული ფოტოსურათი არ შეესაბამება პიროვნებას, პირი ტესტირებაზე არ დაიშვება.

4. თუ ამ მუხლის მე-3 პუნქტით გათვალისწინებული ინფორმაციის გადამოწმება გარკვეულ დროს მოითხოვს, მასწავლებლობის კანდიდატი დაშვებული იქნება ტესტირებაზე. თუ ტესტირების მიმდინარეობის დროს ან ტესტირების დასრულების შემდგომ ამ დებულების მე-8 მუხლის მე-6 პუნქტით გათვალისწინებულ მონაცემთა ელექტრონულ ბაზაში მასწავლებლობის კანდიდატის თაობაზე არ აღმოჩნდება ინფორმაცია ან აღმოჩნდება, მაგრამ მასწავლებლობის კანდიდატების მონაცემთა ელექტრონულ ბაზაში არსებული ფოტოსურათი არ შეესაბამება პიროვნებას, პირის ნაშრომი არ გასწორდება.

5. სასერტიფიკაციო გამოცდაზე გამოუცხადებლობა მასწავლებლობის კანდიდატს ართმევს უფლებას მოითხოვოს დამატებითი სასერტიფიკაციო გამოცდის ჩატარება, მიუხედავად იმისა სასერტიფიკაციო გამოცდაზე გამოუცხადებლობა გამოწვეული იყო თუ არა საპატიო მიზეზით.

6. წერით გამოცდაზე საგამოცდო ცენტრში რეგისტრაცია მიმდინარეობს სასერტიფიკაციო გამოცდის დაწყებამდე ერთი საათის განმავლობაში. ზეპირი გამოცდის შემთხვევაში საგამოცდო ცენტრში რეგისტრაცია მიმდინარეობს სასერტიფიკაციო გამოცდის დაწყებამდე 20 წუთის განმავლობაში.

7. გამოცდების ეროვნული ცენტრი უზრუნველყოფს სპეციალურად მოწყობილ საგამოცდო სექტორში მასწავლებლობის იმ კანდიდატების განთავსებას, რომლებიც საჭიროებენ სპეციფიკურ საგამოცდო გარემოს (ფუნქციონალური დარღვევების მქონე პირები, გადამდები ინფექციური დაავადებების მქონე პირები და სხვა პირები).

8. მასწავლებლობის კანდიდატმა ცნობა რაიმე სახის ინფექციური დაავადების შესახებ გამოცდების ეროვნულ ცენტრში ან საგამოცდო ცენტრში უნდა წარადგინოს სასერტიფიკაციო გამოცდის დაწყებამდე.

    მუხლი 17. ტესტირების მიმდინარეობა

1. ტესტირება მიმდინარეობს გამოცდების ეროვნული ცენტრის მიერ დადგენილი პროცედურებით.

2. სასერტიფიკაციო გამოცდის დაწყებამდე ხდება პასუხების ფურცლის დაშიფვრა ინდივიდუალური სისტემით.

3. ტესტირებისთვის გამოყოფილ საგამოცდო დროს, სასერტიფიკაციო გამოცდის ტესტის ნაწილების შესაბამისად, ადგენს გამოცდების ეროვნული ცენტრი.

    მუხლი 18. სასერტიფიკაციო გამოცდა

1. ტესტზე მუშაობის პროცესში მასწავლებლობის კანდიდატს შეუძლია გამოიყენოს ტესტურ დავალებათა რვეული, რომელიც რჩება საგამოცდო ცენტრში. ტესტურ დავალებათა რვეული ტესტის შეფასებისას მხედველობაში არ მიიღება.

2. ტესტზე მუშაობის პროცესში მასწავლებლობის კანდიდატს გამოცდების ეროვნული ცენტრი უზრუნველყოფს გელიანი კალმით.

3. სასერტიფიკაციო გამოცდის მიმდინარეობისას მასწავლებლობის კანდიდატს უფლება აქვს თან იქონიოს:

ა) წყალი;

ბ) პირადი ჰიგიენის საგნები;

გ) ამ დებულების მე-16 მუხლის პირველი პუნქტის „ბ“ ქვეპუნქტით გათვალისწინებული დოკუმენტები.

4. სასერტიფიკაციო გამოცდის მიმდინარეობისას მასწავლებლობის კანდიდატს ეკრძალება:

ა) მობილური ტელეფონის ან სხვა ელექტრონული აპარატურის ქონა;

ბ) გამოცდაზე დამხმარე მასალის – სახელმძღვანელოების, ჩანაწერების, ფურცლების და სხვათა გამოყენება. ფურცლების გამოყენება შესაძლებელია ზეპირი გამოცდის დროს მეთვალყურესთან/კურატორთან შეთანხმებით;

გ) ზეპირი გამოცდის დროს სახელისა და გვარის და სხვა ისეთი სიტყვის გამოყენება, რომელიც შესაძლებელს ხდის პირის იდენტიფიცირებას;

დ) პასუხების ფურცლის შესავსებად ამ მუხლის მე-2 პუნქტით განსაზღვრული გელიანი კალმის გარდა სხვა კალამის გამოყენება, აგრეთვე, პასუხების ფურცელზე მაიდენტიფიცირებელი ნიშნის (სახელი, ნომერი, მისამართი და სხვა) ან რაიმე სახის ისეთი გრაფიკული გამოსახულების (ფიგურა, წარწერა და ა.შ.) დატანა, რომელიც დაკავშირებული არ არის ტესტურ დავალებასთან;

ე) გადალაპარაკება, დახმარების გაწევა ან მიღება, სხვა პირისათვის რაიმე ფორმით ხელის შეშლა;

ვ) სამუშაო ადგილის უნებართვოდ დატოვება; სამუშაო ადგილის დატოვება შესაძლებელია მხოლოდ თანმხლებ პირთან ერთად;

ზ) წერითი გამოცდის დროს მერხზე ტესტის რვეულის, პასუხების ფურცლის, საწერი კალმის და პირადობის დამადასტურებელი დოკუმენტის გარდა სხვა ნივთების მოთავსება; ზეპირი გამოცდის დროს პირადობის დამადასტურებელი დოკუმენტის გარდა სხვა ნივთების მოთავსება, გარდა გამოცდების ეროვნული ცენტრის მიერ შეთავაზებული ნივთებისა;

თ) მუშაობის დაწყება შესაბამისი მითითების გარეშე;

ი) საგამოცდო დროის ამოწურვის შემდეგ მუშაობის გაგრძელება.

