საქართველოს თავდაცვის სამინისტროს სამხედრო მრჩეველთა საბჭოს დებულების დამტკიცების შესახებ

საქართველოს თავდაცვის მინისტრის
ბრძანება №245

2012 წლის 27 მარტი
ქ. თბილისი

საქართველოს თავდაცვის სამინისტროს სამხედრო მრჩეველთა საბჭოს დებულების დამტკიცების შესახებ

„საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-18 მუხლის მე-2 პუნქტისა და „საქართველოს თავდაცვის სამინისტროს დებულების დამტკიცების შესახებ” საქართველოს პრეზიდენტის 2004 წლის 5 აპრილის № 119 ბრძანებულების მე-3 მუხლის მე-3 პუნქტის „პ” ქვეპუნქტის შესაბამისად, ვბრძანებ:

მუხლი 1. დამტკიცდეს „საქართველოს თავდაცვის სამინისტროს სამხედრო მრჩეველთა საბჭოს დებულება”.

მუხლი 2. ეს ბრძანება ამოქმედდეს გამოქვეყნებისთანავე.

ბ . ახალაია

საქართველოს თავდაცვის სამინისტროს სამხედრო მრჩეველთა საბჭოს

დ ე ბ უ ლ ე ბ ა

თავი I. ზოგადი დებულებანი

    მუხლი 1

საქართველოს თავდაცვის სამინისტროს სამხედრო მრჩეველთა საბჭო (შემდგომში – საბჭო) არის საქართველოს თავდაცვის სამინისტროს სტრუქტურული ქვედანაყოფი, რომელიც თავის საქმიანობას წარმართავს საქართველოს კანონმდებლობის, საქართველოს თავდაცვის მინისტრის სამართლებრივი აქტებისა და წინამდებარე დებულების საფუძველზე. საბჭო უშუალოდ ექვემდებარება საქართველოს თავდაცვის მინისტრს.

    მუხლი 2

საბჭოს დანიშნულებაა, საქართველოს შეიარაღებული ძალების ტრანსფორმაციის პროცესის მხარდასაჭერად, თავდაცვისა და უსაფრთხოების სფეროში მიმდინარე და დაგეგმილი რეფორმების ანალიზი, საქართველოს თავდაცვის მინისტრისათვის სამხედრო საკითხებზე რეკომენდაციებისა და წინადადებების მომზადება და წარდგენა.

    მუხლი 3

საბჭოს საქმიანობა მიმართულია საქართველოს შეიარაღებულ ძალებში მიმდინარე რეფორმირების პროცესის ხელშეწყობასა და ტრანსფორმაციის პროცესის მხარდაჭერაზე. აღნიშნული პროცესების უზრუნველყოფის მიზნით, საბჭო უფლებამოსილია ითანამშრომლოს ადგილობრივ და უცხოელ ექსპერტებთან.

თავი II. საბჭოს შემადგენლობა

    მუხლი 4

საბჭოს შემადგენლობაში შედიან:

ა) საქართველოს შეიარაღებული ძალების მოქმედი და გადამდგარი სამხედრო მოსამსახურეები (უფროს ოფიცერთა კატეგორია);

ბ) საქართველოდან და პარტნიორი ქვეყნებიდან მოწვეული სამხედრო და სამოქალაქო ექსპერტები.

თავი III. საბჭოს ფუნქციები

    მუხლი 5

საბჭოს ფუნქციებია:

ა) საქართველოს შეიარაღებული ძალების ტრანსფორმაციის პროცესის მხარდაჭერა;

ბ) საქართველოს შეიარაღებულ ძალებში არსებული შესაძლებლობების ანალიზი, ნაკლოვანებების გამოვლენა და მათ აღმოსაფხვრელად შესაბამისი რეკომენდაციების მომზადება;

 გ) თავდაცვისა და უსაფრთხოების სფეროში კონცეპტუალური დოკუმენტების შემუშავების პროცესში შესაბამისი რეკომენდაციების მომზადება;

დ) საქართველოს შეიარაღებული ძალების განვითარების გეგმებთან დაკავშირებულ საკითხებზე საქართველოს თავდაცვის მინისტრისათვის რეკომენდაციების წარდგენა;

ე) საქართველოს თავდაცვის სამინისტროსა და საქართველოს შეიარაღებული ძალების სტრუქტურული ოპტიმიზაციის პროცესის ხელშეწყობის მიზნით შესაბამისი რეკომენდაციების მომზადება;

ვ) ეროვნული სამხედრო-სამეცნიერო შესაძლებლობების განვითარებისათვის ადგილობრივი სამრეწველო, ტექნოლოგიური და კვლევითი პოტენციალის ხელშეწყობის შესახებ რეკომენდაციების მომზადება;

ზ) სამხედრო პერსონალის მართვის სისტემის გაუმჯობესების მიზნით, შესაბამისი წინადადებების მომზადება;

თ) დაჭრილი და დაღუპული სამხედრო მოსამსახურეების და მათი ოჯახის წევრების სოციალური უზრუნველყოფის მიზნით შესაბამისი წინადადებების მომზადება;

ი) საქართველოს შეიარაღებული ძალების პოპულარიზაციის ხელშეწყობა;

კ) ნატოს-თან თანამშრომლობის და საერთაშორისო უსაფრთხოების საკითხებთან დაკავშირებით შესაბამისი რეკომენდაციების მომზადება.

თავი IV. საბჭოს საქმიანობის წესი

    მუხლი 6

საბჭოს ხელმძღვანელობს საბჭოს თავმჯდომარე, რომელიც ექვემდებარება საქართველოს თავდაცვის მინისტრს და თანამდებობაზე ინიშნება და თანამდებობიდან თავისუფლდება საქართველოს თავდაცვის მინისტრის მიერ.

    მუხლი 7

საბჭოს თავმჯდომარეს ჰყავს ორი მოადგილე, რომლებსაც თავმჯდომარის წარდგინებით, თანამდებობაზე ნიშნავს და თანამდებობიდან ათავისუფლებს საქართველოს თავდაცვის მინისტრი.

    მუხლი 8

საბჭოს თავმჯდომარის დროებით არყოფნის შემთხვევაში, მის უფლება-მოვალეობებს, საქართველოს თავდაცვის მინისტრის ინდივიდუალური ადმინისტრაციულ-სამართლებრივი აქტის საფუძველზე, ახორციელებს საბჭოს თავმჯდომარის ერთ-ერთი მოადგილე.

    მუხლი 9

სხდომა მოიწვევა საბჭოს თავმჯდომარის მიერ საქართველოს თავდაცვის მინისტრის გადაწყვეტილების შესაბამისად.

    მუხლი 10

სხდომაზე განხილულ საკითხთან დაკავშირებით, საბჭო შეიმუშავებს რეკომენდაციებს, რომელსაც წარუდგენს საქართველოს თავდაცვის მინისტრს.