საქართველოს საგადასახადო კოდექსში ცვლილების შეტანის შესახებ

საქართველოს კანონი

საქართველოს საგადასახადო კოდექსში ცვლილების შეტანის შესახებ

საქართველოს პარლამენტი ადგენს:

1. საქართველოს საგადასახადო კოდექსის (პარლამენტის უწყებანი, №32, 24 ივლისი, 1997) 273-ე მუხლის მე-13 ნაწილი ჩამოყალიბდეს შემდეგი რედაქციით:

„13. 2000 წლის 1 იანვრიდან 2001 წლის 1 იანვრამდე:

ა) თამბაქოს ნაწარმის იმპორტი და წარმოება (თამბაქოს ნედლეულის გარდა) დამატებული ღირებულების გადასახადის და აქციზის ნაცვლად დაიბეგროს ფიქსირებული გადასახადით, შემდეგი ოდენობით:

ა.ა) მოსაწევი თამბაქო (ჩიბუხის) – 20 ლარი 1 კგ-ზე;

ა.ბ) სიგარა – 60 თეთრი 1 ცალზე;

ა.გ) სიგარილა და ფილტრიანი სიგარეტი – 40 თეთრი 1 კოლოფზე;

ა.დ) ყველა დანარჩენი უფილტრო სიგარეტი და პაპიროსი – 30 თეთრი 1 კოლოფზე“;

ბ) ამ მუხლის „ა“ ქვეპუნქტში აღნიშნული თამბაქოს ნაწარმის აქციზური მარკების შეძენისას გადაიხდევინება ფიქსირებული გადასახადი სრული ოდენობით;

გ) იმპორტული სიგარეტის მიწოდება დღგ-ით არ იბეგრება;

დ) საქართველოში წარმოებული თამბაქოს ნაწარმის მიწოდება დაიბეგროს დღგ-ის ნულოვანი განაკვეთით;

ე) თამბაქოს იმ ნაწარმზე, რომელზედაც ამ მუხლის ამოქმედებამდე გაცემული იყო აქციზური მარკები, სხვაობა, იმპორტისას გადაიანგარიშება და გადაიხდევინება აღნიშნული საქონლის საბაჟო გაფორმების დროს, ხოლო ადგილობრივი წარმოების თამბაქოს ნაწარმზე გადაანგარიშება განხორციელდეს აღნიშნულ საქონელზე გადასახადების გაანგარიშებისას და გადახდილ იქნეს საქართველოს კანონმდებლობის შესაბამისად;

ვ) ამ კანონის ამოქმედებამდე გაცემული აქციზური მარკებით მარკირებული თამბაქოს ნაწარმის იმპორტი და მიწოდება 2000 წლის 1 თებერვლამდე განხორციელდეს აქციზური მარკების გაცემის მომენტისათვის მოქმედი კანონმდებლობის შესაბამისად“.

2. ეს კანონი ამოქმედდეს გამოქვეყნებისთანავე.

საქართველოს პრეზიდენტი                      ე. შევარდნაძე

თბილისი,

1999 წლის 28 დეკემბერი

№100–რს