5. გამოცდების ეროვნული ცენტრი სასერტიფიკაციო გამოცდების მიმდინარეობაზე დაკვირვებას უზრუნველყოფს ვიდეოაღჭურვილობის მეშვეობით.

    მუხლი 19. სასერტიფიკაციო გამოცდის მიმდინარეობის წესის დარღევევა

1. სასერტიფიკაციო გამოცდის მიმდინარეობისას მასწავლებლობის კანდიდატი მიიღებს გაფრთხილებას:

ა) ამ დებულების მე-18 მუხლის მე-3 პუნქტით გათვალისწინებული ნივთების გარდა სხვა ნივთის აღმოჩენის შემთხვევაში;

ბ) ამ დებულების მე-18 მუხლის მე-4 პუნქტის „ბ“, „დ“ და „ე“-„ი“ ქვეპუნქტით გათვალისწინებული მოთხოვნების დარღვევის შემთხვევაში.

2. ამ მუხლის პირველი პუნქტით გათვალისწინებული გაფრთხილება ფორმდება გამოცდების ეროვნული ცენტრის ინდივიდუალური ადმინისტრაციულ-სამართლებრივი აქტით დამტკიცებული ფორმის შესაბამისად.

3. ამ დებულების მე-18 მუხლის მე-4 პუნქტის „დ“ ქვეპუნქტით გათვალისწინებული მოქმედების ჩადენის შემთხვევაში, გაფრთხილების მიცემასთან ერთად მასწავლებლობის კანდიდატს ჩამოერთმევა პასუხების ფურცელი, რომლის ნაცვლად გადაეცემა სარეზერვო პასუხების ფურცელი.

4. ამ დებულების მე-18 მუხლის მე-3 პუნქტით და მე-4 პუნქტის „ბ“, „დ“ და „ე“-„თ“ ქვეპუნქტებით გათვალისწინებული მოთხოვნების დარღვევის განმეორების შემთხვევაში, მასწავლებლობის კანდიდატი იხსნება სასერტიფიკაციო გამოცდიდან, რაც ფორმდება ოქმით გამოცდების ეროვნული ცენტრის ინდივიდუალური ადმინისტრაციულ-სამართლებრივი აქტით დამტკიცებული ფორმის შესაბამისად.

5. გაფრთხილების გარეშე მასწავლებლობის კანდიდატის სასერტიფიკაციო გამოცდიდან მოხსნა შესაძლებელია:

ა) ამ დებულების მე-18 მუხლის მე-4 პუნქტის „ა“ ქვეპუნქტის დარღვევის შემთხვევაში;

ბ) წესრიგის უხეში დარღვევის, საგამოცდო პროცესის მონაწილე პირის შეურაცხყოფის ან სხვა მსგავს შემთხვევაში.

6. გაფრთხილების გარეშე მასწავლებლობის კანდიდატის სასერტიფიკაციო გამოცდიდან მოხსნა ფორმდება ოქმით გამოცდების ეროვნული ცენტრის ინდივიდუალური ადმინისტრაციულ-სამართლებრივი აქტით დამტკიცებული ფორმის შესაბამისად.

7. სასერტიფიკაციო გამოცდის მიმდინარეობის პროცესში დარღვევის აღმოჩენის შემთხვევაში დამკვირვებელი უფლებამოსილია, პროცესში ჩარევის გარეშე, შეადგინოს ოქმი.

    მუხლი 20. ნაშრომების გასწორება

1. გამოცდების ეროვნულ ცენტრში საგამოცდო ცენტრიდან გაგზავნილი დალუქული პასუხების ფურცლები იხსნება, რეგისტრირდება, ხდება მათი სკანირება და განაწილება.

2. მასწავლებლობის კანდიდატის ნაშრომები გამოცდების ეროვნული ცენტრის გამსწორებლის მიერ სწორდება სასერტიფიკაციო გამოცდის დასრულებიდან 40 დღის ვადაში.

3. ტესტის შინაარსის გათვალისწინებით პასუხების ფურცლები სწორდება:

ა) კომპიუტერის და საამისოდ გამიზნული სხვა ტექნიკური საშუალებების მეშვეობით, ან

ბ) დამოუკიდებლად მინიმუმ ორჯერ. შეფასებაში სხვაობის შემთხვევაში პასუხების ფურცელი სწორდება მესამედ. მესამედ გასწორების შემდეგ მიღებული ქულა საბოლოოა.

4. პასუხების ფურცელი, რომლის შევსებისას გამოყენებული იქნება სხვა კალამი ან რომელიც შეიცავს მაიდენტიფიცირებელ ნიშანს ან რაიმე სახის გამოსახულებას, რომელიც დაკავშირებული არ არის ტესტურ დავალებასთან, არ გასწორდება. ზეპირი გამოცდის დროს ჩანაწერი, რომელიც შეიცავს მაიდენტიფიცირებელ ნიშანს, არ გასწორდება.

5. ამ დებულების მე-18 მუხლის მე-4 პუნქტის „ი“ ქვეპუნქტით გათვალისწინებული მოთხოვნის შეუსრულებლობის შემთხვევაში მასწავლებლობის კანდიდატის ნაშრომი არ გასწორდება.

