ხულოს მუნიციპალიტეტის გამგეობაში სტაჟირების გავლის წესის დამტკიცების შესახებ

ხულოს მუნიციპალიტეტის საკრებულოს

დადგენილება №21

2012 წლის 27 აპრილი

დ. ხულო

ხულოს მუნიციპალიტეტის გამგეობაში სტაჟირების გავლის წესის დამტკიცების შესახებ

„ადგილობრივი თვითმმართველობის შესახებ” საქართველოს ორგანული კანონის 22-ე და 43-ე მუხლების შესაბამისად, დაადგინა:

    მუხლი 1.

დამტკიცდეს ხულოს მუნიციპალიტეტის გამგეობაში სტაჟირების გავლის წესი დანართი № 1-ის შესაბამისად.

    მუხლი 2.

დამტკიცდეს ხულოს მუნიციპალიტეტის გამგეობაში სტაჟირების გავლის დამადასტურებელი სერტიფიკატის ფორმა დანართი № 2-ის შესაბამისად.

    მუხლი 3.

დადგენილება ძალაშია გამოქვეყნებისთანავე.

საკრებულოს თავმჯდომარე                  ნ. თავართქილაძე

დანართი № 1

ხულოს მუნიციპალიტეტის გამგეობაში სტაჟირების გავლის წესი

თავი I

ზოგადი დებულებანი

    მუხლი 1

1. წინამდებარე წესი განსაზღვრავს ხულოს მუნიციპალიტეტის გამგეობაში სტაჟირების გავლის წესსა და პირობებს.

2. ხულოს მუნიციპალიტეტის გამგეობის მიზანია აღნიშნული წესის საფუძველზე უზრუნველყოს მაღალკვალიფიციური კადრების მომზადებისათვის, მათი პროფესიული ცოდნის გაღრმავებისათვის, პრაქტიკული უნარ-ჩვევების გამომუშავებისა და სრულყოფისათვის საჭირო პირობების შექმნა.

    მუხლი 2

ამ წესში გამოყენებულ ტერმინებს აქვს შემდეგი მნიშვნელობა:

ა) სტაჟირება – ხულოს მუნიციპალიტეტის გამგეობაში ამ წესით გათვალისწინებული საქმიანობა, რომელიც არ ანაზღაურდება;

ბ) სტაჟიორი – პირი, რომელიც ამ წესის შესაბამისად გადის სტაჟირებას ხულოს მუნიციპალიტეტის გამგეობაში;

გ) კანდიდატი – პირი, რომელიც ხულოს მუნიციპალიტეტის გამგეობაში წარადგენს განაცხადს სტაჟირების შესახებ;

დ) უშუალო ხელმძღვანელი – ხულოს მუნიციპალიტეტის გამგებლის მიერ განსაზღვრული პირი, რომელიც სტაჟირების მთელ პერიოდში ხელმძღვანელობს სტაჟიორის საქმიანობას.

თავი II

სტაჟიორის სტატუსი

    მუხლი 3

1. სტაჟიორად მიიღება მხოლოდ უმაღლესი განათლების მქონე პირი ან უმაღლესი სასწავლებლის დამამთავრებელი კურსის სტუდენტი შესაბამისი სპეციალობის მიხედვით.

2. კანდიდატი სტაჟირების გავლისათვის უნდა აკმაყოფილებდეს შემდეგ აუცილებელ მოთხოვნებს:

ა) იყოს საქართველოს ქმედუნარიანი მოქალაქე;

ბ) სრულყოფილად ფლობდეს საქართველოს სახელმწიფო ენას.

გ) ფლობდეს კომპიუტერულ საოფისე პროგრამებს.

    მუხლი 4

1. კანდიდატმა უნდა წარმოადგინოს:

ა) განცხადება ხულოს მუნიციპალიტეტის გამგებლის სახელზე;

ბ) პირადობის დამადასტურებელი დოკუმენტის ასლი;

გ) დიპლომის ასლი ან ცნობა უმაღლესი სასწავლებლიდან;

დ) ავტობიოგრაფია (CV, რეზიუმე);

ე) ორი ფოტოსურათი (3X4).

2. განცხადების წარდგენიდან არა უგვიანეს ორი კვირისა კანდიდატი გასაუბრებას გადის ხულოს მუნიციპალიტეტის გამგებელთან.

3. კანდიდატის სტაჟიორად მიღების ან მიღებაზე უარის თქმის შესახებ გადაწყვეტილებას იღებს გამგებელი, დადებითი გადაწყვეტილების მიღების შემთხვევაში გამგებელი განსაზღრავს სტაჟიორის უშუალო ხელმძღვანელის ვინაობას.

4. სტაჟირების ვადა არ უნდა აღემატებოდეს სამ თვეს.

5.  ხულოს მუნიციპალიტეტის გამგეობაში სტაჟიორთა რაოდენობას განსაზღვრავს გამგებელი.

6. სტაჟიორის სამუშაო პერიოდი განისაზღვრება 11 სთ-დან 15 სთ-მდე.