6. სასერტიფიკაციო გამოცდის შედეგად მიღებული ქულები ქვეყნდება გამოცდების ეროვნული ცენტრის ოფიციალურ ვებგვერდზე. სასერტიფიკაციო გამოცდის შედეგად მიღებული ქულები ხელმისაწვდომია მხოლოდ დაინტერესებული პირისათვის.

    მუხლი 21. ტესტების და ტესტის პასუხების გამოქვეყნება

გამოცდების ეროვნული ცენტრი, სასერტიფიკაციო გამოცდის ჩატარებიდან არა უგვიანეს 15 დღისა, უზრუნველყოფს ტესტებისა და ტესტის პასუხების განთავსებას საკუთარ ოფიციალურ ვებგვერდზე.

    მუხლი 22. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების მოპოვების საფასური

1. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების მოპოვების საფასური მოიცავს:

ა) სასერტიფიკაციო გამოცდის საფასურს თითოეული ნაწილისთვის ცალ-ცალკე 25 ლარს;

ბ) მასწავლებლობის კანდიდატის ინიციატივით, საგამოცდო ტესტის შეფასების თაობაზე საპრეტენზიო განაცხადის განხილვის საფასურს, რომლის ოდენობაც სასერტიფიკაციო გამოცდის თითოეული ნაწილისათვის ცალ-ცალკე შეადგენს 50 ლარს.

გ) სასერტიფიკაციო გამოცდის საფასურს თითოეულ ნაწილში ცალ-ცალკე 50 ლარს იმ პირებისთვის, რომლებმაც წარმატებით გადალახეს სასერტიფიკაციო გამოცდა/გამოცდის ნაწილი და სურს განმეორებით ჩააბარონ გამოცდა/გამოცდის ნაწილი.

2. მასწავლებლობის კანდიდატის მიერ, ზედმეტად ან შეცდომით ამ მუხლის პირველი პუნქტით გათვალისწინებული საფასურის გადახდის შემთხვევაში, გადახდილი თანხების დაბრუნების შესახებ გამოცდების ეროვნული ცენტრის მიერ დადგენილი ფორმით განცხადების წარდგენა ხდება სასერტიფიკაციო გამოცდების საბოლოო შედეგების გამოქვეყნებიდან ერთი თვის განმავლობაში. განცხადებაში უნდა მიეთითოს დასაბრუნებელი თანხა და თანხის მიღების ადგილი. გამოცდების ეროვნული ცენტრის მიერ თანხები გაიცემა განცხადების მიღების დასრულებიდან ერთი თვის შემდეგ.

3. მასწავლებლობის კანდიდატის მიერ შეცდომით გადახდილად არ ითვლება თანხა, თუ მან ამ დებულების მე-7 მუხლით დადგენილი წესით გაიარა ელექტრონული რეგისტრაცია.

4. იმ შემთხვევაში, თუ საგამოცდო ტესტის შეფასებასთან დაკავშირებული საპრეტენზიო განაცხადის საფუძველზე შეიცვლება საგამოცდო ტესტის შეფასება, მასწავლებლობის კანდიდატს უკან უბრუნდება ამ მუხლის პირველი პუნქტის „ბ“ ქვეპუნქტით გათვალისწინებული თანხა. თანხის დაბრუნების შესახებ განცხადება უნდა გაკეთდეს ამ მუხლის მე-2 პუნქტით განსაზღვრული წესით და დადგენილ ვადაში.

თავი III. სასერტიფიკაციო გამოცდების ფარგლებში წარმოშობილი პრეტენზიების წარდგენისა და განხილვის წესი

    მუხლი 23. საპრეტენზიო განაცხადის წარდგენის უფლება

მასწავლებლობის კანდიდატს უფლება აქვს წარადგინოს საპრეტენზიო განაცხადი მასწავლებელთა სასერტიფიკაციო გამოცდების ტესტირების პროცედურის დადგენილი წესის დარღვევის ფაქტის თაობაზე და ტესტის/ტესტების შეფასებასთან დაკავშირებით, ამ თავით დადგენილი წესით.

    მუხლი 24. საპრეტენზიო განაცხადის მიღებაზე უფლებამოსილი ორგანო

1. სასერტიფიკაციო გამოცდის პროცედურის დადგენილი წესის დარღვევის ფაქტის თაობაზე საპრეტენზიო განაცხადი წარედგინება საგამოცდო ცენტრის შენობაში.

2. ტესტის/ტესტების შეფასებასთან დაკავშირებით საპრეტენზიო განაცხადი წარედგინება ელექტრონული ფორმით ონლაინ რეჟიმში, ცენტრის ოფიციალური ვებგვერდის www.naec.ge და სამსახურის ვებგვერდის online.naec.ge გამოყენებით.

    მუხლი 25. საპრეტენზიო განაცხადის ფორმა და წარდგენა

1. მასწავლებლობის კანდიდატი სასერტიფიკაციო გამოცდების ტესტირების პროცედურის დადგენილი წესის დარღვევის ფაქტის თაობაზე საპრეტენზიო განაცხადს წარადგენს გამოცდების ეროვნული ცენტრის დირექტორის ინდივიდუალური ადმინისტრაციულ-სამართლებრივი აქტით დამტკიცებული საპრეტენზიო განაცხადის ფორმის შესაბამისად.

2. საპრეტენზიო განაცხადის ფორმაში აღნიშნული უნდა იყოს:

ა) იმ ორგანოს დასახელება, რომელშიც შეიტანება საპრეტენზიო განაცხადი;

ბ) იმ ორგანოს დასახელება, რომლის სახელზეც წარედგინება პრეტენზია;

გ) საპრეტენზიო განაცხადის წარმდგენი პირის ვინაობა;

დ) დარღვეული პროცედურის აღწერა, ტესტირების პროცედურის დადგენილი წესის დარღვევის ფაქტის თაობაზე პრეტენზიის წარდგენის შემთხვევაში;

ე) იმ ტესტური დავალების/დავალებების ნომერი/ნომრები, რომლის თაობაზეც წარდგენილია პრეტენზია, ტესტის/ტესტების შეფასებასთან დაკავშირებული პრეტენზიის წარდგენის შემთხვევაში. საპრეტენზიო განაცხადში ტესტური დავალების მითითების არარსებობის შემთხვევაში, განიხილება ნაშრომში შემავალი ყველა ტესტური დავალების შეფასების სისწორე;

ვ) საპრეტენზიო განაცხადის წარდგენის თარიღი.

3. სასერტიფიკაციო გამოცდის ტესტირების პროცედურის დადგენილი წესის დარღვევის ფაქტის თაობაზე საპრეტენზიო განაცხადს უნდა დაერთოს განმცხადებლის პირადობის დამადასტურებელი დოკუმენტის ასლი.

4. სასერტიფიკაციო გამოცდების ტესტირების პროცედურის დადგენილი წესის დარღვევის ფაქტის თაობაზე საპრეტენზიო განაცხადის წარდგენისას განმცხადებელმა თან უნდა იქონიოს საგამოცდო ბარათი და პირადობის დამადასტურებელი დოკუმენტი. თუ დოკუმენტი/დოკუმენტები უცხო ენაზეა შედგენილი, ასევე ნოტარიულად დამოწმებული ქართული თარგმანი.

    მუხლი 26. საპრეტენზიო განაცხადის წარდგენის საფასური

1. ამ დებულების 22-ე მუხლის პირველი პუნქტის „ბ’’ ქვეპუნქტით განსაზღვრული თანხების შეტანა ხდება გამოცდების ეროვნული ცენტრის საბანკო ანგარიშზე.

2. მასწავლებლობის კანდიდატს სპეციალური პროგრამა არ მისცემს საპრეტენზიო განაცხადის ფორმის შევსების საშუალებას, თუ მას წინასწარ გადახდილი არ აქვს ამ დებულების 22-ე მუხლის პირველი პუნქტით გათვალისწინებული საპრეტენზიო განაცხადის განხილვის საფასური.

3. მასწავლებლობის კანდიდატის მიერ ამ დებულების 22-ე მუხლის პირველი პუნქტით გათვალისწინებული საფასურის ზედმეტად ან შეცდომით გადახდის შემთხვევაში, გადახდილი თანხების დაბრუნების შესახებ გამოცდების ეროვნული ცენტრის მიერ დადგენილი ფორმით განცხადების წარდგენა ხდება მასწავლებელთა სასერტიფიკაციო გამოცდების საბოლოო შედეგების გამოქვეყნებიდან ერთი თვის განმავლობაში. განცხადებაში უნდა მიეთითოს დასაბრუნებელი თანხა და თანხის მიღების ადგილი. გამოცდების ეროვნული ცენტრის მიერ თანხები გაიცემა განცხადების მიღების ვადის დასრულებიდან ერთი თვის შემდეგ.

4. იმ შემთხვევაში, თუ ტესტის შეფასებასთან დაკავშირებული საპრეტენზიო განაცხადის საფუძველზე შეიცვლება ტესტის შეფასება, მასწავლებლობის კანდიდატს უკან უბრუნდება ამ დებულების 22-ე მუხლის პირველი პუნქტით გათვალისწინებული თანხა. საფასურის დაბრუნების შესახებ განცხადება უნდა გაკეთდეს 22-ე მუხლის მე-2 პუნქტით განსაზღვრული წესით და დადგენილ ვადაში.

    მუხლი 27. საპრეტენზიო განაცხადის წარდგენის ვადა

1. ტესტირების პროცედურის დადგენილი წესის დარღვევის ფაქტის თაობაზე მასწავლებლობის კანდიდატს გამოცდის დღეს 21 საათამდე ამ წესის 24-ე მუხლის პირველი პუნქტით გათვალისწინებულ ორგანოში შეაქვს საპრეტენზიო განაცხადი საპრეტენზიო კომისიის სახელზე, რომელიც არა უგვიანეს მომდევნო დღისა ეგზავნება გამოცდების ეროვნულ ცენტრს, ხოლო გამოცდების ეროვნული ცენტრი დაუყოვნებლივ უზრუნველყოფს საპრეტენზიო განაცხადის მიწოდებას საპრეტენზიო კომისიისათვის.

2. მასწავლებლობის კანდიდატი ტესტის/ტესტების შეფასებასთან დაკავშირებით, ამ წესის 24-ე მუხლის მე-2 პუნქტით გათვალისწინებული წესით, საპრეტენზიო განაცხადს ავსებს საპრეტენზიო კომისიის სახელზე გამოცდების ეროვნული ცენტრის დირექტორის ინდივიდუალური ადმინისტრაციულ-სამართლებრივი აქტით განსაზღვრულ ვადებში. საპრეტენზიო განაცხადის წარდგენის ვადა არ უნდა იყოს 5 დღეზე ნაკლები. 

    მუხლი 28. საპრეტენზიო განაცხადის განხილვაზე უფლებამოსილი ორგანოები

1. სასერტიფიკაციო გამოცდების ფარგლებში, ტესტირების პროცედურის დადგენილი წესის დარღვევის ფაქტის თაობაზე და ტესტის/ტესტების შეფასებასთან დაკავშირებით წარმოშობილი პრეტენზიები განიხილება საპრეტენზიო კომისიის მიერ.

2. სასერტიფიკაციო გამოცდების პროცედურის დადგენილი წესის დარღვევის ფაქტის თაობაზე და ტესტის/ტესტების შეფასებასთან დაკავშირებით წარდგენილი საპრეტენზიო განაცხადების განხილვისას დაცული უნდა იყოს ნაშრომის კონფიდენციალურობა.

    მუხლი 29. საპრეტენზიო კომისია

1. საპრეტენზიო კომისიის შემადგენლობას ამტკიცებს მინისტრი ინდივიდუალური ადმინისტრაციულ-სამართლებრივი აქტით.