თავი III

სტაჟიორის უფლებები და ვალდებულებები

    მუხლი 5

სტაჟიორს უფლება აქვს:

1. გაეცნოს მისთვის საჭირო სამსახურებრივ დოკუმენტაციას და სხვა მასალებს, ისარგებლოს სათანადო სამეცნიერო და ანალიტიკური ინფორმაციით.

2. დაესწროს გამგეობის თათბირებს და სხვა ღონისძიებებს, მონაწილეობა მიიღოს მათ ორგანიზაციულ-ტექნიკურ უზრუნველყოფაში.

    მუხლი 6

სტაჟიორი ვალდებულია:

1. გაეცნოს და იხელმძღვანელოს იმ ნორმატიული აქტებით, რომლებიც აწესრიგებენ და განსაზღვრავენ ხულოს მუნიციპალიტეტის გამგეობის უფლებამოსილებებს, დაიცვას შრომის კანონმდებლობით და შინაგანაწესით დადგენილი ნორმები.

2. გაეცნოს გამგეობის შესაბამისი სტრუქტურული ერთეულის მუშაობის სპეციფიკას, საქმიანობის სფეროს, საზედამხედველო და ორგანიზაციულ საქმიანობას, სხვადასხვა საკითხების მომზადებისა და დოკუმენტების შედგენის პრაქტიკას; თანამშრომელთა ცოდნა და გამოცდილება გამოიყენოს მასზე დაკისრებული მოვალეობის შესრულებისათვის.

3. უშუალო ხელმძღვანელის მითითებით შეასრულოს სამსახურის საქმიანობასთან დაკავშირებული კონკრეტული დავალებები.

თავი IV

ხულოს მუნიციალიტეტის გამგეობის ვალდებულება სტაჟიორის მიმართ

    მუხლი 7

ხულოს მუნიციპალიტეტის გამგეობა სტაჟიორს უქმნის სათანადო პირობებს პროფესიული უნარ-ჩვევებისა და პრაქტიკული გამოცდილების შესაძენად.

    მუხლი 8

სტაჟიორის უშუალო ხელმძღვანელი ვალდებულია:

ა) პირადად გაუწიოს ზედამხედველობა სტაჟიორის საქმიანობას;

ბ) პერიოდულად მიაწოდოს სასწავლო თემატიკა, მისცეს დავალებები და უზრუნველყოს შესაბამისი ინფორმაციით;

გ) ხელი შეუწყოს სტაჟიორს მისთვის დაკისრებული მოვალეობების შესრულებაში.

თავი V სტაჟირების სხვა პირობები,

სტაჟირების დასრულება და სერტიფიკატის გაცემა

    მუხლი 9

1. სტაჟირების შეწყვეტის საფუძველია:

ა) სტაჟირების პერიოდში არასაპატიო მიზეზით 5 დღის განმავლობაში ან სტაჟირების ვადის 1/4-ის განმავლობაში სტაჟირების გავლის ადგილას გამოუცხადებლობა;

ბ) დავალებების შეუსრულებლობა ან არაჯეროვანი შესრულება;

გ) პირადი განცხადება;

დ) სტაჟირების ვადის გასვლა (სტაჟირების დასრულება).

2. სტაჟირების შეწყვეტის შესახებ გადაწყვეტილებას იღებს ხულოს მუნიციპალიტეტის გამგებელი სტაჟიორის უშუალო ხელმძღვანელის რეკომენდაციის საფუძველზე.

3. სტაჟირების პროცედურის საერთო კოორდინაციას ახორციელებს ხულოს მუნიციპალიტეტის გამგეობის ადმინისტრაციული სამსახურის უფროსი, რომელიც იბარებს კანდიდატთა საბუთებს და უზრუნველყოფს ყველა საჭირო დოკუმენტის მომზადებას.

    მუხლი 10

1. სტაჟირების დასრულების შემდგომ სტაჟიორის მიერ შეძენილ ცოდნასა და პრაქტიკულ უნარ-ჩვევებს აფასებს ხულოს მუნიციპალიტეტის გამგებელი, სტაჟიორის უშუალო ხელმძღვანელის რეკომენდაციის საფუძველზე.

2. სტაჟირების შედეგები შეიძლება შეფასდეს დადებითად ან უარყოფითად.

3. სტაჟირების შედეგების დადებითად შეფასების შემთხვევაში გაიცემა შესაბამისი სერტიფიკატი.

                                                                                                                                         დანართი №2                                                                                                                                                                                                                                                  

ხულოს მუნიციპალიტეტის გამგეობაში სტაჟირების გავლის დამადასტურებელი

სერტიფიკატი

სერტიფიკატი ეძლევა

–––––––––––––––––––––––––––––––––––––––

სახელი, გვარი

ხულოს მუნიციპალიტეტის გამგეობაში სტაჟირების

წარმატებით დასრულებისათვის

–––––––––––––––––––––––––––––––––  ––––––––––––––––––––

ხელმოწერა                                   თარიღი