2. საპრეტენზიო კომისიას, სასერტიფიკაციო გამოცდების ტესტის/ტესტების შეფასებასთან დაკავშირებით წარდგენილი საპრეტენზიო განაცხადის განხილვისას, დახმარებას უწევს საგნობრივი ქვეკომისია, რომლის შემადგენლობას გამოცდების ეროვნული ცენტრის წარდგინებით, ინდივიდუალური ადმინისტრაციულ-სამართლებრივი აქტით ამტკიცებს მინისტრი.

3. მასწავლებლობის კანდიდატის მიერ საპრეტენზიო განაცხადში მითითებული დავალების შეფასების სისწორეს განიხილავს საგნობრივი ქვეკომისია, რომლის წევრების ანონიმუ რობა დაცულია დაშიფვრის ინდივიდუალური სისტემის მეშვეობით.

4. საპრეტენზიო კომისიას/საგნობრივ ქვეკომისიას ჰყავს სხდომის მდივანი, რომელსაც საპრეტენზიო კომისიის/საგნობრივი ქვეკომისიის შემადგენლობიდან ნიშნავს სხდომის თავმჯდომარე.

5. საპრეტენზიო კომისიის/საგნობრივი ქვეკომისიის შემადგენლობაში არ შეიძლება იყოს პირი, რომელიც მონაწილეობდა მასწავლებელთა სასერტიფიკაციო გამოცდების ტესტის/ტესტების შედგენაში ან არის მიმდინარე წლის სასერტიფიკაციო გამოცდების ნაშრომების გამსწორებელი.

    მუხლი 30. საპრეტენზიო კომისიის საქმიანობა

1. საპრეტენზიო კომისიის სხდომას იწვევს საპრეტენზიო კომისიის თავმჯდომარე.

2. საპრეტენზიო კომისიის სხდომებს უძღვება საპრეტენზიო კომისიის თავმჯდომარე. საპრეტენზიო კომისიის თავმჯდომარის მიერ მოვალეობის შესრულების შეუძლებლობის შემთხვევაში, მის ფუნქციებს ასრულებს მისი მოადგილე.

3. საპრეტენზიო კომისია უფლებამოსილია მიიღოს გადაწყვეტილება, თუ სხდომას ესწრება წევრთა არანაკლებ ½.

4. საპრეტენზიო კომისიის გადაწყვეტილება მიღებულად ითვლება, თუ მას მხარს დაუჭერს სხდომაზე დამსწრე წევრთა ნახევარზე მეტი, ხმების გაყოფის შემთხვევაში გადამწყვეტია სხდომის თავმჯდომარის ხმა.

5. საპრეტენზიო კომისიის გადაწყვეტილება ფორმდება საპრეტენზიო კომისიის სხდომის ოქმის სახით, რომელსაც ხელს აწერს სხდომაზე დამსწრე ყველა წევრი.

    მუხლი 31. ტესტირების პროცედურის დადგენილი წესის დარღვევების განხილვა საპრეტენზიო კომისიის მიერ

1. ტესტირების პროცედურის დადგენილი წესის დარღვევის ფაქტის თაობაზე წარდგენილი პრეტენზია შეიძლება ეხებოდეს:

ა) პრეტენზიის წარმდგენი მასწავლებლობის კანდიდატის უფლებების დარღვევას ტესტირების პროცესის მონაწილე სხვა პირების მიერ;

ბ) მასწავლებლობის სხვა კანდიდატის მიმართ ტესტირების პროცედურის დადგენილი წესის დარღვევას ტესტირების პროცესის მონაწილე სხვა პირების მიერ (მასწავლებლობის კანდიდატისათვის დახმარების აღმოჩენა და ა.შ).

2. გამოცდების ეროვნული ცენტრი ვალდებულია, მოთხოვნის შემთხვევაში, საპრეტენზიო კომისიას დაუყოვნებლივ წარუდგინოს ტესტირების პროცედურულ დარღვევებთან დაკავშირებული ინფორმაცია/დოკუმენტაცია.

    მუხლი 32. ტესტირების პროცედურის დადგენილი წესის დარღვევებთან დაკავშირებული გადაწყვეტილება

1. საპრეტენზიო კომისია ტესტირების პროცედურის დადგენილი წესის დარღვევებთან დაკავშირებულ საპრეტენზიო განაცხადთან დაკავშირებით გადაწყვეტილებას იღებს საპრეტენზიო განაცხადის მიღებიდან 5 დღის ვადაში.

2. ტესტირების პროცედურის დარღვევის დადასტურების შემთხვევაში საპრეტენზიო კომისიამ შეიძლება მიიღოს შემდეგი გადაწყვეტილება/გადაწყვეტილებები:

ა) მასწავლებლობის კანდიდატის უფლებების დარღვევის დადასტურებისას – მისი ნაშრომის გასწორების თაობაზე;

ბ) მასწავლებლობის კანდიდატის მიერ ტესტირების პროცედურის დარღვევისას – მისი ნაშრომის ნული ქულით შეფასების თაობაზე.

3. ამ მუხლის მე-2 პუნქტის „ა’’ ქვეპუნქტით განსაზღვრულ შემთხვევაში საპრეტენზიო კომისია ნაშრომს გასასწორებლად გადასცემს გამოცდების ეროვნული ცენტრს, რომელიც ნაშრომის გასწორებისას ხელმძღვანელობს ამ დებულებით დადგენილი წესით.

4. საპრეტენზიო კომისია გადაწყვეტილების მიღებიდან ორი დღის ვადაში უგზავნის გამოცდების ეროვნული ცენტრს გადაწყვეტილებას.

5. გამოცდების ეროვნული ცენტრი საპრეტენზიო კომისიის გადაწყვეტილებას ორი დღის ვადაში აცნობებს მასწავლებლობის კანდიდატს.

    მუხლი 33. ტესტის/ტესტების შეფასებასთან დაკავშირებით წარდგენილი საპრეტენზიო განაცხადის განხილვა

1. სასერტიფიკაციო გამოცდების ტესტის/ტესტების შეფასებასთან დაკავშირებით წარდგენილი საპრეტენზიო განაცხადი ნაშრომთან ერთად გადაეცემა შესაბამის საგნობრივ ქვეკომისიას, რომლის მიერ გადაწყვეტილების მიღების წესი განისაზღვრება გამოცდების ეროვნული ცენტრის დირექტორის ინდივიდუალური ადმინისტრაციულ-სამართლებრივი აქტით.

2. საპრეტენზიო განაცხადის განხილვისას, საგნობრივი ქვეკომისია უფლებამოსილია იმსჯელოს საპრეტენზიო განაცხადში მითითებული ტესტური დავალების/დავალებების ფარგლებში ტესტური დავალების/დავალებების შეფასების სისწორეზე და 10 დღის ვადაში მიიღოს შემდეგი გადაწყვეტილება/გადაწყვეტილებები:

ა) მასწავლებლობის კანდიდატისათვის ქულის მომატების შესახებ;

ბ) მასწავლებლობის კანდიდატისათვის ქულის დაკლების შესახებ;

გ) მასწავლებლობის კანდიდატის ქულის უცვლელად დატოვების შესახებ.

3. საგნობრივი ქვეკომისია ამ მუხლის მე-2 პუნქტით გათვალისწინებულ გადაწყვეტილებას გადასცემს საპრეტენზიო კომისიას.

    მუხლი 34. ტესტის/ტესტების შეფასებასთან დაკავშირებით წარდგენილი საპრეტენზიო განაცხადის თაობაზე საპრეტენზიო კომისიის გადაწყვეტილება

1. საპრეტენზიო კომისია ტესტის/ტესტების შეფასებასთან დაკავშირებით წარდგენილი საპრეტენზიო განაცხადის თაობაზე, გადაწყვეტილებას იღებს საპრეტენზიო განცხადების მიღებიდან 20 დღის ვადაში.

2. საპრეტენზიო კომისია ტესტის/ტესტების შეფასებასთან დაკავშირებით წარდგენილი საპრეტენზიო განაცხადის თაობაზე საგნობრივი ქვეკომისიის მიერ წარმოდგენილ გადაწყვეტილებას ამტკიცებს 10 დღის ვადაში.

3. საპრეტენზიო კომისიის მიერ მიღებული გადაწყვეტილება იგზავნება გამოცდების ეროვნულ ცენტრში.

4. საპრეტენზიო კომისიის გადაწყვეტილებები გამოცდების ეროვნული ცენტრის მიერ განთავსდება გამოცდების ეროვნული ცენტრის ოფიციალურ ვებგვერდზე საპრეტენზიო განცხადებების წარმოდგენის პროცესის დასრულებიდან არა უგვიანეს 20 დღისა. საპრეტენზიო კომისიის გადაწყვეტილებები სპეციალური კოდის გამოყენებით ხელმისაწვდომია მხოლოდ დაინტერესებული პირისათვის.’

თავი III. პედაგოგიური საქმიანობის განხორციელების უფლების მინიჭება

    მუხლი 35. სასერტიფიკაციო გამოცდის საბოლოო შედეგები

1. საპრეტენზიო კომისიის მიერ გადაწყვეტილების მიღებიდან არა უგვიანეს 10 დღისა, გამოცდების ეროვნული ცენტრის ინდივიდუალური ადმინისტრაციულ-სამართლებრივი აქტით მტკიცდება იმ დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებელთა სია, რომლებმაც წარმატებით დაძლიეს სასერტიფიკაციო გამოცდის ნაწილი და იმ დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებელთა სია, რომლებმაც წარმატებით დაძლიეს სასერტიფიკაციო გამოცდა.

2. გამოცდების ეროვნული ცენტრის მიერ მიწოდებულ დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებელთა შესაბამისი სიის საფუძველზე, ცენტრის ინდივიდუალური ადმინისტრაციულ-სამართლებრივი აქტით, დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებელთა შესაბამისი სიის მიღებიდან 10 დღის ვადაში მტკიცდება და მასწავლებელთა რეგისტრაციის ელექტრონულ საინფორმაციო სისტემაში შეიყვანება იმ პირთა მონაცემები, რომლებმაც მოიპოვეს დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლება.

3. ამ მუხლის მე-2 პუნქტით გათვალისწინებული ინდივიდუალური ადმინისტრაციულ-სამართლებრივი აქტი ქვეყნდება ცენტრის ოფიციალურ ვებგვერდზე და 3 დღის ვადაში იგზავნება საქართველოს განათლებისა და მეცნიერების სამინისტროში.

4. ცენტრის ოფიციალურ ვებგვერდზე განთავსებული სასერტიფიკაციო გამოცდის შედეგები სპეციალური კოდის გამოყენებით ხელმისაწვდომია მხოლოდ დაინტერესებული პირისათვის. შესაბამისი დაინტერესებული პირებისათვის სასერტიფიკაციო გამოცდის შედეგების ხელმისაწვდომობას უზრუნველყოფს ცენტრი.

5. სასერტიფიკაციო გამოცდის წარმატებით დაძლეული ნაწილის ქულა პირს უნარჩუნდება 4 წლის განმავლობაში.

    მუხლი 36. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატის გაცემა და მისი მოქმედების ვადა

1. პირის მასწავლებლობის უფლება დასტურდება დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატით.

2. ცენტრი, ამ დებულების 35-ე მუხლის მე-2 პუნქტით გათვალისწინებული ინდივიდუალური ადმინისტრაციულ-სამართლებრივი აქტის გამოცემიდან 2 თვის ვადაში, უზრუნველყოფს დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატების იმ რესურსცენტრისთვის გადაცემას, რომელმაც განახორციელა მასწავლებლობის კანდიდატის ამ დებულების მე-8 მუხლით გათვალისწინებული რეგისტრაცია.

3. რესურსცენტრი დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატების მიღებიდან 20 დღის ვადაში უზრუნველყოფს შესაბამის პირებზე დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატების გადაცემას. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატის მისაღებად პირმა რესურსცენტრს უნდა წარუდგინოს ცნობა ნასამართლობის შესახებ და სამედიცინო-ნარკოლოგიური შემოწმების ცნობა.

4. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატი მოქმედებს მისი გაცემიდან 8 წლის განმავლობაში.

თავი IV. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების განახლება

    მუხლი 37. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების განახლების ვადა

1. ამ დებულების 36-ე მუხლის მე-4 პუნქტით განსაზღვრული ვადის ამოწურვის შემდეგ, პირს, რომელსაც სურს პედაგოგიური საქმიანობის განხორციელება, ვალდებულია განაახლოს ან ხელახლა მოიპოვოს დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლება.

2. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლება უქმდება, თუ დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებელი მისი მოპოვებიდან 8 წლის შემდეგ არ განაახლებს ამ უფლებას. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლება განახლდება 8 წლის ვადით.

    მუხლი 38. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების განახლების ფორმები

1. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების განახლებისათვის დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებელი ვალდებულია დააგროვოს დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის პროფესიული განვითარების სქემით გათვალისწინებული კრედიტები.

2. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის პროფესიული განვითარების კრედიტების დაგროვება შესაძლებელია შემდეგი ალტერნატიული ფორმების გამოყენებით:

ა) აკრედიტებული პროფესიული განვითარების პროგრამების გავლა;

ბ) სასერტიფიკაციო გამოცდის ჩაბარებიდან 6 წლის შემდეგ დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სასერტიფიკაციო გამოცდის ჩაბარება;

გ) საგანმანათლებლო ან პედაგოგიური პროდუქტის შექმნა (სახელმძღვანელოს, საგანმანათლებლო პროგრამის ავტორობა, საგანმანათლებლო პროექტის შემუშავება ან/და განხორციელება და სხვა პედაგოგებისათვის ცოდნის გაზიარება და სხვა).

    მუხლი 39. არაქართულენოვანი სკოლის უფლება-მოვალეობები დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების განახლების პროცესში

1. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების განახლების მიზნით არაქართულენოვანი სკოლის ხელმძღვანელობაზე უფლებამოსილი პირის გადაწყვეტილებით იქმნება სასერტიფიკაციო საბჭო (შემდგომში – საბჭო), რომლის შემადგენლობაში შედის არაქართულენოვანი სკოლის ხელმძღვანელი, რომელიც იმავდროულად არის საბჭოს თავმჯდომარე, სამეურვეო საბჭოსა და პედაგოგიური საბჭოს თავმჯდომარე (ასეთის არსებობის შემთხვევაში) და „ზოგადი განათლების შესახებ“ საქართველოს კანონის 21² მუხლის პირველი პუნქტით გათვალისწინებული ყველა სახის არანაკლებ ერთი მასწავლებელი (სკოლაში ასეთი სახის მასწავლებლის არსებობის შემთხვევაში).

2. საბჭო თავისი შემადგენლობიდან ირჩევს საბჭოს თავმჯდომარის მოადგილეს და საბჭოს მდივანს.

3. საბჭოს სხდომებს უძღვება საბჭოს თავმჯდომარე, რომლის მიერ მოვალეობის შესრულების შეუძლებლობის შემთხვევაში, მის ფუნქციებს ასრულებს საბჭოს თავმჯდომარის მოადგილე.

4. საბჭო იკრიბება წელიწადში არანაკლებ ორჯერ. საბჭოს სხდომას იწვევს საბჭოს თავმჯდომარე საკუთარი ინიციატივით, სკოლის მასწავლებლის ან/და საბჭოს წევრის წერილობითი მოთხოვნის შემთხვევაში.

5. საბჭო უფლებამოსილია განიხილოს საკითხი, თუ საბჭოს სხდომას ესწრება წევრთა სრული შემადგენლობის უმრავლესობა. საბჭოს გადაწყვეტილებები მიიღება საბჭოს სხდომაზე დამსწრეთა უმრავლესობით. ხმების გაყოფის შემთხვევაში გადამწყვეტია საბჭოს თავმჯდომარის ხმა.

6. საბჭოს სხდომის შესახებ დგება ოქმი, რომელიც ფორმდება საბჭოს სხდომის ჩატარებიდან არა უგვიანეს მომდევნო დღისა საბჭოს თავმჯდომარისა და საბჭოს მდივნის ხელმოწერებით.

7. საბჭო, დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის პროფესიული განვითარების სქემის და დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის პროფესიული განვითარების პორტფოლიოს მიხედვით, სასწავლო წლის დასაწყისში განიხილავს და ამტკიცებს დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის მიერ მომზადებულ წლიურ სამოქმედო გეგმას, ხოლო სასწავლო წლის ბოლოს – დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის წლიური სამოქმედო გეგმის ანგარიშს.

8. ამ მუხლის მე-7 პუნქტის საფუძველზე, საბჭო აჯამებს დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის მიერ მოპოვებული დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის პროფესიული განვითარების კრედიტების რაოდენობას და ასახავს საბჭოს სხდომის ოქმში.

9. საბჭო ვალდებულია სასწავლო წლის ბოლოს შესაბამის რესურსცენტრს გადაუგზავნოს მონაცემები (სახელი, გვარი, პირადი ნომერი (პირადობის დამადასტურებელი დოკუმენტის მიხედვით) იმ დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის შესახებ, რომელმაც დააგროვა დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის პროფესიული განვითარების სქემით გათვალისწინებული მასწავლებლის პროფესიული განვითარების შესაბამისი კრედიტები.

10. სკოლის ხელმძღვანელობაზე უფლებამოსილი პირი ვალდებულია უზრუნველყოს საბჭოს გამართული ფუნქციონირება და საბჭოს მიერ ამ დებულებით გათვალისწინებული ვალდებულებების შესრულება.

11. რესურსცენტრი ამ მუხლის მე-9 პუნქტით გათვალისწინებული მონაცემების მიღებიდან არა უგვიანეს 20 დღისა უზრუნველყოფს მათ ასახვას მასწავლებელთა რეგისტრაციის ელექტრონულ საინფორმაციო სისტემაში.

12. დაინტერესებული პირი უფლებამოსილია საბჭოს გადაწყვეტილება კანონმდებლობით დადგენილი წესით გაასაჩივროს ცენტრში.

    მუხლი 40. ცენტრის უფლება-მოვალეობები დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების განახლების პროცესში

1. ცენტრი, დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებელთა რეგისტრაციის ელექტრონულ საინფორმაციო სისტემაში რესურსცენტრის მიერ შესაბამისი მონაცემების ასახვიდან 1 თვის ვადაში, დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის პროფესიული განვითარების სქემით გათვალისწინებული შესაბამისი რაოდენობის კრედიტების დაგროვების შემთხვევაში, იღებს გადაწყვეტილებას დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლისათვის დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების განახლების შესახებ.

2. ცენტრი ვალდებულია შერჩევითი პრინციპის გამოყენებით რეგულარულად შეამოწმოს დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის პროფესიული განვითარების სქემით გათვალისწინებული კრედიტების დაგროვების დამადასტურებელი დოკუმენტაცია.

3. ცენტრი ამ მუხლის პირველი პუნქტით გათვალისწინებული გადაწყვეტილების მიღებიდან 2 თვის ვადაში უზრუნველყოფს დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატების გადაცემას შესაბამისი რესურსცენტრისათვის, ხოლო რესურსცენტრი – სერტიფიკატების მიღებიდან 20 დღის ვადაში, მათ გადაცემას შესაბამისი პირებისათვის.

თავი V. სერტიფიცირებული დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სტატუსის ვადამდე ჩამორთმევის პირობები

    მუხლი 41. სერტიფიცირებული დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სტატუსის ვადამდე ჩამორთმევის პირობები

1. დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებელს სერტიფიცირებული მასწავლებლის სტატუსი ვადამდე ჩამოერთმევა, თუ:

ა) დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებელი არღვევს მასწავლებლის პროფესიული სტანდარტით დადგენილ ვალდებულებებს და მისი ქმედება ეწინააღმდეგება ამავე სტანდარტით დადგენილ ღირებულებებს;

ბ) მის მიმართ კანონიერ ძალაშია შესული სასამართლოს გამამტყუნებელი განაჩენი;

გ) დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის მიერ სასერტიფიკაციო გამოცდისთვის რეგისტრაციის მიზნით ან დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლობის უფლების განახლების პროცესში არასწორი მონაცემები იქნა წარდგენილი, რაც დასტურდება საქართველოს კანონმდებლობით დადგენილი წესით;

თავი VI. გარდამავალი დებულებანი

    მუხლი 42. 2012 წლის სასერტიფიკაციო გამოცდა

2012 წელს, გამოცდების ეროვნული ცენტრი უზრუნველყოფს სასერტიფიკაციო გამოცდის ჩატარებას სასერტიფიკაციო გამოცდის მხოლოდ ქართული ენის ნაწილში დაწყებითი საფეხურის მულტილინგვური განათლების მასწავლებლობის კანდიდატებისათვის.

 

დანართი №2

დანართი №4

დაწყებითი და საბაზო /საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატის ნიმუში

    მუხლი 1. დაწყებითი და საბაზო/ საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატის ნიმუშის აღწერილობა

დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატის ნიმუშის რეკვიზიტებია:

ა) წარწერა „საქართველო“, რომელიც უნდა განთავსდეს დაწყებითი და საბაზო საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატის სახიან მხარეს ზედა ცენტრალურ ადგილზე;

ბ) მითითება „მულტილინგვური განათლების მასწავლებლის სერტიფიკატი“;

გ) დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატის ნომერი, დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატების რეგისტრაციის მიზნით საჯარო სამართლის იურიდიული პირის – მასწავლებელთა პროფესიული განვითარების ცენტრის მიერ წარმოებული რეესტრის მონაცემების მიხედვით;

დ) საქართველოს განათლებისა და მეცნიერების სამინისტროს და საჯარო სამართლის იურიდიული პირის – მასწავლებელთა პროფესიული განვითარების ცენტრის ლოგოები (ასეთის არსებობის შემთხვევაში);

ე) პირის სახელი, გვარი, რომელზეც გაიცა დაწყებითი და საბაზო/საშუალო საფეხურის საგნის/საგნობრივი ჯგუფის მულტილინგვური განათლების მასწავლებლის სერტიფიკატი, აღნიშნული პირის დაბადების თარიღი (რიცხვი, თვე, წელი);

ვ) ინფორმაცია მასწავლებლობის უფლების მოპოვების/განახლების შესახებ;

ზ) მასწავლებლობის უფლების მოპოვების/განახლების თაობაზე გადაწყვეტილების მიმღები ორგანოს სახელწოდება, გადაწყვეტილების თარიღი (რიცხვი, თვე, წელი) და ნომერი;

თ) მითითება საქართველოს კანონმდებლობით გათვალისწინებულ მასწავლებლის სახეზე;

ი) მასწავლებლის სერტიფიკატის გაცემის თარიღი (რიცხვი, თვე, წელი);

კ) საჯარო სამართლის იურიდიული პირის – მასწავლებელთა პროფესიული განვითარების ცენტრის დირექტორის სახელი და გვარი (გარკვევით), ხელმოწერა;

ლ) საჯარო სამართლის იურიდიული პირის – მასწავლებელთა პროფესიული განვითარების ცენტრის ბეჭედი.